Bruno Gómez gana'l Premiu Asturies d'Ensayu

Bruno Gómez ye'l ganador del I Premiu Asturies d'Ensayu, que convoca la Editorial Espublizastur. El xuráu d'esta primer edición tuvo integráu por Xose A. Armayor, Fonsu Fernández Álvarez, Carme Marqués y David M. Rivas, que decidió otorga-y el primer premiu a la obra “Turismu ya identidá nacional”, qu’una vuelta abiertes les pliques resultó ser obra de Bruno Gómez Jiménez. Bruno Gómez Jiménez, (Xixón 1982) ye Técnicu Superior n'animación d'actividaes fisico-deportives y estudiante na Escuela Universitaria de Turismu d'Asturies. Bruno Gómez trabaya como xefe d'animación del complexu turísticu, Las Dunas Camping y Bungaló de Sant Pere Pescador, Xirona, Cataluña y ye animador y guía turísticu de la empresa de viaxes Travelkids del grupu Bestours de Barcelona.

Asinamesmo, el xuráu decidió xunitariamente conceder una Mención al ensayu “Les Asturies y el nacionalismu bascu”, de Xaviel Vilareyo y Villamil (Mieres del Camín, 1967). Nel mesmu sen, tanto’l xuráu como la editorial convocante d’esti I Premiu Asturies d’Ensayu felicitaron a tolos participantes polos sos ensayos y pol bon nivel de los nueve trabayos presentaos en total a esta primer edición del Premiu Asturies.