Teatru de Güeñu estrenó "De rebaxes na sablera", de Xaviel Vilareyo

Teatru de Güeñu estrenó “De rebaxes na sablera”,

de Xaviel Vilareyo

El martes 7 d’abril del 2009 Teatru de Güeñu estrenó nel Teatru Filarmónica d'Uviéu la obra “De rebaxes na sablera” del escritor mierense Xaviel Vilareyo cola interpretación de los actores y actrices protagonistes Dilia Pinto, Merce Santovenia y Pepe Santovenia. “De rebaxes na sablera” ye una comedia realista inspirada nel teatru tradicional asturianu onde los personaxes representen arquetipos sociales presentes na nuesa sociedá y onde los diálogos, enllenos de xuegos de palabres, de crítica social, dobles significaos y situaciones mui verosímiles de comicidá llingüística qu’ufierta’l testu n’asturianu, xunto cola excelente comicidá de los actores faen posible la identificación total col públicu na ficción escénica que se desarrolla nel guión escritu. Teatru de Güeñu ye una compañía de teatru asturianu non profesional, con dellos años yá d’historia teatral con una trayectoria de gran éxitu popular. La compañía ta allugada nel pueblu de Güeñu, Conceyu de La Ribera, candidatu a Pueblu Exemplar d’Asturies del 2009. Esta primer presentación de “De rebaxes na sablera” cuntó cola dirección artística del propiu autor y la función representóse con gran éxitu de públicu dientro del programa del 5u Festival de Cine Asturianu que se celebró nel mesmu escenariu del Teatru Filarmónica d’Uviéu durante la pasada selmana.