Les dos Asturies de Gumersindo Laverde
Natural de la provincia de Sanander y naturalizáu na d’Uviéu, fíu d’aquella pola sangre y d’esta pola educación, el compositor del presente ensayu nunca supo separales nel so corazón, nin na memoria, porque dende nenu deprendió a considerales como un tou homoxéneu, como una sola circunscripción xeográfica, como Galicia o Cataluña, trazada pola mano de la Providencia p’asientu d’un gran Pueblu. Una mesma mar báñales, una mesma cordalera dixébrales de Castiella, la so topografía, agricultura, productos vexetales y minerales son idénticos, análogues les sos industries, los sos traxes, los sos usos y costumes: nun hai solución de continuidá ente elles, nin pola disposición del terrén, nin pola manera de ser de los sos pueblos: naide en pasando la barca d’Unquera cree entrar nun país distintu del qu’acaba de recorrer, como nos sucede cuando trespasamos los puertos de Reinosa y Payares. La historia nun pon menos de relieve que la xeografía el cercanu parentescu de les dos provincies. Fueren partes d’una sola Nación, como graves autores opinen o fueren dos naciones diferentes los Cántabros y los Ástures tresmontanos; partiera llendes ente unos y otros el Besaya, el Seya o la ría de Villaviciosa, que toes estes opiniones cuenten defensores, el fechu incuestionable ye que la so índole y costumes yeren iguales, qu’aliaos en paz y en guerra una mesma foi la so suerte resistiendo heróicamente y sucumbiendo al empar tres insistente y sangrienta llucha coles lexones romanes. Pasen siete sieglos, verifícase la invasión sarracena y cai l’imperiu godu. Dase comienzu a la restauración d’Hespaña ¿ónde? en Cuadonga, en La Llébana, nos confines de les actuales provincies asturianes. ¿Qué caudiellos dirixen aquel gloriosu movimientu? Pelayu, Alfonsu I, duques de Cantabria. ¿Qué xente s’agrupa alrodiu la so bandera y los llevanten sobre’l pavés de los sos escudos? Los habitantes de dambes márxenes del Deva, los ribereños del Pas y del Nalón. ¿Qué países componen entós el Reinu d’Asturies o polo menos el núcleu primitivu? Nin más nin menos que los que güei componen les dos mentaes provincies. Fundación de reis d’Asturies fueron les Colexates de Santiyana y Sanander. Por eso y a pesar de la dixebra del reinu de Pelayu ente los de Castiella y Lleón y a pesar del diversu réxime a qu’en tiempos posteriores continuó caúna sometida, conservaron éstes siempre’l nome d’Asturies, común a dambes, anque diferenciándose con apellíos d’Uviéu y de Santiyana y aínda dalguna vez de Tresmiera. Véanse los mapes, histories, diccionarios y demás escritos y nellos alcontrarémos el nome de Les Asturies aplicáu constantemente a tola rexón comprendida ente Galicia y Bizcaya, los Pirineos Cantábricos y la mar.
Al nomar con un solu nome, Les Asturies, el territoriu de les provincies d’Uviéu y Sanander lo que facemos ye renovar l’acepción tradicional, non dafecho olvidada entovía d’aquella palabra. Esti nome, Les Asturies, espresa perfectamente les sos afinidaes físiques y morales, la identidá del so orixe y la so comunidá de glories ya infortunios nos antiguos tiempos siendo la forma más adecuada del pensamientu de xuntura y harmonía a la que consagramos los nuestros débiles esfuerzos, arrremellando la vista na historia, xeografía y mutua conveniencia de dambes provincies. La xuntura ye la fuercia. Axúntense pues les nuestres dos provincies, como hermanes ximielgues qu’encerrando una mesma alma y corazón, s’abracen con efusión tres llargos años d’ausencia pa vivir de nuevo nel mesmu techu y compartir los trabayos y prosperidaes. Esta xuntura que foi yá un fechu n’époques remotes pue y tien que volver a selo por más alta y perfecta manera, hoi que cada nación concentra les sos fuerces pa lluchar colos mil obstáculos qu’en toles direcciones alcuentra’l so progresu moral, intelectual y económicu.
Entiéndase entós que la xuntura a la qu’aspiramos nun ye qu’una provincia quede absorbida pola otra sinón que respetando’l ser actual de dambes, como nes provincies vascongaes, les enllace mediante relaciones superiores en toles esferes de la vida. Asina pues queremos:
La xuntura del Principáu y de la Montaña d’Asturies no eclesiástico, elevándose a metropolitana una de les dos sedes episcopales. La xuntura lliteraria separtándose del distritu universitariu de Valladolid y agregándose al d’Uviéu y fundándose publicaciones de tolos xéneros qu’interesen al empar a dambes Asturies, ilustren les sos antigüedaes y promuevan la so cultura y bientar comunes. La xuntura de l’Alministración de Xusticia devolviendo-y al territoriu de l’Audiencia d’Uviéu los límites que tuvo dende 1804 hasta 1834. La xuntura militar faciendo a Sanander y Uviéu independientes de Valladolid y Burgos y creándose una Capitanía Xeneral. La xuntura agrícola, industrial y artística celebrándose Congresos, Esposiciones y Certámenes en que tomen parte xuntamente los asturianos de Santiyana y los d’Uviéu sosteníes poles diputaciones o por sociedaes d’amantes de la gloria y prosperidá de Les Asturies. La xuntura nel cultu a les glories y tradiciones de la nuestra comarca, llevantándose en Cuadonga un Panteón onde reposen los restos de los sos ilustres. La xuntura, en fin, en too y pa tolo honesto, guapo y útil, por mediu d’un ferrocarril que ponga en comunicación directa a Uviéu y Sanander.
Asina entendemos la xuntura de Les Asturies, asina la deseyamos a fin de que aunando los sos elementos de progresu trabayen solidariamente na obra de la so común civilización, a la vez que na de la civilización xeneral de la península, como parte principal que son de la nacionalidá ibérica.
Equí tenéis, queríos paisanos nuestros, el pensamientu que presidió esta xera, ésti ye’l fin al que lu diriximos: fin eleváu, pensamientu xenerosu, qu’alcontrará, nun lo duldamos, ecu simpáticu nos vuestros fidalgos corazones. Si lu acoyéis con benevolencia prometemos continuar perfeccionándolu, ayudaos del amor ensin límites que al suelu natal profesamos y de la collaboración de tantos buenos inxenios como hoi florecen en Les Asturies con temes d’interés pa Les Asturies, mostrándovos lo que fuistis, lo que sois agora y lo que tais llamaos a ser no futuro y contribuyan a conservar viva nes vuestres almes la llama sagrada del patriotismu y del amor al bien en toles sos formes y manifestaciones.
ROBLEN: Justo Álvarez Amandi, Arias de Miranda, Eduardo Bustillo, Narciso Campillo, Emilio Carrizo del Riego, Nicolás Castor de Caunedo, Adolfo de la Fuente, Ángel Fernández de los Ríos, Juan García, Gumersindo Laverde y Ruiz, Montequín, José María de Pereda, Luis Pérez Mínguez, Cándido Salinas, David Sampil, Ceferino Suárez Bravo. Añu 1865
Entradas
