Presentación en Xixón de Los ámbitos de la Nación Asturiana

Presentación en Xixón de Los ámbitos de la Nación Asturiana

Esti xueves 26 de marzu tuvo llugar la presentación en Xixón del llibru de Xaviel Vilareyo tituláu “Los ámbitos de la Nación Asturiana” recientemente sacáu a la lluz pola editorial Espublizastur. L’actu de presentación tuvo llugar nel llar del Atenéu Obreru de Xixón y tuvo organizáu pol Atenéu Cultural Xuan María Acebal. El so presidente D. Javier Cubero de Vicente ufiertó una interesantísima conferencia titulada “Apuntes sobre la provincialidá y nacionalidá d’Asturies” onde desplicó’l precorríu pelos entamos del estáu centralista hespañol dende 1812 cuando s’entama falar d’una “nación-estáu hespañola” onde la organización territorial en provincies va xugar un papel primordial encuantes a la subordinación de tol territoriu a esta nueva idea del estáu, organización na que’l territoriu historicu d’Asturies va sufrir según Javier Cubero una amputación o disminución col fin d’una mayor destrucción de la nacionalidá asturiana. Los intentos de xuntar les nueves provincies d’Uviéu y Santander nun fueron posibles nel sieglu XIX y nun ye hasta’l surdimientu de Conceyu Bable en 1974 cuando s’entama falar d’una retrocesión de territorios o conceyos p’Asturies. Los únicos partíos políticos que reclamaron esta retrocesión de conceyos a les Asturies fueron el Conceyu Nacionalista Astur, el Partíu Asturianista y Andecha Astur. Javier Cubero tamién remembró qu’hasta 1954 los conceyos de la ribera asturiana del Eo, Fosagrada, Negueria, pertenecieron al arzobispáu d’Uviéu como siempre lo ficieron. El coordinador d’Espublizastur, D. Antón Martinez, recalcó l’éxitu que ta teniendo’l llibru y analizó nel so alderique los “Conceptos de frontera y territorialidá” reinvidicando éstos como importantes nel marcu de les construcciones o reivindicacioes nacionales como l’asturiana. Por último, l’autor del llibru presentó la so obra como un entamu pa la reflexón, non nacionalista sinón hestórica y cultural de qué ye Asturies, les Asturies, y lo asturiano y criticando al empar aquellos movimientos que se dicen “asturianistes” o “nacionalistes” y que se conformen con reivindicar sólamente’l territoriu o la cultura esistente güei na provincia d’Uviéu, una entidá alminsitrativa creada con fronteres artificiales nel añu 1834 pol centralismu hespañol pa l’alministración d’esti territoriu. Los comentarios y aportaciones del públicu asistente completaron toa una llección d’história y política asturianes tan interesantes y necesaries pa poder entender cuálu ye l’ambitu territorial asturianu.