Uviéu, capital de la incultura

Despreciu pola toponimia d'Uviéu, patrimoniu cultural ovetense

Verxa de fierro y Palaciu del Marqués de Gastañaga n'Uviéu, destruyíos pol

Ayuntamientu d'Uviéu (PP)

Destrucción del Conventu de San Vicente d'Uviéu (sieglu VIII)

Deformación por mampara publicitaria abusiva de la cúpula modernista de Manuel del Busto

Uviéu, capital mundial de la incultura

Los recientes estrozos y esbarrumbes cometíos nel históricu edificiu del Conventu de San Vicente d'Uviéu, orixe medieval de la fundación de la propia ciudá, la destrucción del Palaciu de Marqués de Gastañaga cola desaparición de la histórica verxa del mesmu palaciu xunto cola desaparición d'otra verxa histórica del palacete de Cervantes 13, dieron llugar nestos pasaos meses a abondes protestes de colectivos y ciudadanos preocupaos pola constante situación de destrucción del patrimoniu histórico-artísticu y tamién etnolóxicu asturianu por parte de les instituciones públiques, encargaes en teoría del so fomentu y protección, esto ye, conservación. Too ello fai que Uviéu y les alministraciones encargaes de la xestión de la ciudá nun merezan nengún tipu de reclamu o parabién a cuenta de la so declaración como "capital europea de la cultura" yá qu'esti supuestu interés cultural o artísticu nun esiste n'absoluto nes autoridaes que rixen esta ciudá asturiana. La destrucción y persecución contra la llingua asturiana nesti conceyu d'Uviéu, un patrimoniu cultural de la humanidá, afalada poles autoridaes, conlleva a qu'esta ciudá nun mereza tampoco la consideración de capital cultural en nengún casu, dada la política contraria al fomentu d'esta llingua autóctona europea. La conservación de los inmuebles y tesoros monumentales asturianos nun ye tala yá que vien sufriendo una abultable destrucción porparte de los organismos institucionales públicos y ello enriba col aplausu y complicidá de cierta y mui escasa intelectualidá pagao, que calla cuando non tien les coraes d'aplaudir estos desmanes de los estamentos gobernantes que son dafechu contrarios a la sensibilidá del pueblu asturianu, defensor siempre del so pasáu históricu, artísticu y cultural.Ente les prebes más visibles y amosables d'esta incontrolada y cafiante destrucción del aptrimoniu asturianu tán les desapariciones o desanicios de les históriques puertes antigues y renacentistes del propiu Conventu uvieín de San Vicente y la puerta del Palaciu del Conde de Torenu, que desapaecieron del so llugar pa sustituíles por unes modernes puertes de garaxe hortera más propies d'un xalé de neo-ricu. Abondos ciudadanos entrígense, incluso apelando a los cansinos y combayones medios de comunicación asturianos el verdaderu paraderu de los hostóricos portalones ovetenses, y demanden saber quién les tien y a qué fin van dedicase, si van vendese o yá les tienen vendíes a dalgún qu'otru muséu norteamericanu o si aparecerán dexuru nel xardín de cualesquier avispáu conseguidor oficial. Les puertes sustraíes del so orixinal allugamientu teníen un grandísimu valor amás de cumplir una función decorativa ya histórica esencial yá que yeren unes puertes históriques qu'agora mesmu tán, como tantes otres xoyes del patrimoniu artísticu asturianu, en paraderu desconocíu.La desastrosa destrucción del conventu de San Vicente y la construcción nel so solar d'un adefesiu con pretensiones posmodernistes a escasos dos metros de la xirola de la Catedral d'Uviéu escandalizó incluso a los historiadores contemporáneos, cansaos yá de comprobar que la historia actual ye una retafila de despropósitos y d'atentaos destructivos contra tolos testimonios valiosso del pasáu asturianu, ente los que tán la destrucción de los mesmos cuartos del filósofu Feijóo, que morrió nel mesmu Conventu de San Vicente nel que residía.Les agresiones al patrimoniu oventense y asturianu son abondes y una de les más chirriantes ye l'empeñu, como s'aprecia nuna de les semeyes, de caltener un panel publicitariu que tapa y deforma una de les xoyes arquitectóniques d'Uviéu, la incomparable cúpula art-decó del edificiu del Bancu Herreru, obra singular de 1911 del arquitectu asturianu Manuel del Busto.