Presentóse la revista Formientu 6 y Entrega Premios Micro-rellatos

Tuvo llugar esti martes 12 de xineru la presentación del númberu 6 de la revista Formientu dientro del programa de la Xunta d'Escritores Asturianos 2010 nel marcu del Palaciu Villa Madalena d'Uviéu. La revista, que publica la editorial La cruz de Grau, que dirixe Inaciu Galán trata de sacar a la lluz a nuevos valores de la lliteratura asturiana más moza, no que se conoz yá como la Cuarta Xeneración del Surdimientu. Nel actu de presentación que cuntó cola presencia del director de la editorial, César García, entregáronse los Premios del Concursu de Micro-rellatos de Formientu. Amás nel actu d'entrega realizóse un recital poéticu.

Dorita García escribe sobre'l procesu creativu

La escritora l.lenense Dorita García realizó un poéticu ensayu pa la Xunta d'Escritores Asturianos 2010 sobre'l so procesu creativu, les sos influencies lliteraries y la so manera de ver el fechu d'escribir. Reconoció que ser escritor más qu'un oficiu ye una manera de ser y de tar nel mundu polo que tamién reconoció tener una faceta poética que pa ella ye tamié mui querida, anque ella diose a conocer nestos años como narradora. El so proyectu futuru va ser centrase nuna novela sobre'l fechu femenín, el mundu de les muyeres y les sagues familiares, reivindicar la visión de la muyer de les coses y de lo lliterario. Dorita García nel debate reconocióse como una auténtica falante d'asturianu, anque nun sabe mui bien si la fala de L.lena ye esactamente igual al estándar, pero que si bien usa l'asturianu oralmente nun se plantega utilizalu na escritura, na so lliteratura, anque reconoz que-y presta lleer dacuando lliteratura n'asturianu.

Na so última novela titulada "Corea no es una península", l'autora inspírase nun mozu que sólo se comunica col estrerior a través d'Internet.

Xuan Carlos Crespos presenta'l so nuevu llibru de rellatos

L'escritor xixonés Xuan Carlos Crespos Lanchas presentó na Xunta d'Escritores Asturianos 2010 el so caberu trabayu en narrativa compuestu por un conxuntu de narraciones breves que cinca dellos temes diversos, ente ellos dalgunos inspiraos nos drames de la Guerra Civil. El llibru lleva por títulu "Abismos, adicciones y papeles azules”. El volume ye una coleición de cuentos d'esti escritor xixonés que cuenta con dellos premios como’l Nené Losada Rico de Poesía en 2004, L’Érase una vez…(de cuentos) en 2004, ganando dellos certamenes de cuentos como’l de Llaviana (2004,2005,2006 y 2007) el de Cangas del Nancea, o de la Fundación de Derechos Civiles (2005 y 2006).

Xuan Carlos Crespos tien espublizaos tamién dellos cuentos y poesíes en estremaes publicaciones como Lletres Asturianes, Lliteratura, , revista Ágora, Clarín, nes antoloxíes de Centropoético o Reciella Málory,.. “Abismos, adicciones y papeles azules” (Espublizastur,2009) ye'l tercer llibru de Juan Carlos Crespos, depués del poemaríu “Poemas raros (de sangre prieto)” (Trabe 2005) col que ganó'l Nené Losada y el cuentu infantil illustráu “Lías aprendiz de contador d’Histories” ( 2007).

Xaviel Vilareyo reivindica al rei Fruela II nel so XI centenariu.

Xaviel Vilareyo (Mieres del Camín, 1967) reivindicó la figura del rei asturianu Fruela II (910-925) nel 1100 aniversariu de la so proclamación como rei d'Asturies na catedral d'Uviéu. Xunto cola reina Nunilo entamen el so reináu como reis soberanos d'Asturies nel territoriu orixinariu del reinu, qu'algamaba dende la llende del ríu Eo hasta'l ríu Deba en Guipúzcua, cola famosa donación de la Caxa de les Ágates que lleva grabada en plata la Cruz de la Victoria de Pelayu. Fruela II foi un rei mui importante yá que llueu de la partición del reinu ente los trés fíos d'Alfonsu III el Grande, Fruela II quedó como soberanu del territoriu asturianu, nomando como herederu al so fíu, el futuru Alfonsu IV Froilani, rei d'Asturies, que llueu de sufrir tormentu y arrinamientu de güeyos pols so primos, morrerá presu nun conventu a les afueres de Lleón pola rebelión de los sos primos, los Ordóñez. Alfonsu IV Froilani d'Asturies, fíu de Fruela II, morrerá nesti conventu nel añu 933 convencíu de qu'él ye'l verdaderu y llexítimu rei d'Asturies.

Xaviel Vilareyo destacó la importancia de Fruela II yá que ye con esti rei cuando s'entama l'actual territorialidá d'Asturies y la so dixebra respecto a Galicia y la meseta, puesto que Fruela II ye rei del territoriu asturianu tresmontanu ente los ríos Eo y Deba. Guipúzcua nunca perteneció al Reinu d'Asturies pero lo que llueu sedría Bizcaya sí yá que la historiografía basca asina lo reconoz nel famosu mitu de la batalla d'Arrigorriaga contra l'Asturies d'Alfonsu III, mitu que ta representáu incluso na actual bandera basca. Xaviel Vilareyo espuso tamién la so teoría sobre un posible orixe o influencia asturiana na creación del reinu de Pamplona cola dinastía Ximena impuesta por Alfonsu III d'Asturies pa crear un reinu fronterizu aliáu d'Asturies tanto contra francos como frente a mususlmanes.

Helena Trexo fai un impresionante discursu sobre Nación y llingua

La escritora llangreana Helena Trexu pronunció una magnífica conferencia nel marcu de la Xunta d'Escritores Asturianos 2010 que se desarrollen nel Palaciu de Villa Madalena d'Uviéu. Nel ensayu fizo un interesante análisis del conceptu de nación y de los fenómenos llingüísticos arreyaos al mesmu comparando el casu asturianu con otres naciones del mundu dientro de los fenómenos de lluches identitaries. Asina, dende la Edá Media, el conceptu de nación yá ta presente n'Europa a través de les Universidaes principales d'Europa yá qu'éstes dende bien temprano solíen separtar a los estudiantes por grupos nacionales. Depués de repasar nacionaes culturales como la kurda, l'autora nun escaeció los grupos indíxenes d'América onde en delles constituciones, como por exemplu la boliviana se-yos reconoz l'estatutu de nación a aquellos grupos indíxenes que, seyan grupos grandes o pequeños, tengan una llingua propia y diferenciada.

Pablo Martínez Testa repasó la historia pa desplicar el desaniciu llingüísticu

Pablo Martínez Testa (Madrid, 1989) fizo un repasu a tola historia d'Asturies dende la conquista romana pa desplicar les causes del desaniciu llingüísticu y l'amenorgamientu de lo asturianu como parte d'una política d'afirmación hespañola a fuerza de desaniciar les cultures como l'asturiana que nun se consideren representatives de "lo hespañol". Nesti sentíu apunta qu'hai que recuperar la historia pa que'l desaiciu se convierta nuna historia de la recuperación d'Asturies que vaya al empar d'una recuperación llingüística, superando la diglosia ruralizante que se quier imponer na mente del pueblu.

Pablo Martínez Testa anguañu vive n'Alcalá d'Henares onde estudia Hestoria na Universidá d'esta ciudá , magar que cursó tamién estudios na Universidá d'Uviéu. Ye autor de dellos ensayos y artículos periodísticos, tanto en castiellán como n'asturianu. D'éstos han de destacase: “Como llingua de ma”, “Entrar al Trapu” o “La dixebra dafechu, la independencia de manera definitiva”. Ye autor tamién de la obra de teatru “El Banco” que s'espublizó nel cartafueyu "Hilo Negro" en 2007. Foi profesor de llingua asturiana nel CSOA La Reflexón de Xixón. Agora mesmo anda trabayando nel so primer llibru de poesíes, ésti dafechu en castiellán, nomáu “Heridas y Cicatrices” y na torna al asturianu del llibru de Jim Harrison “Lleendes de Pasión”.