Los primeros monasterios fundaos nel valle del Deva son del sieglu VIII como Turienu, Cosgaya y Llebeña, durante’l reináu de los primeros monarques asturianos. Yeren esplotaciones agraries, una repoblación monástica o colonización interna del Reinu d’Asturies, con dominios cada vez más grandes poles donaciones y qu’amás d’atender a pelegrinos agospiaben viaxeros y cumplíen la función política de cristianizar y llatinizar a una población inda pagano. Col tiempu estos monasterios crearán grandes dominios col apoyu de los reis asturianos. Alfonsu I d’Asturies (739-757) repuebla Llébana y Tresmiera. El primer documentu conserváu sobre un monasteriu en Llebeña ye del 779, reinando Silo, pol que sabemos que se donen bienes al monasteriu de San Salvador de Flevenia. La ilesia d’esti monasteriu tenía varies advocaciones, una d’elles la de Santa María, nomándose asina nun documentu del 796, nel reináu d’Alfonsu II. La ilesia de Santa María sustituye asina al antigu monasteriu antes consagráu a San Salvador. Alfonsu III d’Asturies (866-910) fortifica la llinia del Dueru y la fastera oriental alabesa con castiellos y fai por traer al reinu a cristianos sureños pa repoblar tierres anque siempre col recelu de que traxeren herexíes. Munchos d’estos pobladores yeren monxes que funden monasterios col apoyu real. Llébana yera una provincia o condáu en que taba repartíu alministrativamente’l Reinu d’Asturies. Nel reináu de Fruela II d’Asturies (910-925), los condes del reinu asturianu Alfonsu y Xusta, que governaben La Llébana en nome del rei, teníen una casa cerca del monasteriu de Santu Toribiu y propiedaes en Llebeña. Nel añu 925 estos condes donen a la ilesia de Llebeña tierres nesti pueblu y notru documentu donen a Santu Toribiu too cuanto teníen nesa villa. La ilesia va vinculase llueu a esti importante monasteriu.
Nun sabemos la fecha de fundación del monasteriu, pero sí que nel añu 796, nel reináu d’Alfonsu II, la ilesia yá esistía baxo advocacion de Santa María. El so orixe hai que consideralu como un antigu llugar de cultu celta cristianizáu, debío a l’abundancia de cruces esvástiques presentes na decoración, alusives al cultu solar, y na presencia d’un texu milenariu, árbol sagráu de los antiguos asturcántabros. La tradición diz que nun principiu construyóse la ilesia de Llebeña como capiella funeraria de Santu Toribiu. En 1735 constrúyese un pórticu lateral d’entrada, siendo ilesia parroquial, pórticu enteilesia onde los vecinos solíen facer Conceyos Abiertos según vezu antigu. Llebeña pertenez al conceyu de Castru Cillórigu.
La so planta, traces y decoración ye típica de l’arquitectura del arte pre-románicu asturianu o de la monarquía asturiana. Los arcos trunfales de los ábsides son de mediu puntu peraltaos y retallaos. Les moldures que separten fustes de capiteles són siempre de sogueáu, típicu elementu del estilu pre-románicu asturianu. Elemenu peculiar de Llebeña son los sos característicos modillones que sofiten los aleros, precedente de los caneciellos románicos. Éstos tienen forma de lóbulos con esvástiques o ruedes solares de claru orixen celta. La esvástica más repetida ye la destróxira de 6 radios con una flor de 6 pétalos nel centru, claru exemplu de la cristianización de la esvástica celta. Pieza especial d’esta ilesia ye la estela o canciella, que al igual de la esistente en Santa Cristina de L.lena, ilesia cola que tien abondu paecíu, separtaba’l coru del espaciu públicu de la nave a modu d’iconostasiu y qu’anguañu pue vese presidiendo l’altar. Esta llosa o canciella ta decorada tamién con esvástiques y símbolos paganos o indíxenes, afondando na idea de que yera un santuariu celta. El texu llantáu frente a la ilesia, como ocurre en munchos otros templos antiguos d’Asturies, data de principios del sieglu X, siendo probable que se llantara’l texu al empar que’l templu, como en Casar de Periedu y perdayures n’Asturies. El motivu central de la canciella de Llebeña ye una gran esvástica o hélice solar de 16 radios con un botón central frecuente nos relieves pre-románicos que simboliza la sangre de Cristu, en pareyo cola cruz xemmada, motivu tradicional del arte paleocristianu. L’atribución de la esvástica solar a Cristu ye evidente yá que ye’l sol de xusticia, asimilación pol cristianismu del cultu celta al sol.
Otres pervalioses ilesies que tamién pertenecen al periodu del pre-románicu asturianu son les de San Román de Morosu, Santa Leocadia de Felguera y San Andrés de Llébana. La función d’estos monasterios o fundaciones yera relixosa pero mui especialmente política, tando apoyaos directa y especialmente polos reis asturianos na so política de cristianizar una población inda bastante pagano y con ello axuntar a la misión relixosa un afitamientu del poder estatal asturianu. Ye por ello que falamos d’un arte de la repoblación más que d’un arte anterior al románicu o pre-románicu, conceptu ésti que s’alcuentra bastante custionáu. Nun cabe dulda que l’arte de la monarquía asturiana o arte cristianoasturianu ye un modelu artísticu únicu, arquetípicu y peculiar, non comparable a otros, pero tamién qu’esti mesmu arte específicu tuvo nun cabe dulda influencies d’artes anteriores como los de la tradición visigoda, carolinxa ya incluso céltica. Manifestaciones del primitivu arte cristianu como por exemplu los eremitorios rupestres d’Asturies de Santiyana como San Xuan de la Cueva o la Cueva Santa de Santu Toribiu, són perfectamente esplicables a partir d’un sustratu artísticu dafecho asturianu siendo les sos soluciones constructives deldores d’esti arte. Otros investigadores como Camón Aznar afirmen con propiedá qu’incluso l’arte cristianoasturianu sedría el que determinó dalgunes de les novedaes del arte califal del sieglu X y non al revés. Sedría asina l’arte asturianu (y el visigodu cabría tamién camentar) los qu’influyeron nel arte califal hispanu. Too apunta a desmontar la vieya y falsa idea de que por exemplu los arcos de ferradura son una creación arábigo-califal cuando en realidá yá esistíen anteriormente nel arte visigóticu y yá se dan tempranamente nel arte asturianu del sieglu X como en Llebeña o en San Miguel de la Escalada. Quier dicise que tanto los arcos peraltaos como los de ferradura nes sos distintes variantes són los dos propios del arte cristianoasturianu o pre-románicu. Los arcos de ferradura respuenden a la tradición visigoda y repítense nestos monumentos asturianos. La tendencia a elevar y realzar los cruceros pertenez a la más pura tradición asturiana, en pareyo cola arquitectura normanda inglesa, asina como les composiciones y proporciones volumétriques de Santa María de Llebeña que tamién són típicamente asturianes. Hai que remembrar que l’arquitectura cristianoasturiana perduró durante tol sieglu X yá incluso siguió usándose nel sieglu XI. Munches de les ilesies cristianoasturianes desapaecieron en posteriores reformes como la de Compostela, onde sólo queden nicios nel subsuelu, o les de Sanander y Santiyana onde inda se pueden reconocer restos de basamentos típicamente asturianos.
La ilesia de Santa María de Llebeña ye un exemplu perclaru del arte pre-románicu asturianu o cristianoasturianu. La propia planimetría del testeru de trés capielles del ábside, siendo más fonda la central. Tamién ta presente l’arcu peraltáu qu’abre la capiella central y les bóvedes de cañón como cubierta. Les dos pequenes capielles contraabsidales que protexen la nave central a los pies del templu ye tamién títpica de los monumentos asturianos, sirviendo de sacristía o d’ayalguería. La so planta rectangular tiende a remarcar un espaciu central, destináu quiciabes a la persona del rei o de ceremonies reales, o bien como llugar afayadizu pa un sepulcru principal. L’usu de pilares compuestos como sofitu de los arcos vese tamién en San Cebrián de Mazote, ilesia asturiana de finales del sieglu IX. La puerta d’accesu orixinal o estragal taba nun principiu na fachada sur, mirando pal altar, camudándose pa un llau nuna reforma posterior, pero inda queden nicios d’esta primitiva puerta. El mesmu sistema de bóvedes de Llebeña apaez na ilesia de San Miguel de Lliñu y en Santa María de Bamba otra ilesia de comienzos del sieglu X que nun entamu proyectóse y edificóse nel estilu cristianoasturianu. La lápida o cancel d’iconostasiu cola esvástica hai que datala na mesma época del monarca asturianu Fruela II, durante la que s’edificó y non como restu de la etapa cántabra o pagana como vulgarmente se cree. Anque ye cierto que’l cristianismu adoptó símbolos paganos cristianizándolos pa facilitar asina les conversiones del pueblu.
Nun ye xusto escaecer tampoco a la ilesia de San Román de Morosu como amuesa d’esti arte cristianoasturianu. Fecha nel sieglu X ye d’una sola nave rectangular, más cenciella que Llebeña pero non menos impresionante, separtada del ábside cuadráu por un arcu trunfal. Tien bóveda de cañón con cubierta de madera a dos agües con modillones típicos. Como decoración en piedra presenta una cruz alfonsina llabrada de brazos iguales. La espadaña ye un amestáu del sieglu XVIII. Nun principiu foi un conventu.
Santa Leocadia de F.elguera, fecha nel sieglu X, ye una especie de réplica popular de Morosu, tamién con bóveda de cañón peraltáu.
San Fructuosu de la Miña sólo caltién restos pre-románicos asturianos en dos columnes con capiteles que són idéntiques a les del arte asturianu. Nel sieglu X yá hai menciones a esti antigu monasteriu. Tamién consérvase una pila bautismal o d’agua bendita de la so época fundacional con elementos decorativos típicos del arte cristianoasturianu qu’ayudaron a datala nel sieglu X.
El capitel de Las Presillas, conserváu nel Muséu Rexonal de Sanander, presenta un estilu inequívocamente asturianu, cola típica decoración de palmetes esquematizaes. Provién de la ilesia de Las Presillas. Esti afayu, como tantos, vien a demostrar que l’arte pre-románicu asturianu, o meyor dicho, l’arte cristianoasturianu de la monarquía asturiana, foi un estilu artísticu que dominó nos sieglos VIII al XI en tolos anchos dominios del vieyu Reinu d’Asturies, y qu’afortunadamente pervivió cuasi intactu nel vieyu territoriu de Les Asturies.
Entradas
