Centenariu del arquitectu asturianu Miguel de la Guardia

Juan Miguel de la Guardia y Ceínos foi el padre del urbanismu y de l’arquitectura ovetense de finales del sieglu XIX y per toa Asturies dexó amuesa de la so elegante arquitectura clasicista tanto n’edificios públicos como privaos.Miguel de la Guardia nació en Hontaneda (Asturias de Santiyana) en 1859 y morrió n’Uviéu el 17 de setiembre de 1910. Estudió arquitectura en Madrid de la qu’exercía, por oposición aprobada en 1876, una plaza d’oficial de tercera nel Cuerpu de Topógrafos en Madrid. En terminando los estudios, el 1 de setiembre de 1881, concedióse-y el títulu d’arquitectu el 5 de mayu de 1882. En xunetu de 1882 algamó por unanimidá el concursu convocáu la plaza d’arquitectu municipal de la ciudá d’Uviéu en 1882, durante’l mandatu del alcalde José Longoria Carbajal, ocupando esti cargu dende’l 13 de setiembre de 1882 hasta la so muerte en 1910. La plaza quedara vacante por fallecimientu del anterior arquitectu municipal, don Patricio de Belumburu. Xunto a Javier Aguirre, arquitectu de la diputación d’Asturies y a Nicolás García Rivero, pertenecen a la xeneración artística de 1881, caracterizada por un elegante clasicismu eclécticu que dio toa una seña d’identidá propia non sólo a al capital asturiana sinón a tol país asturianu. Exerció esta profesión na ciudá d’Uviéu durante tola so carrera profesional, per trenta años, espardiendo’l so llabor creativu tamién a otres localidaes asturianes.El so primer proyectu pa la capital asturiana foi el del mercáu cubiertu d’El Progresu na cai de Pelayu nel que trabayó namás tomar posesión del so cargu como arquitectu municipal y que presentó a la Corporación en 1883 inaugurándose en 1887. Tamién dirixó les obres d’esta magnífica obra en fierru. Esti mercáu, que se conocía popularmente como La Placina, quedó inauguráu en 1887. Un añu depués, en 1888 diseña’l templu de la música del Paséu del Bombé nel Campu San Francisco y en 1889 la casa que lleva’l númberu 12 de la cai del Rosal. En 1896 entama los trabayos de la elegante ilesia de Les Saleses, que se consagró ya inauguró en 1903 y al empar trabayó na reconstrucción de la ilesia del Cristu de les Cadenes, n’estilu neogóticu, terminando les obres nel 1900, ilesia que se destruyó na Guerra Civil. En 1905 diseña’l Teatru Celso de la cai Xovellanos, un local pioneru na exhibición cinematográfica n’Uviéu, clasicista pero con dalgunos elementos modernistes, qu’amás disponía tamién d’un restorán. Otros proyectos de Miguel de la Guardia nun llegaron a realizase, como’l Teatru-Circu de 1902 y una pasarela que xuntaría penríba del acueductu de los Pilares.Al empar que facía obres municipales, Miguel de la guardia tamién trabayó realizando encargos pa particulares. La ciudá d’Uviéu vivía naquellos años d’entesieglos, como toa Asturies, nuna etapa de bayura económica y desarrollu industrial y bancariu debío en parte a los grandes capitales que retornaron de Cuba. Na ciudá d’Uviéu había muncha xente con dineru y sobre too propietarios con mui buen gustu artísticu qu’encargaben obres y edificios non sólo confortables sinón tamién que fueren estéticamente mui elegantes. Los propietarios contribuyeron asina al orniamientu de la ciudá contruyendo fachades, palacios y edificios guapos y vistosos. Asina ye cómo se ficieron les cases del Pasaxe y adyacentes formando la primer manzana de la cai Uría en 1894 con un elegante arcu trunfal que daba entrada a la galería interior y onde s’alcontraba l’elegante café modernista del Pasaje. Otros edificios suyos són: la Casa de Polo, derribada nos años 1980, la Casa del marqués de Casa-Tremañes tamién na cai Uría esquina a Portugalete, del añu 1895 refecha nos años 1980, la casa númberu 12 de la cai Fruela (1889), la primer casa de la cai del Rosal con Fruela (1899). Diseñó en 1901 el suntuosu palaciu del Deán Payarinos na Corrada del Opispu, actualmente Conservatoriu de Música, un proyectu edificáu pal deán de la catedral don Benigno Rodríguez Pajares que foi tou un personaxe na ciudá d’Uviéu y otru suntuosu palaciu na cai Torenu, construyíu pa don Anselmo González del Valle, con marquesines de fierru y cristal y un gran hibernaderu, too ello encerráu nuna maxestuosa verxa, ún de los más suntuosos palacios ovetenses que se derribó nel añu 1978. Tamién realizó llueu otros edificios de les cais Gil de Jaz (1901) y Torenu, (1902), esbarrumbaos na segunda metá del sieglu XX consecuencia de la especulación inmobiliaria.El palaciu de Villa Madalena ye un diseñu de Miguel de la Guardia construyíu en 1902 por encargu de Victoriano Campomanes, un bayurosu comerciante d’ultramarinos de la cai Uría d’Uviéu, no qu’entós yeren les afueres de la ciudá nel Paséu de la Siella del Rei, na surtida hacia Grao. Un industrial de Mieres compró la finca hacia 1915 que llueu d’arruinase quedó embargáu el palaciu adquiriéndolu l’industrial Alfredo Figaredo Herrero casáu con María Argüelles, la so cabera propietaria y güéspede. Nos años 1940 Villa Madalena tuvo reformada polos arquitectos Somolinos. Ye un exemplu magníficu de l’arquitectura burguesa uvieína d’entesieglos que foi tan abundante hasta hai poco cuando la mayoría de los palacios burgueses capitalinos cayeron esbarrumbaos pola piqueta baxo les garres de la especulación inmobiliaria. Bon exemplu de l’arquitectura ecléctica academicista, destaca nél un bon equilibriu formal y el correctu emplegu del llinguaxe eclécticu nos elementos que lu ornien, con una gran escalera d’influencia inglesa y refinaos cuartos interiores de claru estilu francés. Los xardinos de Villa Madalena, abriéronse al públicu en 1999 llueu de la espropiación municipal col derribu de la muria que los separtaba de les cais llendantes. Los xardinos tán presidíos pola escultura d’un pífanu d’inspiración romana y por un románticu cenador con columnes que sobresal al paséu principal de la entrada.Obra suya ye’l magníficu edificiu del Hotel Covadonga, rematáu con una elegante cúpula, que foi llueu sede del Bancu Asturianu na Plaza Porlier que se construyó en 1903 y que a pesar de quemase durante la revolución de 1934 conservó íntegra la so guapa fachada. Llueu vendría otru famosu proyectu suyu: la Casa de Conde, na plaza la Escandalera, un diseñu de Miguel de la Guardia de 1904 mui representativu del so estilu clásicu y harmoniosu, con dos cúpules laterales que dieron a la plaza un nuevu aspectu cosmopolita y européu. El proyectu pa la Casa de Conde taba destináu a viviendes d’altu nivel, amás de cuntar con baxos comerciales y cafés. Otru edificiu suyu que se conserva ye’l de la cai Ramón y Cajal que fai recantu con Porlier que ye de 1908.En 1909 terminó de construyir el palaciu del marqués d’Aledo, na plaza San Miguel, una de les sos últimes obres diseñaes, palaciu tristemente esbarrumbáu nos años 1980.Fuera d’Uviéu realizó tamién diseños arquitectónicos singulares como’l mercáu de fierru de Villaviciosa y el mercáu cubiertu de Mieres, construyíu ente 1904 y 1906. La Villa Tarsila de Lluarca (1894), que-y sirvió de modelu depués pa desarrollar la idea del palaciu d’Aledo n’Uviéu. La Casa Muñiz, na cai la Cámara d’Avilés ya tamiñén otra obra inconfundible suya como les renomaes y artístiques Villa Carmen, en Villar y el maxestuosu El Capitoliu, de Grao. Tamién ye diseñu suyu el Casinu de Castropol, edificáu en 1911 frente al parque.Asturies ye asina, un gran muséu de l’arquitectura del xenial Miguel de la Guardia, a pesar de la destrucción cometida pola piqueta especulativa durante tantos años pasaos y presentes.