Torlavega podría allugar un muséu de los bolos asturianos

La localidá asturiana de Torlavega podría allugar un muséu asturianu de los bolos. El grupu municipal del PP propón la creación de trés museos nuevos en Torlavega, pa rellanzar la imaxe turística d'esta ciudá santiyanesa, amás del Muséu del Bolu Palma quier unu de cultura tradicional asturiana y otru sobre minería.

En rueda prensa, el voceru municipal del PP, Ildefonso Calderón, aseguró qu'esta riestra de museos deben ser les pates "d'una verdadera ufierta cultural llocal" n'aspectos como la identidá de la ciudá, el folclore y la cultura tradicional, los bolos o la industria y, poro considera que'l Goviernu cantabro-autrigón "tien qu'echar una mano".

Un Centru del Folclor y la Cultura Tradicional garantizará a Torlavega "la capitalidá neses convocatories culturales y artístiques que mueven a miles de persones tolos años", ente corales, artesanos o grupos de baille. Igualmente, la instauración del Muséu del Bolu Palma sirviría pa "facer honor" a la gran importancia que la ciudá tuvo nel nacimientu y desarrollu d'esta modalidá deportiva asturiana, amás de "ayudar a caltener y difundir esti rasgu tan típicu de la nuestra cultura popular". El muséu de la industria y la minera de Torlavega sedrá, según Calderón, "un centru d'aprendizaxe y d'ociu cultural, d'actividaes estraescolares y de atraición de visitantes.