lunes, 6 de abril de 2009

El 5u Festival de Cine Asturianu premia a Lilián de Celis


El 5u Festival de Cine Asturianu
premia a Lilián de Celis



El 5u Festival de Cine Asturianu presenta esti próximu miércoles 8 d’abril nel Teatru Filarmónica d’Uviéu la Gala de Clausura del Festival onde se concederán los premios del xuráu nesta edición del añu 2009. Durante la Gala rendiráse un emotivu homenaxe a l’actriz y cantante asturiana Lilián de Celis, Premiu d’Honor d’esti 5u Festival, qu’entregará los premios principales. La cita ye a partir de les 6 de la tarde. La Gala de Clausura va tar presentada por Pepa Martínez, de la compañía Teatru de Güeñu y por José Manuel García, conocíu y veteranu presentador d’eventos musicales. Nesta Gala del Cine Asturianu cuntaráse coles actuaciones musciales de Celia González y del gaiteru Pelayu Cuaya amás de les coreografíes del Ballet Baidán d’Uviéu que dirixe Amparo Villafruela. Toos tán convidaos a esti eventu irrepetible del cine asturianu onde amás se proyectarán los dos curtiumetraxes ganadores d’esta edición del Festival y a les 10 de la nueche presentaráse un estrenu teatral.


El martes 7 d’abril nel marcu del Teatru Filarmónica proyectaránse los curtiumetraxes y documentales finalistes tamién a partir de les 6 de la tarde. Esti añu el Premiu d’Honor ye pa l’actriz y cantante asturiana Lilián de Celis que recibirá un emotivu homenaxe na Gala de Pieslle. El Festival de Cine Asturianu presentará esti añu como novedá dos estrenos teatrales de dos obres breves n’asturianu a cargu de la compañía Teatru de Güeñu, amás de la yá habitual presencia de les coreografíes del Ballet Baidán d’Uviéu que tamién tarán un añu más presentes na Gala d’entrega de premios. Los nominaos al Premiu al Meyor Curtiumetraxe en Castellanu son: Juega conmigo (José Bors, 2004), Ella (Jesús Álvarez, 1999), Propiedad Privada (Ángeles Muñiz, 2006), Salvemos el teatru (Xavi Vilareyo, 2009), Polillas (Pedro Touceda, 2007), Lebensraum (Daniel Valledor, 2007), Normas de la casa (Eva Gallego, 2008), Ingredientes (Rebeca Iglesias, 2007). Los nominaos al Meyor Documental son: Ensin xéneru de duldes (Worldtv-Europe, 2008) y Voces en imágenes (Verité, 2008). Les nominaes a la Meyor Película esti añu son: Oviedo express, La torre de Suso y El orfanato. Los miembros del xuráu nesta edición fueron: Illán Gonzali, espertu en realización y postproducción audiovisual; Ana Cárdenas, documentalista de cine y televisión que trabayó pa la Filmoteca Hespañola y Sara López, ex-programadora de festivales de cine en Madrid. La Gala de Pieslle del Festival cuntará cola presencia de la mítica actriz asturiana Lilián de Celis, Premiu d’Honor d’esta edición del Festival.
Lilián de Celis Collía nació en Fíos, Parres, en 1935 y va rodar como actriz unes 17 películes ente Hespaña y México onde vivió nueve años. Indiscutible reina del cuplé, con una escelente voz de sopranu, a la que munchos consideren la sucesora de la mítica cantante y actriz Raquel Meller, Lilián de Celis trabayó dende 1953 en Radio Madrid nun famosísimu programa de canciones tituláu “Aquellos años del cuplé” onde cola orquesta del maestru Indalecio Cisneros tocando en directu rescató del olvidu abondes canciones que tuvieren yá de moda nos felices años 1920. L’éxitu del programa radiofónicu y de les presentaciones teatrales foi tan grande qu’entamó toa una serie de películes musicales basaes nestes canciones y temes antiguos del cuplé como la famosa película L’últimu cuplé (1957), que nun principiu diba llevar la voz de Lilián de Celis na so banda sonora pero la so negativa a prestar la so voz pa otra actriz fizo cambiar los planes de la película viéndose asina obligada Sara Montiel a cantar los temes d’esta película. El debú de Lilián de Celis nel cine musical paecía asina obligáu y merecíu, faciéndose llueu al añu siguiente como protagonista destacada nuna película pensada especialmente pa ella y dirixida por Mateo Cano y José Luis Merino que llevaría por títulu unu paecíu al famosu programa de Lilián na radio: Aquellos tiempos del cuplé (1958). La película foi mui bien acoyida pol públicu por facer valer nella les versiones musicales de Lilián de Celis, más fieles al estilu orixinal de la “Belle Epoque”, que los arreglos modernizaos fechos pa les películes de Sara Montiel, lo que xeneró llargos debates populares ente los partidarios d’una y d’otra actriz. Llueu rodaría en 1960 Alma aragonesa, Los claveles y en 1961 rodó otres dos películes: Las estrellas, y Júrame. En 1962 entama una xira per Sudamérica instalándose en México durante nueve años onde tamién rodaría delles películes más (Los apuros de dos gallos). Volvió a la so tierra en 1972 rodando en 1975 la película Yo fui el Rey.
El Festival de Cine Asturianu nació'l 27 d'abril del añu 2005 nel auditoriu del Atenéu de Madrid cola idea de celebrar el primer Centenariu del Cine Asturianu. Axuntáronse naquella ocasión figures tan destacaes como Gil Parrondo, Paz Pondal, Xuan Gona, Pedro María Sánchez, Paul Naschy, Julio César Acera o Asución Balaguer, ente otres personalidaes más pa celebrar el nacimientu d'esti Festival de Cine.
Les bases del Festival de Cine Asturianu almiten trabayos en dos estayes principales: obres en llingua asturiana y en cualesquier otra llingua. Al Concursu pueden presentase llargumetraxes, curtiumetraxes, o documentales en cualesquier formatu y duración, siempre que tean realizaos en llingua asturiana, tamién pueden presentase obres de realizadores asturianos o rodaes básicamente n’Asturies o nos territorios del dominiu llingüísticu del asturianu en cualesquier llingua. El Festival de Cine Asturianu celébrase añalmente y piésllase con una gala d'entrega de premios, conocíos como los Fruteros de Cristal, n'homenaxe a la primer película asturiana, El robu de fruta, dirixida por Javier Sánchez Manteola en 1905 y tien como fines la difusión y promoción del cine asturianu y de los sos artistes. Sergio G. Sánchez, Teresa Marcos, Santos Hevia, Carmen Rico, Carlos Rico, Alberto Rodríguez de la Fuente, Pablo de María, Xuan Lluis Ruiz, Luis Argeo, Eva Lesmes o Toni Salgot son dalgunos de los ganadores d’ediciones pasaes del Festival de Cine Asturianu.






Préstanos convidavos a los actos del

5u FESTIVAL DE CINE ASTURIANU

que tendrán llugar del 2 al 8 d’abril del 2009 n’Uviéu

martes 7 abril: 18 hores, TEATRU FILARMÓNICA: Proyección de los curtiumetraxes finalistes presentaos por María Xesús Rogríguez y Jesús Menéndez. 20,30 h: estrenu de la obra “De rebaxes na sablera” pol Grupu Teatru de Güeñu.
21 h: proyección de los documentales finalistes.

miércoles 8 d’abril: 18 hores, TEATRU FILARMÓNICA: Gala de Pieslle, entrega de premios del Festival, presentada por Pepa Martínez y José Manuel García. Actuaciones del Ballet Baidán, Celia González y Pelayu Cuaya. Homenaxe a Lilián de Celis. Proyección de los curtiumetraxes ganadores. 22 hores: estrenu de la obra “El misteriu del pelu roxu” del Grupu Teatru de Güeñu.

ENTRADA LLIBRE A TOLES SESIONES