La Federación Asturiana de Bolos sepártase de la hespañola

La Federación Asturiana de Bolos siguió'l mesmu camín de la so fereración ximielga, la "cántabro-autrigona", y decidió separtase dafechu de la federación hespañola. El presidente de la federación hespañola quier llevar al planu políticu la decisión soberana de la federación asturiana. La Federación Asturiana de Bolos celebró una asamblea xeneral estraordinaria, na que se trató como puntu del orde del día principal la independencia de la Federación Hespañola de Bolos. La dixebra afitóse con 28 votos a favor, once en contra y cinco abstenciones. L'independizase xustificólo Desiderio Díaz, presidente de la Federación Asturiana de Bolos, desplicando que se trata d'un organismu que «nun nos aporta nada económicamente y xenera un trabayu escesivu». Según Díaz, agora «nun va pasar nada fuera lo normal», porque dende la federación asturiana van tramitase namás llicencies asturianes "y tolos esfuerzos van dedicase a les ocho modalidaes que se xueguen nes Asturies». El siguiente pasu de la Federación Asturiana de Bolos va ser «dexar en suspensu» tol articuláu estatutariu que seya paralelu cola hespañola.
Pela so parte, el presidente de la Federación Hespañola de Bolos, José Luis Boto, calificó como «ridícula» la situación y declinó opinar «mientres nun se pronuncien el presidente del Principáu de les Asturies y el director xeneral d'Esportes». Colo que pretender treslladar el problema al planu políticu valorando que la situación yera asemeyada a que «Álvarez Areces propunxera qu'Asturies s'independizare d'España». La Federación cántabra tamién s'idependizó de la hespañola, dexando la posibilidá de confederase cola so hermana occidental, la d'Asturies d'Uviéu. Nun va muncho, n'avientu de 2009. la Federación de Cantabria y Autrigonia decidiere tamién, nuna asamblea similiar, separtase de la Federación Hespañola polos memos motivos polos qu'agora se separta la Ferderación d'Uviéu.