Negueira quier "anexionase" más terrén

Negueira quier "anexionase" más terrén

Los pueblos allandeses de Villalaín, Fonteta y San Salvador defienden los sos montes comunales contra la especulación eólica y l'anexionismu interesáu del occidente.El problema de les llendes de los conceyos asturianos de Fonsagrada, Negueira, Grandas y Allande vien dende 1834 cuando los burócrates de Madrid decidieron trazar unes fronteres artificiales nel valle asturianu del ríu Navia, esgayando unos territorios pa la nueva provincia de Lugo que pertenecíen hasta entós a les Asturies d’Uviéu. El problema llega hasta l’actualidá cuando les llendes ente los conceyos asturianos de Negueira, Grandas, Allande, Ibias y Suarna siguen ensin tar claros, como consecuencia d’aquella improvisada delimitación manual y a trazu gruesu nun mapa d’Asturies.

Los actuales conceyos de Fonsagrada y Negueira de Muñiz formaben l’antigu Conceyo asturiano de Burón, que tenía por capital Pobra de Burón. Posteriormente un pequenu cachín del ríu Navia decició dixebrase de Fonsagrada formando’l Conceyo de Negueira que lleva l’apellíu d’aquel personaxe qu’entamó la secesión municipal, Muñiz. Pero los problemes pola artificiosidá de les llendes trazaes ente Uviéu y “Lugo” siguieron llatiendo hasta xenerar conflictos nos tribunales pola propiedá de tierres y pastos.

La única frontera clara y real ye la histórica, esto ye, la frontera ente Asturies y Galicia que vien delimitada pol cursu enteru del ríu Eo, que separta o xunta les dos riberes, al este la Ribera asturiana (Ripa de Ovetus) y al oeste la ribera gallega. L’esgayamientu de territoriu asturianu trazáu al biés sobre’l valle del ríu Navia en 1834 nun fizo más que xenerar conflictos a los habitantes pasaos y presentes d’esti territoriu asturianu. Asina, na zona de Taramundi, l’arbitrariedá del esgayamientu de terrén fizo incluso qu’una mesma casería asturiana quedara partida pela mitá, dixebrada, onde parte de la casa pertenecía a “Uviéu” y el restu a “Lugo”, esto ye, “Galicia”. El casu de la casería asturiana partía en dos pola frontera alministrativa de 1834 vien siendo recurrente en programes de televisión de máxima audiencia, polo chocante del casu. Pero otros casos nun lleguen a salir na televisión y queden nel anonimatu de les sales de los tribunales de xusticia.

Ye’l casu de los pueblos asturianos de Fonteta, Villalaín y San Salvador, nel conceyu d’Allande que ven cómo’l conceyu de Negueira de Muñiz, qu’en realidá pertenecía al de Fonsagrada-Burón nos mapes anteriores, quier “anexionase” terrenos comunales asturianos que siempre pertenecieron a los vecinos d’estos pueblos de Fonteta, Villalaín y San Salvador, col agravante de que nun ye un problema d’indefinición ente conceyos d’una mesma comunidá autónoma como ye vezu, sinón que dende 1834 la indefinición de les llendes afecta a conflictos alministrativos, fiscales y normativos ente dos comunidaes autónomes, yá que Fonsagrada-Negueira pertenecen a Lugo sólo dende 1834. Hasta 1923 nun se fizo desllinde nengún ente les provincies d’Uviéu y Lugo pero ina con ello los problemes persisten, yá que los desllindes són artificiales y artificiosos. Ello afecta a vecinos asturianos como Toño Abad que yá ta cansáu de reivindicar propiedaes de só en toles instancies. Los terrenos allandeses que pretenden “anexionase” o furtar dende’l de Negueira de Muñiz son una amplia estensión de terrén consistente en pinares, monte y pastos que son de categoría comunal y pertenecen a estos pueblos asturianos por derechu. El conceyu asturianu de Negueira, ante'l negociu de los parques eólicos, vese agora demasiáu pequenín y quier espardese a costa de los d'Allande y Grandas, aprovechando l'artrifiosidá de les sos propies fronteres "municipales".

Hasta hai poco, a naide paecía importa-y los problemes de llendes nel valle asturianu del Navia debío en parte a la despoblación y al pocu valir de los terrenos montesinos, pero dende que se pon en marcha los planes d’instalación de grandes molinos de vientu, los intereses sobre los terrenos paez que vuelven a cobrar fuerza. Asturies perdió en 1834 los conceyos de Burón, Conforto y Suarna, pero naide pudo o foi quién a desllendar a les clares esa nueva frontera artificial yá que la natural ya histórica, esto ye, la frontera del ríu Eo, paez que sigue siendo la única fiable pa desllendar les tierres d’Asturies y de Galicia.