domingo, 19 de julio de 2009

El Reinu d'Asturies







En cayendo l’imperiu romanu los ástures atopáronse con una inesperada y recobrada independencia. Asturia yá quedó desvinculada de la península hespañola durante los últimos sieglos del imperiu romanu. La escasa romanización de los asturcántabros orixinó una resistencia hacia Roma que dio llugar a una insumisión nel baxu imperiu. Nin suevos nin godos pudieron dominar el territoriu asturiense, onde los asturcántabros tresmontanos caltuvieron la so organización política xentilicia y la so vida nos castros, llegando a lluchar contra los godos na dómina de Witericu y Sisebutu nel sieglu VII. Tampoco la invasión musulmana afectó a Asturia. La monarquía cordobesa foi la continuadora de la Hispania visigoda. La historia de los ástures ye una continua riestra de lluches contra los pueblos del sur yá fueren éstos vacceos, romanos, visigodos o musulmanes. Polo tanto ye improcedente falar de “reconquista” sinón de lluches históriques de los tresmontanos contra tolos pueblos hispanos del sur. Na zona tresmonata el procesu de mestura ente ástures y cántabros foi imparable. La presencia musulmana yera un pequenu destacamentu en Xixón dende 713 a cargu de Munuza que duró cinco años. Pelayo yera un xefe influyente en Xixón anque la tradición supónlu orixinariu de Primorias, con raigañu n’Asturia antes del 711, probable miembru xunto cola so familia de la clase governante del territoriu nesta dómina.. Munuza manda a Pelayu pa Córdoba con una comisión relacionada col pagu de los tributos de los ástures, preba de que Pelayu yá yera una persona importante n’Asturia. Munuza aprovecha l’ausencia de Pelayu pa casar cola hermana d’ésti, xestu interpretáu como intentu de suplantación de poder. La rebelión de Pelayu contra Munuza ye nel 718 col fin d’espulsar a un cada vez más molestu mandatariu estranxeru consideráu intrusu. La importancia de Pelayu como líder ye que supo facer de la so causa una casua colectiva de tou un pueblu. El protagonismu de la rebelión foi de los ástures. Pelayu asistió a un Conceyu xeneral de los ástures desplicando los sos planes y ablugóse en Primorias onde mandó llegar les sos órdenes a tolos xefes ástures que se xuntaron nel añu 718 pa elexilu como’l Príncipe de los ástures, nome usual pa referise a los monarques nel sieglu VIII. La sublevación consistía en dexar de pagar los impuestos, la insumisión al nuevu delegáu cordobés, preba de que Pelayu pertenecía yá a la clase dirixente. Pero lo cierto ye que si Pelayu quería ser rei nun bastaba cola elección polos xefes ástures, sinón que tenía que ser rei d’Asturia gracies a les sos victories. La independencia d’Asturia nun foi un procesu d’autodeterminación pacífica sinón de lluches. La victoria llegó nel 722 cola Batalla de Cuadonga, portando la so Cruz de carbayu, que sí foi importante polo menos nel aspectu simbólicu y propagandísticu. Y foi importante porque consagró a Pelayu como rei y como líder indiscutible de los ástures. Cola derrota los musulmanes abandonen Xixón y desapaez la presencia musulmana n’Asturia. Pelayu establez una Corte non na ciudá de Xixón, sinón en Cangues, nel centru de tol territoriu asturcántabru precisamente pola so posición central.
Pelayu muerre nel 737 dexando’l poder al so fíu Favila dexando claro que la nueva monarquía asturiana díba ser hereditaria a la manera imperial romana y non electiva como la goda o xermánica. Nel so reináu sólo conocemos la construcción de la Basílica de la Santa Cruz sobre un antigu dólmen fecha pa venerar la Cruz de la Victoria, símbolu del nuevu reinu, noticia avalada por una inscripción que ye’l documentu más antigu del reinu asturianu.


La muerte de Favila por un osu permite l’accesu al cetru del poder del so cuñáu Alfonsu I, casáu con Ermesinda, fía de Pelayu. Alfonsu pertenecía a la élite de los cántabros polo que la yá vieya xuntura ente ástures y cántabros a partir d’agora va ser total. Alfonsu I el Conquistador va consolidar tou un reinu con nueves victories: de Coruña a Amaya, de Portu a Osma, de Braga a Oca, espulsando a los moros y llevando a los cristianos a Asturia nuna política de despoblar el valle del Dueru como cinchu de seguranza. El reinu d’Asturia algama unos 30.000 km2 dende Coruña hasta’l ríu Deba y Álava ( Guipuzcua nunca perteneció al reinu asturianu). Fruela I sucede a so padre nel 757. Funda monasterios como San Miguel de Pedrosu. Somete revueltes de galaicos y bascones. Consecuencia de la victoria sobre éstos ye’l so casamientu cola alavesa Munia, contribuyendo a reforzar los vínculos con esti territoriu periféricu.


Aurelio, Silo, Mauregatu y Bermudu I caltuvieron la paz con Spania. Pagaron a los cordobeses pa que nun atacaren el reinu asturianu. El mitu del tributu de les Cien Doncielles sábese que ye falsu dafechu. La paz ente Asturia y Spania ye consecuencia de la impotencia o cansanciu de los dos estaos.

El reináu de Mauregatu revela un gran rellumu cultural. Entama espardese la idea de que l’apostol Santyagu predicó n’Hispania. Nun poema dirixíu al rei Mauregatu apaez per primer vez la mención a Santiagu como patronu. Nel 786 Beatu de Llébana, conseyeru del rei, publica los sos Comentarios al Apocalipsis y un añu antes escribió l’Apoloxéticu, dando la razón a la Ilesia d’Uviéu na so llucha contra la de Toledo pola herexía adopcionista, lo que permitió a la Ilesia asturiana independizase de la toledana y convertise en primada del reinu. Alfonsu II ta unxíu col aceite sagráu un 14 de setiembre de 791. Lleva la corte a Uviéu convirtiéndola nuna ciudá real. Vuelve a la política de conquistes tomando Lutos o Lisboa y anuncia una xenial idea que va dar fama europea al reinu d’Asturia: el milagrosu descubrimientu nel so territoriu de la tumba de Santyagu apostol, entamando él mesmu un camín de pelegrinos que dibuxa una bayurosa ruta comercial per Asturia. Alfonsu II muerre ensin fíos y el so cuñáu Nepocianu I ye rei d’Asturia. Ramiro I quita-y la corona pola fuerza les armes, sucediéndolu Ordoñu I. Al final del reináu d’Alfonsu III surde la idea política del neogoticismu pa xustiticar la política imperialista del reinu atacando territorios más al sur del Dueru que nunca pertenecieron a los ástures, pretendiendo asina lexitimar una conquista espansiva. El reinu d’Asturia nun podía reclamar los antiguos dominios visigodos y por ello invéntase tola teoría de la supuesta “reconquista” que nunca esistió.
Nel 910 repártese’l reinu siendo Fruela II rei d’Asturies, del Eo al Deba en Basconia hasta’l 925 cuando lu sucede nel tronu d’Asturies el so fíu Alfonsu IV Froilaz que pretende caltener la independencia de l’Asturies tresmontana frente a Lleón. La guerra dinástica ente Asturies y Lleón termina cola derrota d’Alfonsu IV Froilaz y cola d’Asturies entera: les Asturies pártense en dos cachos, una pasa a depender de Lleón y la otra pasa pal ámbitu políticu del condáu de Castiella. L’Asturia de Santiyana y la d’Uviéu. La Ilesia d’Uviéu conservará la capitalidá eclesial de toles Asturies hasta’l sieglu XII y nun la va recuperar hasta 1954, añu nel que pierde los territorios de Benavente y Fonsagrada-Burón.