La Xunta d'Escritores Asturianos reivindicará la figura del rei Fruela II d'Asturies nel 1100 aniversariu de la so proclamación n'Uviéu como rei d'Asturies. Asina se fairá a través d'una comunicación de Xaviel Vilareyo que col títulu de Crónica del rei Fruela II d'Asturies (910-925) quier recordar la figura d'esti monarca asturianu que foi tan importante pa determinar l'actual territorialidá asturiana que se caltuvo cuasi inalterada hasta l'añu 1835 cuando entraron en vigor les actuales demarcaciones provinciales hespañoles d'Uviéu, Lugo, Lleón, Santander y Bizcaya.
En morriendo Alfonsu III el Grande, el reinu repártese amistosamente ente los fíos d'ésti, pautandose accesiones de los mesmos en casu de muerte de dalgún de los hermanos. Al príncipe Fruela correpuénde-y el territoriu de l'Asturies primixenia, la que va del ríu Eo hasta Guipúzcua (ríu Deba), lo que foi el primer Reinu d'Asturies na época d'Alfonsu I y Alfonsu II, quedando Galicia y la meseta pa los sos hermanos mayores. En morriendo éstos, ye Fruela II d'Asturies el que en 924 vuelve a ser rei de tolos territorios asturianos heredaos de so padre, dende Portu hasta Bizcaya. La dinastía de Fruela II había continuar llexítimamente na tiesta del so fíu Alfonsu IV Froilani, pero sucesives guerres civiles colos sos primos pola primacía acabaron cola dinastía froilana, que supunxo la derrota y partición d'Asturies y la so posterior dependencia de los reinos lleonés y castiellanu. Les modernes fronteres territoriales d'Asturies són les marcaes pola partición del añu 910, esto ye, les pertenecientes al reinu de Fruela II d'Asturies, cuyos restos mortales reposen güei na Catedral d'Uviéu.
Fruela II foi un rei mui estimáu na so época y entama'l so reináu cola famosa donación a la catedral d'Uviéu de la pervaliosa Caxa de les Ágates, que lleva grabada en plata la Cruz de Pelayu, ufiertada por él y pola reina Nunilo como símbolu de maxestá y de predilección pol territoriu asturianu, el territoriu orixinariu y primixeniu del reinu. Los territorios nos que gobernó Fruela II y el so fíu Alfonsu IV correspuéndense colos territorios d'Asturies al que pertenecíen el territoriu d'Autrigonia (Bardulia) y Bizcaya anque esti corónimu ye posterior. Bardulia y Bizcaya posteriormente pasaríen a depender en sucesives ocasiones, de los reinos de Navarra y llueu de Castiella.
La Xunta d’Escritores Asturianos 2010 falará del nacionalismu asturianu y de les relaciones ente la lliteratura, la identidá y la nación nel casu asturianu. La relación ente nación y lliteratura ye un vieyu tema presente en tola historiografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial. Esta nueva edición del 2010 tendrá llugar n'Uviéu los díes 11, 12 y 13 de xineru. Les actividaes tán destinaes tanto a escritores como al públicu en xeneral yá que l’asistencia ye gratuíta y consisten nun ciclu de conferencies, debates, alderiques, presentaciones de llibros, amás tolos asistentes recibirán como regalu reproducciones de mapes históricos d’Asturies. Nesta edición el lema de les xornaes falará de cómo los aspectos identitarios afecten al fechu d'escribir nuna llingua minorizada y non oficial como l'asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. La Xunta d’Escritores Asturianos tendrá llugar n’Uviéu nel palaciu de Villa Madalena, situáu nel antigu Paséu de la Siella del Rei. Na Xunta presentaráse'l Llibru d'Actes del anterior aconceyamientu que lleva por títulu "Lliteratura asturiana y compromisu", a cargu d’Esther Prieto. El programa cuntará amás con conferencies y presentaciones de Javier Cubero, Xaviel Vilareyo, Daniel Cueli, Pablo Martínez, Helena Trexu, Xuan Carlos Crespos, Dorita García, Inaciu Galán, Laura Marcos, Benxa Pérez, César García, Llucía Fernández y Marcos Abel Fernández. Esta edición del 2010 quier recordar tamién los centenarios de Fruela II y del arquitectu asturianu Miguel de la Guardia.
LLUNES 11 XINERU:
- 17h. Presentación del llibru Lliteratura asturiana y compromisu, actes de la Xunta d’Escritores Asturianos 2008. Presenta: Esther Prieto.- 17,30h. Llingües, clases y nacionalismos. Javier Cubero.- 18,30h. L’idioma asturianu na Asturias de Santiyana. Xaviel Vilareyo.- 19,30h. Presentación de los númberos 4 y 5 de la revista N’AST. Daniel Cueli.- 20,30h. Centenariu de Miguel de la Guardia (Hontaneda 1859 – Uviéu 1910), arquitectu de Villa Madalena.
MARTES 12 XINERU:
- 17h. De cómo una llingua s’enfrenta a la muerte. Pablo Martínez Testa.- 17,30h. Nación y llingua. Helena Trexu.- 18h. Presentación del llibru Abismos, adicciones y papeles azules, de Xuan Carlos Crespos.- 18,30h. Crónica del rei Fruela II d’Asturies (910-925) Xaviel Vilareyo.- 19h. El procesu creativu. Dorita García. Presentación de la so obra narrativa.- 19,30h. Presentación del númb. 6 de la revista Formientu.Inaciu Galán, Laura Marcos, Benxa Pérez y César García.- 20h. Recital de nueva poesía asturiana.
MIÉRCOLES 13 XINERU:
- 17h. Presentación del númberu 72 de la revista LA SIDRA. Llucía Fernández Marqués.- 17,30. La lliteratura dialectal de los escritores de Santiyana. Xaviel Vilareyo.- 18,30. El periodismu nuna llingua minorizada. Inaciu Galán.- 19,30. Antoloxía poética de la Xeneración del Compromisu (1967-1982)- 20h. Presentación del llibru Historia del Cine Asturianu, de Xaviel Vilareyo.Presenta: Marcos Abel Fernández.
ENTRADA LLIBRE: Tolos asistentes recibirán como regalu mapes históricos d’Asturies.
Entradas
