Los recientes estrozos y esbarrumbes cometíos nel históricu edificiu del Conventu de San Vicente d'Uviéu, orixe medieval de la fundación de la propia ciudá, dieron llugar nestes pasaes selmanes a abondes protestes de colectivos y ciudadanos preocupaos pola constante situación de destrucción del patrimoniu histórico-artísticu y tamién etnolóxicu asturianu por parte de les instituciones públiques, encargaes en teoría del so fomentu y protección, esto ye, conservación. La conservación de los inmuebles y tesoros monumentales asturianos nun ye tala yá que vien sufriendo una abultable destrucción porparte de los organismos institucionales públicos y ello enriba col aplausu y complicidá de cierta y mui escasa intelectualidá pagao, que calla cuando non tien les coraes d'aplaudir estos desmanes de los estamentos gobernantes que son dafechu contrarios a la sensibilidá del pueblu asturianu, defensor siempre del so pasáu históricu, artísticu y cultural.
Ente les prebes más visibles y amosables d'esta incontrolada y cafiante destrucción del patrimoniu asturianu tán les desapariciones o desanicios de les históriques puertes antigues y renacentistes del propiu Conventu uvieín de San Vicente y la puerta del Palaciu del Conde de Torenu, que desapaecieron del so llugar pa sustituíles por unes modernes puertes de garaxe hortera más propies d'un xalé de neo-ricu. Abondos ciudadanos entrúgense, incluso apelando a los cansinos y combayones medios de comunicación asturianos, cuálu ye'l verdaderu paraderu de los históricos portalones ovetenses, y demanden saber quién los tien y a qué fin van dedicase, si van vendese o yá tienen vendíes les puertes a dalgún qu'otru muséu norteamericanu o si aparecerán de xuru nel xardín de cualesquier avispáu conseguidor oficial. Les puertes sustrayíes del so orixinal allugamientu teníen un grandísimu valor amás de cumplir una función decorativa ya histórica esencial yá que yeren unes puertes históriques qu'agora mesmu tán, como tantes otres xoyes del patrimoniu artísticu asturianu, en paraderu desconocíu.
La desastrosa destrucción del Conventu de San Vicente y la construcción nel so solar d'un adefesiu con pretensiones posmodernistes a escasos dos metros de la xirola la Catedral d'Uviéu escandalizó incluso a los historiadores contemporáneos, cansaos yá de comprobar que la historia actual ye una retafila de despropósitos y d'atentaos destructivos contra tolos testimonios valiosos del pasáu asturianu, ente los que tán la destrucción de los mesmos cuartos del filósofu Feijóo, que morrió nel mesmu Conventu de San Vicente nel que residía.
Les agresiones al patrimoniu oventense y asturianu son abondes y una de les más chirriantes ye l'empeñu, como s'aprecia nuna de les semeyes, de caltener un panel publicitariu que tapa y deforma una de les xoyes arquitectóniques d'Uviéu, la incomparable cúpula art-decó del edificiu del Bancu Herreru, obra singular de 1911 del arquitectu asturianu Manuel del Busto.
Entradas
