Santander, memoria encesa d'una provincia
(crítica lliteraria)
Yá salió al mercáu suvencionáu pol goviernu del Principáu de les Asturies un nuevu exemplar, y yá van 27, de la revista d'historia, arte y traiciones populares nomada "Asturies". Esta vegada l'engañu vien a cuenta de la saga vampiresa de los monstros, trolls y demás familia mitolóxica que según pa onde se mire llámase "mitoloxía ovetense" si se mira pa La Coruña y "mitoloxía santanderina" si se mira pa Biarritz, anque los bichos y fades madrines en custión seyan toos fíos d'una mesma madre, anque dalgunu de los fíos d'esa familia monster tenga un güeyu más a la virulé qu'otru... de duldosa paternidá romana o celta (lo más probable igual de nenguna de les dos) o que la xana fluvial tenga'l pelu más llargu o más curtiu que pa too hai diferencies. Non en vano, la gaita ovetense ye diferente de la santanderina yá que la primera tócase marcando'l ritmu col pie manzorgu y la otra marcándolu col pie diestru, esto ye, el del PP. Esta revista nun vien a dicinos nada, yá que por fin cayó de la burra al venir a recordanos que l'anís de la santanderina sabe igual que'l de la ovetense, yá que sólo s'estremen pol so nome y etiqueta. Pero por dicir eses verdaes naide cobra nin paga dineru, nin por dexase engañar tampoco. Según esta revista les provincies d'Uviéu y de Sanander yá esistíen dende la época del dios romanu Xanu, de onde nacieron les Xanes, fíes d'esti padre toupoderosu, yá incluso dende la época de los dinosaurios esistíen estes dos provincies dixebradísimes la una de la otra. Yá dende entós ye onde se ve claramente que Negueira o Tresvisu nun pertenecíen a esta provincia d’Uviéu y que Ribedeva o Peñamellera nun pertenecíen a la provincia santanderina. Esta ye, polo menos, la tesis fundamental, la idea central, que preside toos y caún de los númberos d'esta costosa revista, idea de la que, insistente y machaconamente, nos quieren torpemente convencer cola edición d'esta publicación que sal col subtítulu de "memoria encesa d'un país". Nel país de los ciegos el tuertu ye'l rei y nun hai más ciegu que'l que nun quier ver. Esto ye polo menos lo que nos diz la sabia sabedoria popular castiellana. Nel país (más bien na provincia) de los mil etnógrafos, mil bables, mil bailles, mil quesos, mil gaites, mil tonás, mil horros y mil madreñes (toes diferentes ente sí como nun podía ser menos), nun hai un solu etnólogu que tenga la vista bien enfocada pa ver qu'Asturies ye plural porque son dos rexones o países d'una mesma nación. Nos númberos d'esta ínclita publicación, revista de la sección masculina, paez que nun hai naide que nos rellate les vicisitúes d'esta nación femenina y plural que ye Asturies. Nun hai naide que nin por asomu nos fale d'esta Asturia d'Uviéu y d'esta Asturia de Santiyana, d'estes Asturies, d'esta Asturies, que dende tiempos del buen rei Fruela II vien siendo una nación única nel sentíu más clásicu d'esta pallabra. Naide, nunca, o enxamás, son pallabres que paez que casen mui bien con esta provincia d'Uviéu, tan galana y pizpireta ella, y mentirosa como les ñaples de Pinocho; pero posmoderna y vacía de sigo mesma tamién. Sedrá ello porque quizabes el que paga manda y por ello naide quixo o pudo amosar a les clares a esta tierra, a esta Asturies d'esencia sincera y d'historia entera, a esta Asturies del suañu dormíu, esconsoñándose malpenes de los narcóticos provincialistes de la tradición de la censura, de la tradición provincialista de La Quintana, de la tradición provincial del Centru d'Estudios Asturianos, de la tradición provinciana del IDEA, de la Sección Femenina y del Grupu Etnográficu Belenos.
Algún día, Asturies, desvelaráse al mundu col rellumu de la so memoria, la memoria encesa d'una pequena nación.
Algún día, Asturies, desvelaráse al mundu col rellumu de la so memoria, la memoria encesa d'una pequena nación.
Entradas
