ENTREVISTA A INACIU GALÁN

- Llueu de la so participación na Xunta d’Escritores Asturianos 2010 recientemente celebrada n’Uviéu nel Palaciu Villa Madalena. ¿Cómo ves esti tipu d’alcuentros y qué destacaríes de los mesmos?

Alcontrase, aldericar... ye siempres bono, arriquez a los participantes cuando se llega ensin prexuicios y abiertu a cambiar los puntos de vista colos que se aporta. Sinón nun tien muncha utilidá nin sentíu, más que la d’echar monólogos ensin que naide escuche.
D’esti alcuentru últimu destacaría, ente otres coses, la intervención d’Esther Prieto, na primer xornada, onde dexó mui clara la so postura sobre l’estándar del asturianu, una portura que comparto en gran parte.

- ¿Cómo ve’l panorama actual de la lliteratura asturiana y de tolo que s’escribe nesta llingua?

Ye un panorama cada vegada más ampliu y de más calidá. Ente otres coses llámame l’atención la lliteratura que ta surdiendo nos tiempos últimos con más puxu que nunca al sur del Cordal. Hai que saber facer qu’estos escritores se vean abellugaos pol colectivu d’escritores asturianos, porque formen parte d’un sistema lliterariu común, o asina habría ser.

- ¿Cómo ve la política oficial referente a la lliteratura y qué medíes habríen tomase nesti campu?

Faense coses interesantes, quiciabes ye la lliteratura’l tema meyor tratáu dende les instituciones (al traviés d’ayudes, concursos, etc.) Sicasí, la meyor forma d’apoyar la lliteratura n’asturianu ye reconociendo la oficialidá de la llingua asturiana, pa qu’asina la formación de los escolinos pueda facese n’asturianu y se conviertan, polo menos, en llectores potenciales.

- ¿Qué motivaciones, metes o oxetivos són los que se plantegua nesti momentu pa escribir n’asturianu?

Creo qu’escribir n’asturianu ye tovía güei, y va siguir siéndolo munchos años, en gran parte un actu de militancia, un actu de rebeldía a la escontra del desaniciu de la nuesa llingua. Sicasí, veo llexítimo qu’otros escritores nun tengan esti puntu de vista, y vean la lliteratura n’asturianu simplemente como eso, lliteratura. Oxalá pudiera velo asina tamién.

- ¿Qué proyectos concretos, futuros o más inmediatos, tien pa siguir escribiendo n’asturianu?

Anguaño trabayo l’ensayu en temes estremaos, anque sobremanera en cuestiones de lexicografía y lliteratura asturiana anterior al Surdimientu. Tamién faigo dacuando dalguna incursión na lliteratura más puramente creativa, pero tengo de centrar esfuercios nel proyectu lliterariu que más me presta llevar alantre, la revista Formientu, onde apaecen autores mozos mui interesantes, y cada vegada en mayor númberu y con más calidá.



- ¿Cómo ve en xeneral la política oficial de suvenciones a la lliteratura y a los llibros n’asturianu por parte del Goviernu Autónomu?

Paecenme necesariaes, como lo son les ayudes en toles actividaes económiques. Creo que podría facese meyor en munches coses, pero entiendo que son puntos de vista. Que nun dean una sovención nun quier dicir qu’unu nun pueda arriesgase y asoleyar un llibru, anque da la impresión, tal y como tán les coses agora, de que fuere asina.

- ¿Cómo ve en xeneral la política llingüística actual y la relativa a los medios de comunicación pal fomentu del asturianu?

La política d’apoyu a los medios de comunicación ye mui escasa, y la presencia nos medios públicos ye insuficiente dafechu. Yo creo qu’un mediu públicu asturianu tien que ser 100% n’asturianu. Nesi sen creo que la reinvindicación ta mui parada nesti campu, supongo que se centraron esfuercios n’otres cuestiones que se consideraron más importantes.
Nel ámbitu priváu hai que reclamar que los medios usen l’asturianu más, independientemente de les sovenciones que reciban.

- ¿Qué opinión tien de los actuales premios lliterarios n’asturianu que se convoquen n’Asturies? ¿Tienen utilidá?

Los premios siempres afalen la creación, y nesi sen cualesquier iniciativa ye bona.



- Nesta XEA 2010 analizáronse les relaciones ente lliteratura, indentidá y nación nel casu asturianu ¿Cómo ve en xeneral esti tema o qué opinión-y merez?

Creo qu’un escritor n’asturianu pue ser nacionalista o non, d’izquierdes o de dreches, y esi ha ser un signu de normalidá. Los qu’entendemos Asturies como una nación, supongo que tenemos otros puntos de vista estremaos a aquellos escritores que non, pero toes son posiciones respetables. Nun ta la lliteratura asturiana nin la llingua pa restar, sinón pa sumar escritores, llectores, usuarios, etc.


- Nesta Xunta d’Escritores plantegóse la identidá asturiana como referida a una dualidá territorial ente unes Asturies d’Uviéu y de Santiyana ¿Qué opinión-y merez esti enfoque?

La verdá que nun cuento con una opinión mui formada sobre esta cuestión. Paez claro que tamos falando d’ámbitos culturales con munches coses en común, como asocede con Lleón, pero si falamos de territorialidá, ehí creo que la opinión han dala los ciudadanos de cada territoriu, ha respetase la so voluntá.

- ¿Cree usté que se puede falar d’una lliteratura asturiana referida a tol dominiu llingúísticu o que sólo se puede referir al ámbitu de l’actual Comunidá Autónoma del Principáu d’Asturies?

Creo que lliteratura asturiana ye aquella que s’escribe n’asturianu, independientemente de l nome que se-y dea l’autor a la llingua na qu’escribe (lleonés, asturianu, bable, etc.) Creo que n’eso nun tendría qu’esistir un gran alderique. El problema ta más na usurpación del términu per parte de los escritores asturianos qu’escriben en castellán, que nun me paez que faigan lliteratura asturiana, sinón castellana.



- Nestes Xuntes d’escritores nun suel haber remuneración o compensación económica a los participantes ¿Recomendaríes a otros escritores la so participación activa nesti tipu d’alcuentros futuros? ¿Por qué?

Caún, según les sos circunstancies, ha saber ónde participa, si lo fai de baldre o non. Nun actu ensin porgüeyu económicu per parte del organizador como la XEA, paezme que siempres ta bien echar uin gabitu y participar, anque entiendo qu’aquellos escritores que viven o aspiren a vivir de la lliteratura, busquen participar n’otru tipu d’alcuentros, ye llexítimo dafechu.


- ¿Qué otros temes o lemes suxeriríes pa futures Xuntes d’Escritores Asturianos?

La verdá que queden munchos temes por tratar na lliteratura asturiana. Yo afondaría na lliteratura anterior al Surdimientu, creo que tovía queda muncho que falar sobre esta cuestión. Los autores clásicos asturianos tán mui devaluaos por dalgunos escritores acutales y creo que munches vegaes ye por desconocencia.