Presentación del nuevu llibru de poesía de Xaviel Vilareyo: "Del Eo al Asón"

La sala ovetense "La caja negra", de la cai Jesús 12, acoyerá el próximu sábadu 26 d'abril la presentación del llibru de poesía de Xaviel Vilareyo tituláu "Del Eo al Asón". El llibru fai el númberu 11 de tolos editaos por esti autor en solitariu, autor que recibió los premios de poesía Vila de Sarria y Elvira Castañón amás del Valentín Andrés y del de Teatru de l'Academia de la Llingua Asturiana. Nel mesmu actu estrenarase la primer película llargumetraxe de Xaviel Vilareyo, "La tarde americana", una película homenaxe al mundu del cine y a los actores, rodada n'Uviéu en 2013. L'asistencia a dambos eventos ye llibre. A la presentación del llibru y la película asistirán, amás del poeta y director Xavi Vilareyo,  les actrices Ana Suárez, Pepa Martínez, Marián Fernández y Rocío Álvarez.

Del Eo al Asón (Les fueyes marielles) ye una recopilación de poemes de Xaviel Vilareyo publicaos en diferentes revistes dende l’añu 1996 cuando publicó la so primer poesía nes páxines de la revista universitaria Pretexto. Amás tien publicao nes revistes Zimbru, Reloj de Arena, Sietestrellu, Lliteratura, El Signo del Gorrión , Isla Desnuda, Amilamia, Calicanto, Poesía Toda, Estío, El Vendedor de Pararrayos, Texturas, y tamién n’ abondes collaboraciones en revistes y periódicos. De toes estes publicaciones destaca una sobremanera, la revista Lletres Asturianes editada pola Academia de la Llingua Asturiana. El sotítulu d’esti nuevu poemariu recopilatoriu de Xaviel Vilareyo (Les fueyes marielles) alude a les páxines d’esta vieya revista lliteraria na que vien publicando toos estos años xunto con otros autores de la so xeneración lliteraria, la Xeneración del Compromisu (1967-1982). La poesía de Xaviel Vilareyo va evolucionando nestos quince años dende la introspección hacia una escritura más vinculada y comprometida hacia la reivindicación de lo colectivo, incluso de la poesía popular, ensin dexar nunca al marxe la reivindicación de lo estético y de lo novedoso.

Xaviel Vilareyo (Mieres del Camín, 1967) recibió los premios de poesía Vila de Sarria 1997 (Os novos poemas) y Elvira Castañón 1999 (El camín d’inquietú). Diose a conocer gracies a una Mención Especial del Premiu Asturies Xoven 1995 (Cróniques del recuerdu) y recibió amás otros premios lliterarios como el Valentín Andrés 1997, el Premiu Xeira 1998 y el Premiu de Teatru de l’Academia 2009. Xaviel Vilareyo asoleyó en 1998 el so Manifiestu sobre la poesía ética, nes páxines de la desapaecía revista El canciu’l Cuélebre, onde reivindica una poesía asturiana de raigañu comprometica cola cultura propia y cola tierra que pisa, enllena d’intencionalidá comunicativa, un paraísu éticu que defienda penriba de tou l’actitú valiente del escritor, la so irreverencia nel despertar de les conciencies, recuperando la tradicional y ancestral función del poeta como estandarte identitariu de les aspiraciones colectives.