Xaviel Vilareyo reivindica la sidra asturiana d'Asturies de Santiyana afirmando que como territoriu históricu asturianu la sidra producida nesta tierra tien lexítimamente derechu a usar la denominación d'orixe protexida o marca "sidra natural asturiana" igual que'l restu de los territorios asturianos. Por ello falamos con Xaviel Vilareyo, autor del llibru "Los ámbitos de la Nación Asturiana", sobre esti tema.
- Cuando falamos de "sidra asturiana" ¿tamos refiriéndonos a la sidra producida dientro del territoriu de la provincia d'Uviéu?
Evidentemente non. Asturies, como’ l so propiu nome indica, són dos territorios históricos que comparten una mesma cultura, llingua y tradiciones. Esos territorios són Asturies d’Uviéu y Asturies de Santiyana. La recién historia configuróles como dos territorios alministrativos estremaos pero la so milenaria historia configuróles tamién como dos territorios que formen una sola nación cultural que comparten una sola esencia, tradición y cultura propia. La Llébana ye tamién otru territoriu históricu asturianu, mencionáu yá nos documentos del Reinu d’Asturies que se configuró tamién como una entidá alministrativa propia vinculada siempre a Asturies y en conctretu dende 1779 vincúlase formalmente a Asturies de Santiyana enviando un representante a la Casa de Xuntes d’Asturies de Santiyana allugada en Bárcena de la Puente, primer orixe de lo que depués sedría la provincia de Santander. Tradicionalmente fueron surdiendo otros nomes plurales como ls Asturies de Sancto Anderio, les de Tresmiera o de Castiellu, pero toles Asturies referíense siempre como una dualidá: la d’Uviéu y la de Santiyana.
Asturies de Santiyana ye un territoriu históricu qu'ocupa la tierra comprendida ente los ríos Deva y Miera, conocida tamién como merindá y documentada dende'l sieglu XI. Comprende más de la metá occidental de l’anterior provincia de Santander, sacantes Llébana que se constituyía notra comarca. La sidra de Llébana por supuestu que tamién ye sidra asturiana. Llébana ye la más asturiana de les tierres. Hai que recordar qu'en Llébana nació Asturies.
- ¿Cuálu ye l'orixe de la sidra nestes Asturies?
L'orixe de la sidra nestes Asturies ye mui antigu. Dende la Edá Mediana tán documentaes les pumaraes nos inventarios de los conventos o nel pagu d'impuestos. En fueros como los de Santiyana o Sanander tamién se menciona a la sidra. Nel sieglu XVIII había abondes pumaraes y la producción yera básicamente de tipu particular. El puertu de Sanander esportaba sidra y a fines del XVIII surden dos fábriques de sidra que van remanecer per bona parte del sieglu XIX. Ye nel sieglu XX cuando la cultura sidrera n'Asturies de Santiyana entama decayer.
- ¿Cuála ye la situación anguañu?
La sidra n'Asturies de Santiyana vien esperimentando un constante desenrollu a partir del añu 2000 cuando entama a profesionalizase la producción gracies en parte a la creación de la Cofradía de la Sidra y cuando entamen importantes Festivales de la Sidra lo que consigue sacar la producción de los ambientes familiares pa da-y un mayor nivel profesional, cualitativa y cuantitativamente.
- ¿Cuálu ye'l futuru de la sidra n'Asturies de Santiyana?
Pues en realidá el tiempu lu dirá si esa industria medra o si torna decayer como nel pasáu, nun lu sabemos. El futuru pasa por entamar sobre bones bases, esto ye, curiando les pumaraes, la materia prima en primer llugar, llogrando apoyos públicos pa meyorar la calidá, los controles, facilitando la distribución, venta y consumu internu, afondando na profesionalización del sector. Y por supuesto el futuru pasa por incluyir la sidra d'Asturies de Santiyana y Llébana dientro de la denominación d'orixe protexida "sidra asturiana" yá que són territorios tan asturianos como los d'Asturies d'Uviéu, lo que facilitaría la exportación y poder competir con igualdá de tratu cola sidra d'Asturies d'Uviéu qu'anguañu ye la que produz en mayor cantidá y calidá. Pero pasucu a pasucu la sidra d'Asturies de Santiyana tamién va meyorando nestos aspectos y hai que dir más llueñe. El futuru pue tar aseguráu yá que tán dándose pasos perimportantes como que la sidra yá ta presente masivamente nos nomaos Festivales de Prau y otres romeríes y festivales folc y la mocedá nesti territoriu yá entama valorar y apreciar la sidra. Pero entavía hai muncha xera por f.acer.
- ¿Podemos dicir polo tanto qu'Asturies de Santiyana ye Asturies?
Sí, el fechu de que dependiera alministrativamente del Reinu de Castiella nun quier dicir que seya nacionalmente "Castiella" yá qu'esti reinu foi una construcción artificial con munchos cambios de fronteres y non "nacional" y "cultural" como sí foi el procesu nacional d'Asturies. "Castiella" yera sólo un centru mui concretu del norte de Burgos (Autrigonia) lo demás fueron anexiones y conquistes. Asturies ye un corónimu, esto ye, el nome históricu d’una tierra. Asturies ye’l nome d’un territoriu mui bien desllendáu y afitáu polo menos dende l’añu 910 con Fruela II. Asturies ye una de les naciones y ún de los territorios históricos más antiguos d’Europa. Reivindicar los territorios asturianos anteriores al añu 910 ye posible, claro que sí, pero en Derechu había que reivindicalos toos pa ser lexítimu. Asturies tien esactamente los mesmos derechos pa reivindicar Babia como Benavente, Viséu, Compostela, Toru, Braganza, Tui, Álaba o Cillórigu, esto ye, los territorios del Reinu d’Asturies anteriores al 910. Pero a partir d’esti añu surdieron otros reinos colos qu’incluso Asturies entró en conflictu y dende 910 surdieron otres supuestes nueves y pretendíes lexitimidaes territoriales que reduxeron posteriormente a Asturies al territoriu ente los ríos Eo y Asón y llueu Eo y Miera y a la dixebra d’agües pal norte. El corónimu Asturies quedó reducíu a esa tierra tresmontana nel 910 y depués lo que conocemos como Asturies ye eso. El nome d’Asturies y el territoriu asturianu siguió nomandose asina depués per sieglos prácticamente incamudable anque foi perdiendo terrén pel este por culpa de la so debilidá política a favor del reinu de Pamplona (Bizcaya, Álaba, Sopuerta, Valmaseda, Tresmiera) y llueu a favor de Castiella. Nel añu 910 lo que se conoz como Asturies queda desllendáu al territoriu situáu al Oeste de la Ribeira d’Uviéu, la ribeira entera del ríu Eo, incluyendo Fonsagrada, Negueira (Burón), Suarna, Piquín y Conforto, que ya pertenecen dende 802 hasta 1954 al Obispáu d’Uviéu; pel sur la llende ta na divisoria d’agües pal norte incluyendo siempre a Sayambre y Valdeón, ya hacia l’este conózse como Asturies a tol territoriu hasta la Pamplona marítima, esto ye, hasta Guipuzcua, palabra ésta que significa "frontera" por esta razón.
Entradas
