La Xunta d’Escritores Asturianos 2010 falará de les relaciones ente la lliteratura, la identidá y la nación nel casu asturianu. La relación ente nación y lliteratura ye un vieyu tema presente en tola historiografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial. La participación na Xunta d’Escritores Asturianos ta abierta activamente a toos y por ello acaba facese público una convocatoria abierta pa intervenir nuna nueva edición del 2010 que tendrá llugar n'Uviéu los díes 11, 12 y 13 de xineru. La convocatoria pública pa participar nesta Xunta ta dirixida a tolos y toles escritores en llingua asturiana de cualaquier estaya interesaos en participar y aportar les sos idees mediante un ciclu de conferencies, debates, alderiques, presentaciones de llibros y otres actividaes culturales alrodiu del fechu d'escribir n'asturianu. Nesta edición el lema de les xornaes falará de cómo los aspectos identitarios afecten al fechu d'escribir nuna llingua minorizada y non oficial como l'asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. El plazu pa mandar trabayos y propuestes fina’l 15 d’avientu. La Xunta tendrá llugar n’Uviéu nel palaciu de Villa Madalena, situáu nel antigu Paséu de la Siella del Rei. Na Xunta presentaráse'l Llibru d'Actes del anterior aconceyamientu que lleva por títulu "LLiteratura asturiana y compromisu". El coordinador d'esta edición ye l'escritor mierense Xaviel Vilareyo. Los animaos a participar nesta Xunta d'Escritores Asturianos 2010 pueden facelo comunicando les sos propuestes pela seña electrónica xuntadescritores@wanadoo.es
Entradas
