jueves, 22 de marzo de 2012

Mesa redonda sobre la situación del cine n'Asturies: l'actividá de la RTPA foi nefasta p'Asturies.








La Xunta d'Escritores Asturianos 2012 que se desarroló n'Uviéu los díes 1, 2 y 5 de marzu clausuróse con una Mesa Redonda sobre la Situación del cine n'Asturies, formada por Sofía Menéndez, directora de Hi-Video Producciones; el productor Geno Cuesta de Blastertv, el productor Juan Gona, Miguel Losada, con Xavi Vilareyo, director del Festival de Cine Asturianu como moderador y organizador del debate. La Mesa Redonda analizó los problemes, perspectives y soluciones de futuru pa llograr que la industria del audiovisual n'Asturies consiga sobrevivir a les difíciles condiciones socioeconómiques y a un ambiente políticu y alministrativu foscu en xeneral pa cola industria asturiana del audiovisual.


La Mesa Redonda analizó abondos puntos concretos como la producción audiovisual n'Asturies, la situación de les productores asturianes, la evolución del PIB audiovisual asturianu, les polítiques públiques del audiovisual n'Asturies, la financiación, los medios de comunicación y televisiones y la comercialización de productos audiovisuales. Los ponentes resaltaron la permala situación en xeneral del sector, la poca actividá de les asociaciones de productores asturianes, la necesidá de presionar más a los poderes públicos pa qu'entiendan los beneficios de tener empreses del audiovisual n'Asturies como empreses de futuru pa la economía asturiana, asina como la denuncia de la política llevada alantre pol ente públicu de comunicación RTPA, calificando los ponentes la so actividá como nefasta pa la industria y trabayadores asturianos dao que sólo un 1,5% del presupuestu d'esti ente públicu quedó en productores asturianes. La solución pal sector del cine asturianu en xeneral pasaría según l'alderique col públicu asistente por presionar más a los políticos pa que cambien la so mentalidá negativa hacia la industria asturiana del audiovisual, que nun se contraten a más empreses de fuera d'Asturies pa facer programes televisivos asturianos, que s'arriesgue más el capital priváu o los patrocinios y tamién intentar facer producciones lo más barates posibles p'aforrar en gastos de producción y evitar pérdides yá que ensin apoyos de tou tipu, la industria asturiana del cine y del audiovisual nun podrá non yá competir con otros territorios que sí apoyen la so industria (Andalucía, Cataluña...) sinón que les empreses asturianes nun podrán sobrevivir asina nin caltener puestos de trabayu n'Asturies, viéndose obligaes a pesllar, a marchar d'Asturies o a nun xenerar puestos de trabayu dientro d'Asturies. Sobre les instalaciones quedó claro que colos nuevos platós y estudios de Gona-Argame y Olloniegu hai infraestructura abonda pa rodar n'Asturies tou tipu de películes, documentales, series de televisión, sitcoms, teatru, programes diversos d'entretenimientu, magazines, docudrames... que col magníficu escenariu natural de la tierra asturiana daría como resultáu qu'Asturies sedría la tierra ideal pa facer cine yá qu'Asturies cuenta anguañu con abondos talentos y persones preparaes pa facer d’esta tierra un llugar importante pa la industria del cine.

Al actu de clausura d'estes xornaes lliteraries asistieron abondes persones vinculaes al mundu de la llitreratura y del cine y audiovisual asturianu que tamién participaron nel debate como los directores Raimundo García, Teresa Marcos, Angeles Cachón, Jaime Fernández Miranda, José Bors, Melania Fraga, Carlos Navarro o el director del centru de formación audiovisual CISLAN de Llangréu.