La UNA nun asiste al I Conceyu pola Xuntanza del asturianismu

La coalición provincialista asturiana UNA decidió nun asistir al I Conceyu pola Xuntanza d'organizaciones polítiques y sociales entamáu pol partíu políticu asturianu Andecha Astur. Mientres trés hores persones d'estremaes sensibilidaes y organizaciones aldericaron sobre la necesidá de llegar a puntos d’alcuentru, ensin prises nin pasos falsos. Na primer parte del conceyu, a mou d'introducción, dellos representantes d’Andecha Astur desplicaron la esperiencia política y el modelu organizativu de Nafarroa Bai y de les CUP catalanes. A continuación un militante del BNG fizo una esposición asemeyada sobre la trayeutoria de la so formación política. Dempues de les presentaciones xenerales de modelos que se vienen dando fuera d'Asturies entamó l'intercambiu d'opiniones ente los presentes.Nel alderique, el profesor David Rivas consideró que’l modelu de les CUP nun yera estrapolable a la realidá asturiana, tan diferente de la catalana, y que una Xuntanza Patriótica podría estructurarse nun entamu siguiendo el modelu de Nafarroa Bai como un primer pasu pa dir posteriormente hacia una especie de “BNG” asturianu. Inaciu Galán, militante de la Xuventú Asturianista, tamién fizo una esposición sobre'l funcionamientu de la coalición 'Unión Asturianista (URAS-PAS)'. Dellos militantes de Fai! manifestaron qu’ellos entendíen que’l proyeutu debería tener una identidá nimiamente d’izquierdes. Javier Cubero pela so parte opinó que nun se daben les condiciones históriques afayadices pa plantegar una “política de clase contra clase” nel sentíu clásicu y que dau'l fuerte retrocesu esistente no que cinca a les llibertaes democrátiques y los derechos sociales podría ser interesante la formación d’una especie de “Frente Nacional-Democráticu” que combinara reivindicaciones nacionales y sociales nun programa concretu que pudiera ser aceptáu por persones de estremaes tradiciones ideolóxiques. El representante de Los Verdes d'Asturies valoró mui positivamente la dinámica d’alderique publicu que se pretende articular. Delles persones coincidieron en señalar que nun fai falta que tolos axentes participantes de la xuntanza deseada tuvieran una esplicita y rotunda definición ideolóxica como nacionalista asturiana siempres y cuando reconozan a Asturies como una sociedá con dinámiques especifiques que necesita de soluciones non menos especifiques. El artista Anxel Nava consideró que’l proyeutu xunitariu debería dotase d’una dimensión cultural y societaria nun reduciéndose únicamente a les organizaciones polítiques. Nel conceyu tamién tovieron representantes del Bloque por Asturies anque nun participaron nel alderique. Por último, un representante del Partíu Asturianista señaló lo murnio que ye enfrentase por custiones de política estatal que nun somos ni siquiera a condicionar, pues la realidá ye que’l nacionalismu asturianu por nun condicionar nun condiciona nin la axenda política d’Asturies. Les persones presentes nel Conceyu Abiertu coincidieron en valorar positivamente l'actu, tanto pol grau de participación como pola pluralidá del foru, viendo la necesidá de siguir una dinámica de diálogu y alderique.