ENTREVISTA A XUAN CARLOS CRESPOS LANCHAS

- Llueu de la so participación na Xunta d’Escritores Asturianos 2010 recientemente celebrada n’Uviéu nel Palaciu Villa Madalena. ¿Cómo ve esti tipu d’alcuentros y qué destacaría de los mesmos?

Yo, pamique nun se pues estrapolar estos alcuentros con la situación actual de la llingua. Esta situación condena a los mesmos a un llugar minoritariu. Llueu dientro d´esi llugar minoritariu ya ignoráu pola mayoria de la sociedá pues atopar buenes sensaciones, falar de dalgo que te presta,aldericar sobre la cultura asturiana o la so historia pero abultama que nun tenemos qu´escaecer que lo más importante ta ensin algamar.



- ¿Cree que tienen utilidá esti tipu d’alcuentros lliterarios? ¿Por qué?

Colos pocos ámbitos de publicidá que tenemos y los que nos mesmos( por estúpides engarradielles mos pesllamos) hai qu´aprovechar tolos alcuentros, xuntes y demás. Siendo realistes munches vegaes nun sirven más que pa qu´unos cuantes( pocos) s´averen a unes inquietudes comunes.



- ¿Cómo ve’l panorama actual de la lliteratura asturiana y de tolo que s’escribe nesta llingua?

Soi bastante pesimista. Despaecieron munches editoriales que ñacieron nos años 80 y 90( y que nun teníen el cáncanu de les sobenciones, como munches de les actuales) tipu VTP, Llibros del Pexe...les qu´hai son prácticamente pa la autoedicción d´obres propies o de los collacios. Nes décades pasaes podíemos ver que nes llibreríes l´espaciu dedicáu al asturianu medraba y agora malpenes pues alcontrar dalguna que tien llibros amestaos unos con otros ( que si l´asturianu fora un xéneru como la poesía o la lliteratura infantil), nos medios de comunicación nun tenemos puxu. La cultura n´asturianu sigue adoleciendo de que ye de xente aficionao ( con respetables escepciones) o peor de cazasobenciones. En cuantes a la calidá y lo sxéneros tamos como tábemos o sicasí peor. Apenes salen noveles( y muncho menos ambicioses y non noveles de 60 fueyes y a cuatru márxenes), teatru, ensayu,...Salvaríe en cuantes a calidá posiblemente la poesía. En cuanto a repercusión nada. Nun veo que la xente la cai tea esperando que nengún autor, nengún , saque´l so nueu llibru pa dira a mercalu. Nun fuimos quien( con muncha culpa nuesa tamién hai que lo dicir)de facer un mercáu con unos miles de llectores fixos.




-¿Cómo ve la política oficial referente a la lliteratura y qué medíes habríen tomase nesti campu?

Asturies ye una xerontocracia de mediocres y apegaos al cargu, o pero a les migayes de los cargos. Lóxicamente estos güelos( n´Asturies el políticu que tea menos de 60 años paez xoven)nun van permitir nenguna corriente o tendencia que ponga en peligru los sos cargos, pensiones , viaxes y coches oficiales. L´asturianu y la cultura en xeneral la ven como dalgo inútil y como tal intentan perder les menos perres posibles, para asina poder desviales a los viaxes, coches, pensiones,idetes y demás.Y lo que me paez más depresivu ye que tán toos d´alcuerdu. Los del psoe, los del pp, evidentemente los d´iu pero tamién munchos que se dicen asturianistes y que dapoco p´acá decubirieron el posiblismou.
Posibilismu que nun ye otra que les coses nun cambien pero yo garre una sobención o un cargu.Nesti sentíu o cambies too o les midíes nun llegarán nunca. Nun creen nel asturianu, nun creeen n´otra cultura que nun sia sobenciones a cambéu que que calléis.




- ¿Qué motivaciones, metes o oxetivos són los que se plantega nesti momentu pa escribir n’asturianu?

Escribir n´asturianu plantega les mesmes que n´otra llingua( y les mesmes exixencies). Otra cosa ye que nun tea la mesma repercusión en nengún aspectu qu´escribir nuna llingua meyor defendida.



- ¿Qué proyectos concretos, futuros o más inmediatos, tien pa siguir escribiendo n’asturianu?

Siguimos escribiendo rellatos, entamando a iguar una novela que vamos ver si somos quien a espublizala y asperando que baxe la musa que yá va tiempu ensin coses cuatro versos pa un poema.




- ¿Cómo ve en xeneral la política oficial de suvenciones a la lliteratura y a los llibros n’asturianu por parte del Goviernu Autónomu?

La meyor política nun necesita perres. Ye la supón l´apoyu a la cultura asturiana y nun sólo a los que tán nel pesebre públicu. Oficialídá, que nes escueles, los institutos se recomendasen llibros n´asturianu. Una filoloxía n´asturianu en mayúscules y non un minor.Una bona distribución.Lo qu´hai ye un sistema viciáu. Ye como esperar que les raposes cuiden que les pites pongan güevos y medre la cantidá. Más ceo que tarde una raposa ye una raposa y les pites que más den la nota desapecerán.Equí los que más protesten o les editoriales o escritores que menos tean pol llabor de la fsa fora. Les editoriales que más pasen la mano polos fermosos llombos de los conseyeros sobenciones.



- ¿Cómo ve en xeneral la política llingüística actual y la relativa a los medios de comunicación pal fomentu del asturianu?


Mal, los medios de más difusión sólo tiren d´esto cuando ven perres. Y los que de verdá creen na llingua munches veces queden ensin nada. Campañes pa dicir que faen dalgo.Nada, escuses pa dorminos y que nun protestemos y lo tán llogrando.




- ¿Qué opinión tien de los actuales premios lliterarios n’asturianu que se convoquen n’Asturies? ¿Tienen utilidá?

Ye otra bona escusa pa dicir que se fai dalgo, supongo que menos es nada pero toi cansáu de ver premios que tendrían llueu qu´espublizase y distriuise y ni una ni otra. Nun hai que tener munches lluces, vamos coles lluces d´una conseyera de aapp pa ver que en Conceyos como Xixón gasten munches más perres nes obres de Xovellanos o nos premios del Café Xixón ( que pa más desesperu danse en Madrí) que na lliteratura n´astirinu. Del otru ayuntamientu grande´l d´Uviéu ye peor. Apaecieron unos premios en viéspores de elleiciones , depue´s fora, nun tgien nin cartelos n´asturianu, ni ayudes de nengún tipu. Meyor aparo porque ye pa echalo a gritos.




- Nesta XEA 2010 analizáronse les relaciones ente lliteratura, indentidá y nación nel casu asturianu ¿Cómo ve en xeneral esti tema o qué opinión-y merez?


Asturies perdió cuantayá la mayor parte de la so identidá( falo en cuanto a la mayoria d´asturianos), la identidá nun ye daqué que los asturianos valoren muncho nes sos temes de decisiones, como nes ellleiciciones y demás y eso ye estrapolable al tema la lliteratura. Nun creo que la mayoria de la sociedá asturiana, tristemente, vea una lliteratura identitaria de la so tierra




- ¿Cree usté que se puede falar d’una lliteratura asturiana referida a tol dominiu llingúíst5icu oque sólo se puede referir al ámbitu de l’actual Comunidá Autónoma del Principáu d’Asturies?


Cuesta falar d´una lliteratura con dominiu territorial asturianu y con llectores ya independiencia como pa estender afora les nuestres lletres.