Estrenóse nel Filharmónica "El misteriu del pelu roxu", obra de Xaviel Vilareyo

Estrenóse nel Teatru Filharmónica
“El misteriu del pelu roxu”

El pasáu miércoles 8 d’abril del 2009 tuvo llugar nel Teatru Filharmónica d’Uviéu l’estrenu de la obra dramática “El misteriu del pelu roxu”, orixinal del escritor mierense Xaviel Vilareyo. La representación corrió a cargu de la compañía Teatru de Güeñu que puso n’escena esta nueva pieza n’asturianu cola interpretación nos principales papeles de los actores y actrices Moisés Díaz, Elena García, Álvaro Santovenia y Emilio Castelar. “El misteriu del pelu roxu” ye una obra dramática onde la intriga y el suspense danse la mano pa llevar al espectador a través d’una historia d’una misteriosa desaparición que dos detectives tienen la misión de resolver. Ambientada na Inglaterra victoriana de 1900, dominada por una sociedá con un fuerte componente de represión sexual y por una marcada dixebra de clases sociales, los personaxes dan vida a una dramática búsqueda de la verdá nun casu d’un posible secuestru d’un altu financieru que trabaya nel centru comercial de Londres.