Xavi Vilareyo faló de la lliteratura asturiana d'Asturias de Santiyana

Xavi Vilareyo faló de la lliteratura asturiana d'Asturias de Santiyana

L'escritor Xaviel Vilareyo disertó sobre la lliteratura asturiana d'Asturias de Santiyana nuna conferencia pronunciada esti miércoles 13 de xineru nel Palaciu Villa Madalena d'Uviéu dientro de los actos de la Xunta d'Escritores Asturianos 2010. La lliteratura dialectal de los escritores d'Asturias de Santiyana tien un valor non sólo filolóxicu o sociolóxicu sinón tamién posee una importancia lliteraria qeu non siempre foi mui bien apreciada nos dos territorios asturianos. La lliteratura dialectal na provincia de Sanander sigue la moda y l'estilu creao por José María de Pereda a mediaos del sieglu XIX buscando un realismu de lo popular, reflexando l'espíritu de la xente del campu o de la mar, de los sectores mayoritarios de la población frente a un tipu de lliteratura realista-burguesa que sólo trataba temes cosmopolites alrodiu la burguesía urbana. Esta apuesta de los costumistes por una lliteratura realista de lo popular implicaba utilizar tamién lliterariamente la llingua del pueblu, l'asturianu de Santiyana, que anque con delles actitúes diglósiques, tolos escritores costumistes del territoriu santiyanés intentaron reflexar y facer valer a través de los sos escritos lliterarios. Según Vilareyo, la figura que más destaca nel panorama de la lliteratura n'asturianu en Santiyana ye l'escritor Nél Llano, autor de dellos volúmenes de cuentos y noveles como "La braña" o "Un campesino en la ciudad".

Presentóse la revista La Sidra númb. 72

Llucía Fernández, directora de la revista La Sidra, editada pol Ensame Sidreru, presentó ayeri miércoles 13 de xineru el númberu 72 de la mesma. La publicación lleva yá seis años de camín hasta convertise nuna publicación de calidá, qu'algamó gran difusión y éxitu nes dos Asturies. La directora destacó l'éxitu que la revista, que ta escrita básicamente n'asturianu, ta teniendo na Asturias de Santiyana yá incluso notres comunidaes yá que tien una amplia distribución comercial. la revista cuenta con estayes informatives, de noticies mundiales sobre'l mundu la sidra y la mazana y entrevistes y reportaxes periodísticos. El presidente Miguel Angel Revilla amosó gran interés pola revista na so presentación nun de los festivales sidreros en Santiyana incluso quiso fotografiase con un exemplar de la mesma. Por embargo, la directora de la publicación, amás de desplicar la evolución y característiques de la revista, les actividaes culturales que s'entamen alrodiu d'ella, como concursos lliterarios y de pintura sobre la sidra, y el popular Sidracrucis, denunció que como asturiana siente vergoña de que'l goviernu del principáu de les Asturies nunca ayudara a la revista y nunca nin siquiera contratara publicidá institucional dientro de la mesma yá que la revista ta abierta a tolos anunciantes. El despreciu de los políticos asturianos a cualesquier cosa qu'agüela a Asturies y más si vien n'asturianu, fai que publicaciones d'alta calidá y difusión como ye la revista La Sidra, sufran el despreciu institucional por parte d'esta casta política que nos govierna. El númberu de la revista presentóse dientro de los actos de la Xunta d'Escritores Asturianos