L'escritor ayerán Ánxel Álvarez Llano abrió la Xunta d'Escritores Asturianos 2012 el pasáu 1 de marzu na Biblioteca del Campu San Francisco d'Uviéu con una ponencia titulada "A la solombra del Surdimientu".
Na so conferencia Ánxel Álvarez Llano cuestionó la pervivencia del "Surdimientu" anguañu, esto ye, que si a nivel del añu 2012 podemos siguir falando de qu'inda tamos viviendo nel "Surdimientu" o pol contrario tenemos que buscar otra palabra dao que pa munchos esi surdimientu o renacencia de la llingua y lliteratura asturianes na transición política yá pasó y finó. L'autor amuésase nesti sentíu mui pesimista cola situación de la llingua y lliteratura asturianes pola falta de reivindicación, mobilización ya interés por estos temes, como si la botiella lliteraria tuviera más que medio enllena más bien medio vacía. Yá nun hai l'interés, la participación y les ganes de trabayar pola recuperación cultural qu'había antes poles razones que seyan, ye una realidá comprobar cómo ésto de la llingua y lliteratura asturianes muerre. L'alderique col públicu confirmó estes teoríes, dalgunos afirmando qu'efectivamente yá nun tamos en nengún "surdimientu" qu'esti yá morrió abenayá. Como muncho podemos falar de trés xeneraciones del Surdimientu asturianu pero la cuarta xeneración, los nacíos depués de 1983 nun podemos siguir afirmando que pertenecen al Surdimientu, pertenecen a otra etapa, otra dómina, la de la Confirmación, la Continuación o l'Afitamientu pero nunca más d'un "surdimientu" o "entamu". El futuru pesimista que se-y presenta a la llingua y lliteratura asturianes paez que tendrá solución sólo cola constancia nel trabayu, la llucha y la reivindicación non sólo de la oficialidá sinón tamién de la normalización de la llingua y de la lliteratura n'asturianu, siendo ún de los sos pegoyos l'enseñu del asturianu que tamién recibió crítiques yá que nun ta cumpliendo cola normalización de la lliteratura como se-y esixía y esperaba que ficiera n'Asturies ellí onde ta implantada.
Les xornaes lliteraries de la Xunta d'Escritores Asturianos d'esti añu tán dedicaes a la Oficialidá y desarrolláronse tamién nos díes 2 y 5 de marzu. Ánxel Álvarez Llano (Boo, 1958) pertenez a la Segunda Xeneración del Surdimientu (1955-1966) y recientemente publicó'l poemariu tituláu "Ensin salir de casa".
Entradas
