domingo, 24 de mayo de 2009

25 de Mayu, día de la bandera asturiana: La Estrellada



Un 25 de mayu de 1808 nacía oficalmente la bandera asturiana histórica formada pola Cruz de Pelayu en plata sobre fondu azul como dexara afitao nel sieglu XVIII Trelles-Villademoros nel so llibru Asturias Ilustrada. Esta bandera ye la oficial na actual Comunidá Autónoma del Principáu d'Asturies formada nel territoriu de la provincia d'Uviéu demarcáu en 1835. El Lábaru ye una bandera moderna que representa a les Asturies de Santiyana, provincia creada un 28 de xunetu de 1778 pero que nun cuntó con bandera propia hasta hai bien poco. Doscientos años depués d'aquel 25 de mayu, nel 2008 va nacer otra bandera asturiana: La Estrellada, en recuerdu de la primer bandera histórica asturiana. La Estrellada representa la totalidá de los territorios históricos asturianos, les Asturies d'Uviéu y les Asturies de Santiyana, recortaos en mariello sobre un fondu azul y coronaes pola constelación de la Cruz, formada por cuatro estrelles blanques en formación arquiada. La constelación de la Cruz ye la más pequena de toles 88 constelaciones pero ye una de les más famoses. Mui útil pa la orientación de los marinos y los emigrantes nos barcos. Los griegos yá conocíen la constelación de la Cruz, pero Ptoloméu allugábala dientro de la gran constelación de Centaurus, el monstru metá persona y metá animal. Nel sieglu XVII la Cruz definióse como constelación independiente de la de Centaurus pasando en 1679 a ser la constelación 63 gracies a los estudios d'un astrónomu alemán, ganándose asina la so independencia como constelación dixebrada. Formen la constelación de la Cruz cuatro estrelles principales representaes na bandera asturiana: Acrux, Becrux, Gacrux y Decrux allugaes en forma de cruz llatina. Acruz ye la estrella más grande d'esta constelación y la decimosegunda más rellumante del tol firmamentu. Estes cuatro estrelles principales presenten un collor blanco-azuláu. A estes cuatro estrelles principales acompáñenles otres cinco estrelles menores y secundaries que nun se representen na constelación, la principal d'elles ye la estrella Juxta Crucem de collor mariello-anaranxao. Són precisamente estos trés collores: azul, mariello y blancu los que tán presentes nesta bandera. Una bandera asturiana que simboliza la independencia d'una pequena constelación pero que relluma con una lluz como de les más grandes. Les cuatro estrelles que coronen la bandera, amás de la soberanía real de los ciudadanos, representen los cuatro dialectos de la llingua asturiana: eonaviego, occidental, central y oriental.