11 Centenariu de Fuela II d'Asturies

Nesti añu de 2010 Asturies celebra la conmemoración de los 1100 años de la proclamación del rei Fruela II d'Asturies (910-925) xunto cola reina Nunilo na capital de la Corte, Uviéu. La figura d'esti monarca asturianu foi tan importante pa determinar l'actual territorialidá asturiana que se caltuvo cuasi inalterada hasta l'añu 1835 cuando entraron en vigor les actuales demarcaciones provinciales hespañoles d'Uviéu, Lugo, Lleón, Santander y Bizcaya. En morriendo Alfonsu III el Grande, el reinu repártese amistosamente ente los fíos d'ésti, pautandose accesiones de los mesmos en casu de muerte de dalgún de los hermanos. Al príncipe Fruela correpuénde-y el territoriu de l'Asturies primixenia, la que va del ríu Eo hasta Guipuzcua (ríu Deba), lo que foi el territoriu del primer Reinu d'Asturies na época d'Alfonsu I y Alfonsu II, quedando Galicia y la meseta pa los sos hermanos mayores. En morriendo éstos, ye Fruela II d'Asturies el que en 924 vuelve a ser rei de tolos territorios asturianos heredaos de so padre, dende Portu hasta Bizcaya. La dinastía de Fruela II había continuar llexítimamente na tiesta del so fíu Alfonsu IV Froilani, pero sucesives guerres civiles colos sos primos pola primacía acabaron cola dinastía froilana, que supunxo la derrota y partición d'Asturies y la so posterior dependencia de los reinos lleonés y castiellanu. Les modernes fronteres territoriales d'Asturies són les marcaes pola partición del añu 910, esto ye, les pertenecientes al reinu de Fruela II d'Asturies, cuyos restos mortales reposen güei na Catedral d'Uviéu. Fruela II foi un rei mui estimáu na so época y entama'l so reináu cola famosa donación a la catedral d'Uviéu de la pervaliosa Caxa de les Ágates, que lleva grabada en plata la Cruz de la Victoria de Pelayu, ufiertada por él y pola reina Nunilo como símbolu de maxestá y de predilección pol territoriu asturianu, el territoriu orixinariu y primixeniu del reinu. Los territorios nos que gobernó Fruela II y el so fíu Alfonsu IV correspuéndense colos territorios d'Asturies al que pertenecíen el territoriu d'Autrigonia (Bardulia) y Bizcaya anque esti corónimu ye posterior. Bardulia y Bizcaya posteriormente pasaríen a depender en sucesives ocasiones, de los reinos de Navarra y llueu de Castiella.