Xaviel Vilareyo presentó en Madrid la "Historia del cine asturianu"

El Festival de Cine Asturianu presentó en Madrid el pasáu 9 de mayu de 2011 el llibru "Historia del cine asturianu" de Xaviel Vilareyo que tuvo mui bona acoyida. La presentación del llibru tuvo llugar dientro de los actos d'entrega de Premios al qu'asistieron los nominaos y otres personalidaes del mundu del cine y la televisión como los yá citaos Florentino Soria, Gil Parrondo, Raimundo García, María Casal, Lola López, Javier Longas, Rocío García, Miguel Losada y Alfonso Suárez. El llibru, presentáu por Raimundo García ye un percorríu ilustrativu per tola historia del cine asturianu dende la llegada del cine a Asturies onde l'autor recueye datos inéditos per primer vegada yá que ye'l primer llibru onde se recueye dafechu la historia del sétimu arte asturianu.

Los curtiumetraxes Días perdidos, de Senén Fernández y Puntu, d'Eva Gallego resultaron ser les obres premiaes na 7 edición del Festival de Cine Asturianu nes categoríes de Meyor Curtiumetraxe en castiellanu y n'asturianu respectivamente. La entrega de premios tuvo llugar el llunes 9 de mayu nel Atenéu de Madrid, llugar onde nació'l Festival de Cine Asturianu un 27 d'abril del 2005 pa celebrar el Centenariu del cine asturianu. Como meyor película premióse a L'horror de la dama del llagu, del avilesín Diego Váquez. Como meyores actores recibieron los premios Jesús Pardo, por Días perdidos y Almudena gallego por Anorexia. La productora Hi-Video recibió'l Premiu al Meyor Documental pol trabayu tituláu "Concejo de Tineo naturaleza a la carta" qu'entregó Gil Parrondo. El guionista y cineasta asturianu Florentino Soria entregó los premios al meyor curtiumetraxe en castiellanu y a la meyor película mentantu Gil Parrondo entregó los premios al meyor documental y curtiu n'asturianu. Los premios a los actores entrególos la directora y guionista Rocío García. Los xuraos nesta edición fueron los realizadores Teresa Marcos, Iñkli Ibisate y Ángeles Muñiz, premiaos y participantes n'anteriores ediciones del Festival. El Festival nesta edición rindió un homenaxe a los guionistes asturianos en concreto al gran Carlos Blanco (Xixón, 1917), onde se faló de les dificultaes y situación de los guionistes na industria del cine, repasando la trayectoria vital y cinematográfica de dos grandes guionistes asturianos como'l xixonés Florentino Soria, que cuntó y repasó tola so trayectoria nel mundu del cine yá qu'amás de guionista y profesor de la escuela oficial de Cine foi presidente de la Filmoteca Hespañola y de Raimundo García, director amás de dos películes, que llueu d'emponderar mui positivamente'l llibru de Xaviel Vilareyo presentáu faló de la relación a vegaes difícil de los guionistes y los directores según la so propia esperiencia.