Los más guapos d'Asturies de Santiyana.

El pasáu sábadu tuvo llugar nel Palaciu los Deportes de Sanander la escoyeta de Miss y Mister Asturies de Santiyana, que participarán posteriormente representando a la belleza asturiana notros certámenes xunto a los otros dos representantes d'Asturies d'Uviéu. Los escoyíos fueron la modelu Silvia López, de 18 años, Miss Asturias de Santiyana 2009 y Francisco Garrido, de 27 como Míster Asturies de Santiyana. El xuráu tuvo presidíu por Patricia Yurena, ex-miss Hespaña, y durante la Gala ufiertáronse actuaciones musicales y desfiles en traxes de bañu y de nueche. Una cena y l'actuación de los DJs punxeron esti añu fin a la fiesta de la belleza d'esta provincia asturiana.

Fiesta de reapertura del Llar L'Ayalga de Xixón

Tuvo llugar el pasáu vienres la fiesta de reinauguración del Llar L'Ayalga de Xixón, allugáu na cai Prendes Pando 11, depués de delles selmanes de tar peslláu por obres d'acondicionamientu y meyora. Na fiesta nun faltó l'abundante comida con productos de la tierra y de la mar, nin la música de gaita, pandereta y tambor. El Llar asturianista L'Ayalga ufiertará en breve ciclos de cine, cine-club y conferencies yá que nesta remodelación incorporó una bona pantalla de proyecciones nun espaciu que pretende ser un centru cultural y d'alcuentru de diferentes asociaciones culturales y polítiques asturianes abiertu a la participación de toos. El Llar L'Ayalga presenta asina una nueva imaxe y más ufierta de servicios nun centru que pretende ser tamién cultural y apostar especialmente pola cultura asturiana. La decoración del llar ta fecha con guapos mapes de Les dos Asturies respetándose l'anterior collor verde de les parés.