Los partíos nacionalistes asturianos Andecha Astur y PAS, el partíu provincialista UNA y el partíu d'izquierdes Bloque por Asturies dispónense a celebrar de diverses maneres los actos convocaos pal próximu 8 de setiembre, declaráu como Día de la Nación Asturiana.
Asina, UNA y Bloque por Asturies manifestaron que participarán nun actu conxuntu esi día nos Xardinos del Náuticu de Xixón, una concentración a la qu'asistirán máximos representantes de la Izquierda Xunida.
Andecha Astur participará tamién nel actu conxuntu d'UNA y Bloque por Asturies asina como nuna manifestación convocada por dellos grupos sociales y políticos que percorrerá les cais principales d'Uviéu col lema "Democracia p'Asturies - Democracy for the Asturies".
Pel so llau, el PAS refugó participar tanto na concentración de Xixón como na manifestación d'Uviéu alegando discrepancies na forma "despolitizada" d'organizar los eventos y asina fairá un actu partidista en Candás xunto con URAS, partíu asturianu col que firmó una coalición electoral. Los actos de PAS-URAS tendrán llugar nuna plaza céntrica de Candás y depués fairán una xinta de xermandía pa militantes y simpatizantes. N'años anteriores la coalición PAS-URAS solía facer un actu abiertu a tolos ciudadanos, un homenaxe a los padres fundadores, los reis d'Asturies, ante'l Panteón Real de la Catedral d'Uviéu onde depositaben una ufierta floral baxo la estatua d'Alfonsu II con dellos discursos patrióticos, pero esti añu ye añu electoral y necesiten reforzar la so coalición cola URAS y reaxuntar la so militancia, por eso decantáronse pa facer esta vegada un actu más partidista.
El Goviernu del Principáu de les Asturies celebrará como suel facer pel so llau una romería itinerante qu'esti añu tendrá llugar en Ribeseya. El PP d'Avilés, El PP d'Uviéu y el PP de Xixón nun celebrarán nengún actu relevante con motivu del Día de la Nación Asturiana.
Entradas
