sábado, 24 de marzo de 2012
Xunta d'Escritores Asturianos 2012. Lliteratura asturiana y Oficialidá.
La Xunta d'Escritores Asturianos 2012 tuvo llugar n'Uviéu na Biblioteca del Campu San Francsico los díes 1,2 y 5 de marzu con interesantes actos y presentaciones de llibros, esti añu desarrollándose alrodiu la idea de la Oficialidá de la llingua asturiana y los beneficios qu'ello aportaría pa la lliteratura asturiana. El 1 de marzu la Xunta entamaba cola presentación del llibru "Lliteratura asturiana, identidá y nación", llibru d'actes de la Xunta d'Escritores Asturianos 2010. L'escritor Ánxel Álvarez Llano abría'l programa con una ponenica titulada "A la solombra del Surdimientu" onde cuestionaba la pervivencia d'esta etapa literaria de la Transición democrática. Carlos X. Blanco mandó pa les xoranes un ensayu tituláu "Barruntos y condiciones pal xorrecer d'un ensayu en clave nacional". Xosé Lluís Colodrón, responsable de la Secretaría de Llingua Asturiana del sindicatu SUATEA, faló del "Presente y futuru de la enseñanza del asturianu" denunciando la política de paralización na implantación del asturianu y Xaviel Vilareyo presentó con Llucía Fernández Marqués el so reciente llibru "Les Asturies y el nacionalismu bascu", un ensayu que recibió la Mención Especial del Premiu Asturies d'Ensayu 2009 y que ta publicáu por Espublizastur.
El 2 de marzu el profesor d'historia Evaristo Martínez-Radío ufiertó una conferencia y alderique col títulu de "Ciudadanos asturianos escontra Napoleón" onde anunció qu'Asturies foi pionera n'usar el conceptu de ciudadanía y ciudadanu durante la Guerra Peninsular. Tamién presentóse n'Uviéu el llibru didácticu "El patrimonio lingüístico cántabro" un cuadernu pedagóxicu editáu pola Conseyería Cultura del Goviernu de Cantabria en collaboración con ADIC. Darréu d'ello lleóse la ponencia d'Ismael Carmona sobre "L'estremeñu y la su literatura" faciéndose llueu un alderique sobre la situación de la llingua asturiana fuera les llendes alministratives de la C. A. del Principáu d'Asturies.
El 5 de marzu la escritora xixonesa Beatriz Rionda faló sobre "El cultivu del maíz nel conceyu de Xixón" rescatando del escaezu esta importante xera tradicional de la cultura asturiana. Carlos de la Sala presentó la so interesante conferencia entitulada "Política y arqueología: Roma, godos y Reyes Católicos, la santísima trinidad de la historiografía centralista" onde denunció el romanismu y godismu de ciertos sectores en pro d'imponer un falsu hespañolismu historiográficu n'Asturies. La Xunta terminó cola ponencia del poeta gallegu Miguel Losada (Vigo, 1959), director de la Sección de Cine del Atenéu de Madrid, y escritor convidáu nesta ocasión a les xornaes, onde disertó sobre "Cine y literatura, la traición necesaria" faciéndose darréu una mesa redonda sobre la situación del cine n'Asturies con Xuan Gona, Geno Cuesta, Sofía Menéndez, Miguel Losada y Xavi Vilareyo como moderador. La mesa redonda analizó los problemes, perspectives y soluciones de futuru pa llograr que la industria del audiovisual n'Asturies consiga sobrevivir a les difíciles condiciones socioeconómiques y a un ambiente políticu y alministrativu foscu en xeneral pa cola industria asturiana del audiovisual. Los ponentes analizaron abondos aspectos como la producción audiovisual n'Asturies, la situación de les productores asturianes, la evolución del PIB audiovisual asturianu, les polítiques públiques del audiovisual n'Asturies, la financiación, los medios de comunicación y televisiones y la comercialización. Los ponentes resaltaron la permala situación del sector, la poca actividá de les asociaciones de productores asturianes, la necesidá de presionar más a los poderes públicos pa qu'entiendan los beneficios de tener empreses del audiovisual n'Asturies, asina como la nefasta política audiovisual llevada alantre pol ente públicu de comunicación RTPA, dexando claro qu'Asturies cuenta anguañu con abondos talentos y persones preparaes pa facer d’esta tierra un llugar importante pa la industria del cine.
Al actu de clausura d'estes xornaes lliteraries asistieron abondes persones vinculaes al mundu de la llitreratura y del cine y audiovisual asturianu como los directores Raimundo García, Teresa Marcos, Angeles Cachón, Jaime Fernández Miranda, José Bors, Melania Fraga, Carlos Navarro o el director del centru CISLAN de Llangréu. Tolos participantes recibieron como recuerdu una reproducción d'un grabáu asturianu del sieglu XVI amás del correspondiente certificáu pa los ponentes. La Xunta d'Escritores Asturianos 2012 terminó como ye vezu con una animada espicha con tolos participantes.
Suscribirse a:
Entradas (Atom)
Entradas
