Actos nel Día de la Nación Asturiana

Nel Día de la Nación Asturiana 2010 dueron dellos los actos xunitarios a los que'asistieron cientos de persones pa facer d'esti 8 setiembre un Día de la Nación Asturiana polos derechos del Pueblu Asturianu y pol futuru d'Asturies. Ma ciudá de Xixón, la "Plataforma Xunitaria 8 Setiembre" convocó una concentración a les 12:30 hores na Plaza de los Xardinos del Nauticu. N'Uviéu, la plataforma ciudadana "Democracia p'Asturies" convocó'l manifestamientu del Día de la Nación Asturiana. Los dos actos xunitarios axuntaron abonda xente nes dos ciudaes más importantes del país reivindicando y refugando los actos oficales del Principáu de les Asturies.

El primer actu del día foi'l convocáu col lema "Pol futuru d'Asturies" en Xixón, que sofitaron Bloque por Asturies, UNA y Andecha Astur, les formaciones locales d'UICA, Asturianistes por Nava, Más Corvera y S.XXI de Muros del Nalón, los sindicatos CSI y SUATEA y los coleutivos Fai! y Entemecer. L'actu entamó a la 1 de la tarde col gaiteru Llorián García y la presentación del actu a cargu del actor Toño Caamaño, delles intervenciones y l'actuación de Mari Lluz Cristobal Caunedo que dieron pasu llueu a la llectura del manifiestu consensuáu y al pieslle del actu.
N'Uviéu, a la una y media, entamó'l manifestamientu del Día de la Nación Asturiana col lema "Democracia p'Asturies" que percorrió les principales cais de la capital asturiana, dende la Estación del Norte hasta delantre de Presidencia del Goviernu del Principáu de les Asturies y que sofitó'l partíu Andecha Astur, el sindicatu Corriente Sindical d'Izquierda y la organización xuvenil independentista "Darréu". Al final de la marcha, una vocera de la plataforma ciudadana "Democracia p'Asturies" presentó l'actu políticu dando pasu a les intervenciones del representante del sindicatu CSI y del cabezaleru d'Andecha Astur Mario Arbesú. L'actu finó cola interpretación polos gaiteros de La flor del agua.

Pel so llau, el PAS refugó participar tanto na concentración de Xixón como na manifestación d'Uviéu alegando discrepancies na forma "despolitizada" d'organizar los eventos y asina fizo un actu partidista en Candás xunto con URAS, partíu asturianu col que firmó una coalición electoral. Los actos de PAS-URAS tendrán llugar nuna plaza céntrica de Candás y depués fairán una xinta de xermandía pa militantes y simpatizantes. N'años anteriores la coalición PAS-URAS solía facer un actu abiertu a tolos ciudadanos, un homenaxe a los padres fundadores, los reis d'Asturies, ante'l Panteón Real de la Catedral d'Uviéu onde depositaben una ufierta floral baxo la estatua d'Alfonsu II con dellos discursos patrióticos, pero esti añu ye añu electoral y necesiten reforzar la so coalición cola URAS y reaxuntar la so militancia, por eso decantáronse pa facer esta vegada un actu más partidista.

El Goviernu del Principáu de les Asturies celebró como suel una romería itinerante qu'esti añu tuvo llugar en Ribeseya. Izqueirda Xunida celebró xunto a Cayu Lara un actu festivu en Santaya d'Ozcos. El PP d'Avilés, El PP d'Uviéu y el PP de Xixón nun celebraron nengún actu relevante con motivu del Día de la Nación Asturiana.