Xavi Vilareyo estrena n'Uviéu la so primer película: "La tarde americana"

La sala ovetense "La caja negra", de la cai Jesús 12, acoyerá el próximu sábadu 26 d'abril l'estrenu y proyección del primer  llargumetraxe de ficción de Xaviel Vilareyo, "La tarde americana", una película homenaxe al mundu del cine y a los actores y actrices, rodada n'Uviéu en 2013. A la presentación de la película asistirán, amás del guionista y director Xavi Vilareyo,  les actrices protagonistes Ana Suárez, Pepa Martínez, Marián Fernández, Rocío Álvarez y los actores Cristóbal Carrera, Laura Fuentes y Adrián Zamanillo.

Nel mesmu actu presentarase'l llibru de poesía de Xaviel Vilareyo tituláu "Del Eo al Asón". El llibru fai el númberu 11 de tolos editaos por esti autor en solitariu. La cita ye a les 20 hores y l'asistencia a dambos eventos ye llibre.

La tarde americana (2014) ye la primer película llarga de ficción dirixida y guionizada por Xavi Vilareyo, autor que yá realizó otros curtiumetraxes como Salvemos el teatru (2009), La vocación (2009), El casting (2013) y el documental sobre transexualidá tituláu Ensin xéneru de duldes (2009) proyectáu nel CinegailesAST. El guion de La tarde americana fala de cuatro actrices que busquen un trabayu nuna axencia de colocación pero en realidá la película ye un homenaxe al nundu del cine y a tolos actores y actrices. Inspirada tamién na obra de François Truffaut, La tarde americana ye un llaboriosu trabayu d'edición frutu del so anterior curtiumetraxe: El casting.

Xaviel Vilareyo (Mieres del Camín, 1967) tamién dirixe'l Festival de Cine Asturianu dende la so fundación en 2005, añu del Centenariu del cine asturianu y estrenó delles obres de teatru como El misteriu del pelu roxu, La igua y De rebaxes na sablera. Recibió los premios lliterarios Vila de Sarria 1997 (Os novos poemas), Xeira 1998 (Na marxe dos carreiros) y Elvira Castañón 1999 (El camín d’inquietú), el Valentín Andrés 1997 (Carta a la señora Monroe),  y el Premiu de Teatru de l’Academia 2009 por La fuxida.