Xosé Lluís Colodrón denunció la paralización de la enseñanza del asturianu na Xunta d'Escritores Asturianos 2012.

Xosé Lluís Colodrón Ardura, responsable de la Secretaría de Llingua Asturiana del sindicatu SUATEA, desarrolló una amplia conferencia sobre Presente y futuru de la enseñanza del asturianu onda denunció la situación de parálisis na que s'alcuentra el procesu d'implantación del enseñu del asturianu y n'asturianu nel ámbitu de la C.A. del Principáu d'Asturies. Depués d'analizar tola normativa estatl y europea qu'obliga a l'autonomía asturiana a implantar estos estudios reglaos en tolos niveles educativos, Xosé Lluís Colodrón espuso el pocu grau de cumplimientu de los planes de desarrollu ya implantación del asturianu na enseñanza achacándolu a una falta de voluntá política dende Asturies. Los problemes encuantes a la reconocencia de la especialidá docente d'asturianu, a los derechos reconocíos estatutariamente y a lo recoyío na propia "Llei d'Usu del Asturianu" nun se correspuenden cola realidá qu'amuesa una paralización y estancamientu cuantitativu nel grau d'implantación del asturianu ya incluso obsérvase una regresión en niveles de Secundaria, ma´s grave entá llueu de más de 30 años de que s'entamó tol procesu re reconocencia del asturianu dientro del sistema educativu. Les enseñances impartíes n'asturianu tán tamién paralizaes cuando yá habríen tar implantaes cuando menos a nivel esperimental n'Asturies. El responsable d'esi desdexamientu pa cola enseñanza del asturianu según el ponente hai qu'achacalu a la negativa actitú del anterior presidente autonómicu Vicente Alberto Álvarez Areces, actitú o zuna personal d'esti cabezaleru que nun permitía avances na enseñanza del asturianu. L'actitú del nuevu goviernu asturianu surdíu nes urnes hai unos meses inda ta por ver si ye capaz de dar una definitiva solución al estancamientu actual de la enseñanza del y n'asturianu n'Asturies.

Xosé Lluís Colodrón ye Responsable de la Secretaría de Llingua Asturiana del sindicatu SUATEA, una de les organizaciones sindicales que más ta trabayando anguañu pola dignificación y reconocencia del asturianu dientro del sistema educativu. L'actu tuvo llugar el xueves 1 de marzu a les 18 hores na Sala Polivalente de la Biblioteca del Campu San Francisco d'Uviéu dientro de los actos de la Xunta d'Escritores Asturianos 2012, que se desenrollaron col epígrafe de Lliteratura asturiana y Oficialidá.