La llingua d'Asturias de Santiyana tará presente na Xunta d'Escritores Asturianos

L'idioma asturianu ye la llingua propia y tradicional d'Asturias de Santiyana, un territoriu históricu asturianu qu'algama les llendes de los ríos Deva y Miera. El mesmu idioma, na so variante oriental, dase tamién nel territoriu de La Llébana y na Asturies d'Uviéu na rexón al este del ríu Seya. Toos estos territorios xunto colos conceyos asturianos de Sayambre y Valdeón conformen el territoriu dialectal del asturianu oriental. Fuera d'estes llendes idiomátiques tamién esisten elementos llingüísticos asturianos, como na Asturias de Tresmiera, nel norte de Palencia y notros territorios al sur del cordal como Campoo, anque nestes zones los elementos llingüísticos asturianos són yá más bien escasos.

Ésta ye una de les materies que tratará la conferencia de Xaviel Vilareyo dientro'l programa de la Xunta d'Escritores Asturianos, ponencia que tendrá llugar el día 11 de xineru a les 18,30 nel Palaciu Villa Madalena d'Uviéu. La llingua d'Asturias de Santiyana algama asina protagonismu nesta xornada dedicada a debatir otros conceptos alrodiu la lliteratura asturiana, la identidá y la nación, que ye'l lema d'esta xunta del 2010.

Xaviel Vilareyo (Mieres del Camín, 1967) ye llicenciáu en derechu y profesor de pianu tituláu pol Conservatoriu d'Uviéu. Recibió los premios de lliteratura Vila de Sarria, Xeira, Valentín Andrés, Elvira Castañón, Premiu de Teatru de l'Academia, amás de Mención especial nel Premiu Asturies d'ensayu. Pertenez a la tercer xeneración d'escritores del Surdimientu asturianu con delles obres yá publicaes.

La Xunta d’Escritores Asturianos 2010 falará del nacionalismu asturianu y de les relaciones ente la lliteratura, la identidá y la nación nel casu asturianu. La relación ente nación y lliteratura ye un vieyu tema presente en tola historiografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial. Esta nueva edición del 2010 tendrá llugar n'Uviéu los díes 11, 12 y 13 de xineru. Les actividaes tán destinaes tanto a escritores como al públicu en xeneral yá que l’asistencia ye gratuíta y consisten nun ciclu de conferencies, debates, alderiques, presentaciones de llibros, amás tolos asistentes recibirán como regalu reproducciones de mapes históricos d’Asturies. Nesta edición el lema de les xornaes falará de cómo los aspectos identitarios afecten al fechu d'escribir nuna llingua minorizada y non oficial como l'asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. La Xunta d’Escritores Asturianos tendrá llugar n’Uviéu nel palaciu de Villa Madalena, situáu nel antigu Paséu de la Siella del Rei. Na Xunta presentaráse'l Llibru d'Actes del anterior aconceyamientu que lleva por títulu "Lliteratura asturiana y compromisu", a cargu d’Esther Prieto. El programa cuntará amás con conferencies y presentaciones de Javier Cubero, Xaviel Vilareyo, Daniel Cueli, Pablo Martínez, Helena Trexu, Xuan Carlos Crespos, Dorita García, Inaciu Galán, Laura Marcos, Benxa Pérez, César García, Llucía Fernández y Marcos Abel Fernández. Esta edición del 2010 quier recordar tamién los centenarios de Fruela II y del arquitectu asturianu Miguel de la Guardia.

LLUNES 11 XINERU:

- 17h. Presentación del llibru Lliteratura asturiana y compromisu, actes de la Xunta d’Escritores Asturianos 2008. Presenta: Esther Prieto.

- 17,30h. Llingües, clases y nacionalismos. Javier Cubero.

- 18,30h. L’idioma asturianu na Asturias de Santiyana. Xaviel Vilareyo.

- 19,30h. Presentación de los númberos 4 y 5 de la revista N’AST. Daniel Cueli.

- 20,30h. Centenariu de Miguel de la Guardia (Hontaneda 1859 – Uviéu 1910), arquitectu de Villa Madalena.

MARTES 12 XINERU:

- 17h. De cómo una llingua s’enfrenta a la muerte. Pablo Martínez Testa.

- 17,30h. Nación y llingua. Helena Trexu.

- 18h. Presentación del llibru Abismos, adicciones y papeles azules, de Xuan Carlos Crespos.

- 18,30h. Crónica del rei Fruela II d’Asturies (910-925) Xaviel Vilareyo.

- 19h. El procesu creativu. Dorita García. Presentación de la so obra narrativa.

- 19,30h. Presentación del númb. 6 de la revista Formientu.Inaciu Galán, Laura Marcos, Benxa Pérez y César García.

- 20h. Recital de nueva poesía asturiana.

MIÉRCOLES 13 XINERU:

- 17h. Presentación del númberu 72 de la revista LA SIDRA. Llucía Fernández Marqués.

- 17,30. La lliteratura dialectal de los escritores de Santiyana. Xaviel Vilareyo.

- 18,30. El periodismu nuna llingua minorizada. Inaciu Galán.

- 19,30. Antoloxía poética de la Xeneración del Compromisu (1967-1982)

- 20h. Presentación del llibru Historia del Cine Asturianu, de Xaviel Vilareyo.Presenta: Marcos Abel Fernández.

ENTRADA LLIBRE: Tolos asistentes recibirán como regalu mapes históricos d’Asturies.