jueves, 5 de noviembre de 2009

Fruela II, rei d’Asturies (910-925)



El príncipe Fruela nació n’Uviéu nel 874. Yera’l tercer fíu d’Alfonsu III el Grande remaneciendo nel séquitu paternu hasta 909. Alfonsu III muerre nel 910 y los trés fíos, García, Ordoñu y Fruela, deciden un forzáu repartu del Reinu Asturianu. Ordoñu, predilectu del padre, tenía meyor derechu sobre Galicia pues yá la venía governando dende había trece años. Fruela quedó cola parte d’Asturies, dende’l ríu Eo al Deba de Vasconia, la parte histórica, primixenia y más segura de tol Reinu. García, el primoxénitu, pretendía la hexemonía pero quédase cola mayor y más difícil parte: la espansiva y conflictiva tierra de la meseta lleonesa del Dueru.

La partición del Reinu Astur foi un fechu anormal, escepcional y forzáu, motiváu por problemes ente los hermanos y pol fechu de qu’Ordoñu yá tenía en vida de so pá el goviernu delegáu de Galicia. García soblevárase yá contra so pá que lu peslló nel castiellu de Raíces como castigu, dando llugar a qu’Ordoñu y Fruela ficieren valer los sos derechos de fidelidá. Mentantu resurdió la teoría xermánica de la escoyeta de rei sucesor y los derechos del primoxénitu poníense en dulda. El repartu foi una solución apañada ante les aspiraciones esclusives de García.

Fruela II y la reina Nunilo són reis soberanos d’Asturies, unxíos y proclamaos nel añu 910 na catedral d’Uviéu onde prueben la so vinculación y preferencia por esti territoriu cola ceremoniosa donación a la Ilesia d’Uviéu d’un grandiosu regalu: la Caxa de les Ágates como gratitú por merecer a títulu de rei les tierres al norte de los montes. Esta valiosa caxa lleva grabada la Cruz de Pelayu en plata como símbolu del comienzu del so reináu nel territoriu orixinariu d’Asturies.

Fruela II afírmase n’Asturies como soberanu teniendo una meyor relación con Ordoñu yá que dambos temíen que García nun respetara’l repartu, y en 912 dona a la Ilesia d’Uviéu abondos llugares, como la ilesia de Santa María de Banduxu, confirmando los anteriores privilexos y concesiones coles pallabres Froila rex et Nunilo regina.

La separtación física y política de les tierres del Eo al Nervión (Asturies) confirieron al reináu de Fruela II una nueva independencia política nun territoriu cuasi igual al d’Alfonsu I pero cola ventaya de la seguridá y l’ausencia de necesidaes béliques o defensives. Los sos actos oficiales tán orniaos con gran signu de realeza ente los años 910 y 924 cuando reina nesti territoriu. La donación de la Caxa de les Ágates pa estrenar el so reináu ye prueba d’ello y símbolu de maxestá. En 912 na donación a la so Ilesia d’Uviéu de les villes de Gozón, Bárcena y Luerces failo col títulu de “Fruela rei, fíu de los reis Alfonsu y Ximena”.

En 914 muerre García en Lleón y el so hermanu Ordoñu II lu sucede en Lleón como rei axuntando estes tierres a les que yá tenía de Galicia mentantu que Fruela II sigue col so poder nel so territoriu asturiense.

Na Llébana, Fruela II llegó ser mui popular, testimoniándose que reinaba’l príncipe Don Fruela en 914 y en 915 reitérase que Don Fruela reinaba n’Asturies. Nesti territoriu hai abondes menciones alusives al so reináu n’Asturies como “el nuestru príncipe Fruela” o como “rei n’Uviéu”.

En 916 confirma’l cenobiu de Valdecésar, en 918 dona la villa de Candás a la Ilesia d’Uviéu coles sos ilesies de San Félix y Santa Olaya y cede Santiago de Viñayo a la Ilesia lleonesa. Vuelve a casar en segundes nupcies cola princesa Urraca. Amás realiza en 922 una importante obra civil, la meyora del vieyu camín hacia la meseta que pasaba per Somiedu onde dexó la inscripción “Fuit facta vía Regnante Froila cum Urraca conyuge”.

Pero’l 20 de xunu de 924 muere tamién Ordoñu II y entós Fruela II sucede al so hermanu a la edá de 50 años, volviendo a xuntase na so corona tolos territorios del Reinu d’Asturies. Fruela II tenía abonda devoción por Compostela y ye acá onde se-y vuelve proclamar el 28 de xunu de 924 como soberanu de tolos territorios del Reinu d’Asturies, del Mondego al Nervión, dando testimoniu de la so real dignidá cola famosa donación de les doce milles alredor de la basílica de Santiagu como cotu patrimonial de la mesma. La comunidá de San Martín de Turieno remembra a Fruela II como “regnante príncipe nostro Froilani in Asturias”.


Convalida la fundación del monasteriu de Tuñón y n’Uviéu autoriza la entrega del cartulariu de Samos, acoyendo a los sos emisarios con afectu y confirmando cola espresión “Froila rex confirmat”. En 924 confirma a Hermenexildo, obispu de Compostela, na posesión de la sede Iriense donándo-y el conmisu de Montaos. Autoriza al abade Atanrico la fechura d’un monasteriu en Katicas donándo-y les ilesies de San Adrián, y Xusto y Pastor, ente otres. Confirma a la ilesia de Santoagu la donación de la villa de Valga, fecha por so padre, añadiendo otres nueves. Dona al monasteriu de San isidru de Dueñas. En 925 confirma al abade Atanarico y al monasteriu de San Andrés de Parameno el llugar onde s’asitia a los qu’añade una serna llamada Villa Donica. Castigó a los condes en Carrión, executó a los fíos d’Olmundo por rebeldía y destituyó al obispu de Lleón Fruminiu.

N’agostu de 925 muerre Fruela II en Lleón, nueva capital del Reinu d’Asturies, enterrándose nesta ciudá al llau del so hermanu Ordoñu. Los fíos de Fruela II, los Froilaz d’Asturies, dicen les cróniques que fueron víctimes d’una nueva griesca dinástica ente primos pola corona d’Asturies. El fíu d’Ordoñu apresó a tolos fíos de Fruela II y de Nunilo: Alfonsu, Ordoñu y Ramiro a los que mandó cegar. Alfonsu Froilaz sólo va ser rei per un añu al que sucede’l so primu Alfonsu Ordóñez reinando per cinco años. Les cróniques cuenten que los cuerpos del rei Fruela II y de Nunilo lleváronse pa la ilesia de Santa María d’Uviéu “ad laevam in secunda techa”. Nel añu 2009 nenguna cai d’Uviéu lleva’l so nome.




No hay comentarios: