Nepocianu I, rei d'Asturies (842)

Nepocianu I, rei d’Asturies

Nepocianu I reinó n’Uviéu como rei d’Asturies nel añu 842 hasta que lu destronaron pola fuerza de les armes. El so reináu duró dellos meses y d’ello nos falen les cróniques.

Alfonso II morriera ensin descendencia un 20 de marzu del 842 y Nepocianu I, comes Palatii y cognatus regis, ocupa’l tronu d’Asturies. El rei Nepocianu exerce como soberanu durante meses hasta que surden una serie de problemes pol derechu sucesoriu qu’entamen a reivindicar los derechos de Ramiru, fíu de Bermudu I. Ramiru alcuéntrase lloñe de la Corte, en Bardulia, onde pretende tomar casamientu y n’enterándose de les nueves que dicen de la proclamación del rei Nepocianu entama toa una estratexa pa destronalu y ponese él como rei d’Asturies. Entós Ramiro marcha pa Lugo cola idea de formar un exércitu allá y avanzar con él escontra Uviéu pa tomar pola fuerza la corona asturiana.

Nepocianu I pertenecía al llinaxe de Pelayu y cuntaba con apoyos pa ocupar el tronu asturianu tanto de los ñobles ástures de la Corte d’Uviéu como de los bascones yá que tenía derechu a la corona per vía matrillinial como cognatus regis o cuñáu del rei Alfonsu II. Esti derechu de sucesión per vía femenina yera’l tradicional na monarquía asturiana dende tiempos de Pelayu y el que pervivía na rexón de Primorias, onde nació’l Reinu Asturianu. Na zona oriental de Gallaecia, más romanizada, o na meseta sur, esti derechu de raigañu célticu nun esistía o nun tenía raigame y por ello los tradicionales mecanismos sucesorios de la monarquía asturiana entamen a ponese en cuestión dende estos territorios más romanizaos. Asina Ramiru quier quita-y la corona d’Asturies a Nepocianu I alegando qu’él sí ye fíu d’un rei y Nepocianu non.

Apoyáu polos lucenses Ramiru marcha con un exércitu pa Uviéu pa enfrentase a Nepocianu I y en Curniana, na ponte veya, atópase coles tropes ástures y bascones del rei Nepocianu onde tien llugar la famosa Batalla de la Ponte del Narcea. En viendo la derrota, Nepocianu I marcha pa Primorias buscando ablugu onde lu prinden los condes Escipión y Sonna. Ramiru proclámase n’Uviéu rei d’Asturies y castiga al rei Nepocianu cola pena de ceguera encerrándolu nun conventu de por vida. Inda dende la so prisión Nepocianu pudo preparar una conspiración de los condes palatinos Aldroitu y Piniolo contra Ramiru qu’ésti reprimió con crueldá. Les cróniques falen de la gran violencia qu’esistió nel reináu de Ramiru y de los fuertes castigos executaos contra delincuentes y bandíos asina como de la persecución de vieyos ritos relixosos pagano-célticos, consecuencia quiciabes d’un ambiente de refugu social hacia esti rei. Ramiro tuvo qu’enfrentase amás a les invasiones normandes dirixíes por Wittingur contra Brigantium y Xixón y saqueó la ciudá d'Isbiliya. Tamién destacó por construír el palaciu del Naranco y la ilesia de Lliñu n’Uviéu. Ramiru va camudar la norma sucesoria instaurando’l sistema patrillinial de primoxenitura masculina. Puede ser que Nepocianu I representara la cultura societaria céltica o astúrico-bascona de goviernos asamblearios y participativos mentantu que Ramiru personificaba más bien los deseos d’implantar un neo-romanismu de corte imperial, quiciabes necesariu pa los inmediatos planes bélicos y espansionistes del Reinu Asturianu.

Los cronistes oficiales posteriores empéñense llueu en dar a Nepocianu I el tratamientu de “rei usurpador” pero hai munches duldes sobre esa supuesta usurpación y lo cierto ye que Nepocianu exerció pacífica y efectivamente como rei d’Asturies durante un tiempu indetermináu con tol apoyu de la Corte ovetense y el so reináu termina pola Batalla de Curniana provocada por Ramiru. Esti conflictu d’intereses y la llucha que siguió depués orixina una serie d’entrugues inda non esclariaes dafechu. La primera ye la propia sucesión d’Alfonsu II, el rei conquistador. Nun s’entiende que nel momentu de la muerte del vieyu rei, que tendría unos ochenta años, muerte esperada polo tanto y non fortuíta, seya Nepocianu I el que s’alcuentre na Corte d’Uviéu y pol contrario, el pretendiente Ramiru tuviere en Bardulia (Castiella). Si según la historia oficial Ramiro yera’l lexítimu suceror del so primu Alfonsu nun s’entiende que tuviera ausente de la Corte asturiana nun momentu tan prioritariu si pretendía él ser candidatu a la corona. Nepocianu sí que taba presente n’Uviéu nesi momentu, señal de que yera daveres pretendiente al tronu y amás ocupando un altu cargu palatinu, prueba de que gociaba del beneplácitu del anterior rei, ostentando unes preeminencies y una influencia nel ámbitu cortesanu xunto con unes fundaes espectatives de suceder al vieyu rei Alfonsu, muertu ensin herederos directos. Hai otru datu sospechosu que ye precisamente lo que los cronistes oficiales posteriores pretenden siempre ocultar: el fechu de qu’Alfonsu II y Nepocianu I yeren parientes. El datu del so parentescu revélanoslu la Nómina Lleonesa que diz qu’Alfonsu II yera cognatus de Nepocianu I y entemetiendo a ésti nel orde sucesoriu ente Alfonsu II y Ramiru I, reconociéndo-y amás un periodu de reináu lexítimu efectivu.

Nepocianu I sedría l’esposu d’una hermana del monarca, el so cuñáu. Por ello hemos deducir que Nepocianu yera tamién un rei yá vieyu, como Alfonsu II, que nel momentu de morrer ésti tendría unos 75 años, una edá asemeyada a la de la hermana del rei. Tamién el términu “cognatus” podía interpretase como un parentescu más próximu, como sobrín per llinia femenina o como miembru del círculu familiar de la reina madre Munia. Camiéntase tamién que Nepocianu I pudiera ser esposu d’una fía d’Alfonsu II o d'una princesa real, colo que los sos derechos a la corona taríen garantizaos dafechu, según esti significáu ambigu del términu “cognatus”. Otra dulda ye qu’en morriendo Alfonsu II lo que se plantea ye daqué más qu’una simple griesca sucesoria. Paez haber un conflictu ente dos xeitos diferentes d’entender la xefatura del reinu, un conflictu ente dos normes d’aplicar la sucesión a la corona y les formes diferentes que los pueblos d’esta Corona caltienen respecto a la figura del rei. Asina, los galaicos son los qu’apoyen a Ramiru, mentantu que Nepocianu I ta apoyáu por ástures y bascones, y por tola corte ovetense. Incluso dalgunos miembros de la mesma Corte tendrán abondu enfrentamientu contra Ramiru llueu de facese ésti cola Corona. De fechu, tol reináu de Ramiru I, unos 8 años, ye una continua riestra de guerres internes. Dalgunos consideren que les rebeliones posteriores de los bascones nun yeren sinón consecuencia de los anteriores apoyos a Nepocianu I. Hai que recordar que nos territorios bascones foi onde s’ablugó tol círculu familiar de la reina madre Munia, cículu al que pertenecía’l rei Nepocianu. Un documentu del 863 fálanos del “domnus Nepotianus” y toles cróniques documenten el so enfrentamientu con Ramiru. Nepocianu tamién yera’l nome d’un emperador de Roma del sieglu IV, nome que significa “ñetu” y como talu usábase nes dinastíes pa nomar a los que yeren ñetos de reis destacaos.