Presentóse n'Uviéu el llibru didácticu "Patrimonio lingüístico cántabro"

El pasáu 2 de marzu presentábase n'Uviéu el llibru tituláu "Patrimonio lingüístico cántabro" que ye un averamientu didácticu destináu a sirvir de métodu d'enseñanza y conocencia del asturianu oriental, propiu de les actuales comunidaes de Cantabria y P. d'Asturies. La presentación tuvo llugar na Biblioteca del Campu San Francisco d'Uviéu dientro los actos de la Xunta d'Escritores Asturianos 2012.

La Xunta d'Escritores Asturianos 2012 dedicó la xornada del 2 de marzu a la situación oficial del asturianu fuera les llendes alministratives de la Comunidá Autónoma del Principáu d'Asturies. Asina presentábase'l llibru de testu pal sistema educativu tituláu "Cuaderno didáctico. Apuntes generales sobre El patrimonio lingüístico cántabro" editáu pola Conseyería Cultura del Goviernu de Cantabria en collaboración con ADIC, l'Asociación pa la defensa y los intereses de Cantabria que pretende sirvir de pauta o llibru de trabayu nel sistema educativu pal enseñu de la llingua asturiana nes dos provincies, n'Asturies de Santiyana y Tresmiera y nel oriente d'Asturies d'Uviéu.

Esti nuevu llibru, pensáu como cuadernu didácticu p'alumnos y profesores de llingua asturiana consta de 7 temes con un apéndiz que reproduz un informe de José María Pereda sobre'l dialectu oriental del asturianu, amás d'una estensa bibliografía sobre la llingua asturiana y el so dialectu oriental.

Evaristo Martínez-Radío na Xunta d'Escritores Asturianos 2012: Asturies foi pionera n'usar el conceptu de ciudadanía.

Evaristo Martínez-Radío, historiador y profesor d'Historia de la UNED impartió una conferencia titulada "Ciudadanos asturianos escontra Napoleón" el pasáu 2 de marzu del 2012 dientro los actos de la Xunta d'Escritores Asturianos 2012, qu'esti añu celébrense col títulu de "Lliteratura asturiana y Oficialidá". Martínez-Radío desplicó el procesu de sublevación asturiana contra la invasión napoleónica n'Asturies y l'entamu d'una organización de resistencia armada frente al invasor llevada alantre pola Xunta Xeneral d'Asturies, onde se reguló y estableció el sistema de les "alarmes" pa defender Asturies. Nesti sentíu el profesor Martínez-Radío afirma qu'Asturies foi tamién pionera n'usar el conceptu entós novedosu de "ciudadanía" y "ciudadanu" importáu de la entós recién Revolución Francesa, p'aplicar a la governación d'Asturies y del so propiu sistema ciudadanu de defensa en tiempu de la guerra peninsular napoleónica.

Xaviel Vilareyo presentó "Les Asturies y el nacionalismu bascu" na Xunta d'Escritores Asturianos 2012.

L'escritor y etnólogu Xaviel Vilareyo presentó'l so reciente llibru tituláu "Les Asturies y el nacionalismu bascu" na Xunta d'Escritores Asturianos 2012 el pasáu 1 de marzu na Biblioteca del Campu San Francisco d'Uviéu. L'actu de presentación cuntó cola intervención de Llucía Fernández Marqués.


Les Asturies y el nacionalismu bascu ye una valiente aproximación a la imaxen que se tien de Les Asturies dende la óptica del nacionalismu bascu, ensayu que recibió una Mención Especial nel Premiu Asturies d'Ensayu 2009. Xaviel Vilareyo (Mieres del Camín, 1967) ye escritor, profesor y etnólogu, llicenciáu en Derechu, pertenez a la Tercer Xeneracion del Surdimientu y recibió en 2009 tamién el Premiu de Teatru de l'Academia de la Llingua. Anguañu prepara la so antoloxía poética "Del Eo al Asón".

Les Asturies y el nacionalismu bascu ye un ensayu sobre la historia d'Asturies, una valiente aproximación a la imaxen que se tien de Les Asturies dende la óptica del nacionalismu bascu.

Les Asturies y el nacionalismu bascu ye un valiente y novedosu análisis en perspectiva histórica de dos nacionalismos que comparten una posición cercana nel espaciu atlánticu européu. La visión que Xaviel Vilareyo quier averar al llector ye la de cómo se contempla a Les Asturies dende la güeyada d'un nacionalismu bascu que diba camudando col tiempu los sos plantegamientos y oxetivos y tamién la concepción del so ámbitu. El llibru esclaria la improtancia de la reivindicación de lo cultural en tou procesu nacional y la so aplicación al conceptu territorial de la nación como comunidá histórica entamada en múltiples factores y elementos configuradores. El llibru de xuru nun va dexar indiferente a naide y como toles propuestes del autor nun dexará de ser una intelixente provocación del pensamientu col fin de desatar y animar el debate alrodiu los procesos de construcción de países y naciones. Tamién ye una valiosa aportación más del autor a la idea de la etnoloxía asturiana que siempre reivindica.