Pieslla por fin el selmanariu antiasturianu "A Nosa Terra"

Una bona noticia pa los defensores de la integridá territorial de les Asturies ye'l reciente pieslle del selmanariu antiasturianu "A Nosa Terra". La quiebra del selmanariu galleguista materializóse nun reciente ERE col despidu de los sos 28 trabayadores. Los xestores del selmanariu culparon del pieslle a la Xunta gallega por reduci-yos les suvenciones por mor de la so llinia editorial nacionalista gallega radical. Lo cierto ye que la Xunta de Galicia concedió suvenciones por 971.753 euros sólo pa periódicos y revistes editaos dafechu en gallegu qu'esti añu amenorgaron un 60%. El Bloque Nacionalista Gallegu culpó por ello al goviernu gallegu del pieslle pero lo cierto ye que'l sindicatu nacionalista gallegu CIG responsabilizó a les direcciones del selmanariu del fracasu del mesmu y de la so pergrave situación económica yá que nun supieron xestionar bien la empresa, siendo ello una muerte anunciada. "A Nosa Terra" yeren unes fueyes galleguistes editaes por Manuel Murguía en 1907 y dende 1981 yera tamién la tiesta que daba nome a un periódicu selmanal en gallegu con sé en Vigu. Salía los xueves con una tirada de 10.000 exemplares y unos 3.000 suscriptores. Esti selmanariu, d'ideoloxía nacionalista espansionista, solía publicar noticies de Les Asturies como si pertenecieren territorialmente a Galicia. Agora yá nun podrar siguir col so autoengañu nin despreciar a la nuesa tierra de Les Asturies, yá que'l númberu de mercadores baxaba tolos años y el selmanariu ultragalleguista por fin desapaez.