Presentación de la revista N'AST 6

El llar L’Ayalga de Xixón, asitiáu na cai Prendes Pando, abellugó la presentación del númberu 6 la revista d’ensayu “N’ast, cartafueyos d’ensayu”, cola presencia del so director, Daniel Cueli y de dalgunos de los autores d’esti númberu, ente los que tán Javier Cubero, David Gimeno, Xaviel Vilareyo o Xuan Porta.

Esti últimu, Xuan Porta Allende, abre les collaboraciones d’esti númberu con “La llingua asturiana, ente les llingües nacionales del Estáu español”, siguiendo darréu un artículu espublizáu en catalán, llingua orixinal del autor y asturianu “Oficialitat?. No hi ha alternativa”, de David Gimeno i Ayuso. L’espaciu dedicáu a la lliteratura ábrelu Inaciu Galán y González con un “Averamientu a la figura del escritor Antón Forascepi (1869-1947)” y sigue Xaviel Vilareyo y Villamil con un estudiu sobre’l “Vocabulariu asturianu na lliteratura de José María de Pereda”.

La revista vuelve editar “L’Alianza Popular Revolucionaria Americana: Alderique ideolóxicu y práutica política”, de Javier Cubero de Vicente.