La lliteratura dialectal d'Asturias de Santiyana analizaráse na Xunta d'Escritores Asturianos

La lliteratura dialectal d'Asturias de Santiyana

analizaráse na Xunta d'Escritores Asturianos

La lliteratura dialectal de los escritores d'Asturias de Santiyana ye'l títulu de la conferencia que Xaviel Vilareyo llevará alantre dientro la programación de la Xunta d'Escritores Asturianos 2010 correspondiente al miércoles 13 de xineru. La conferencia tendrá llugar nos salones del palaciu Villa Madalena d'Uviéu a aprtir de les 17,30, llueu de la presentación del múmberu 72 de la revista La Sidra, una publicación que s'encarga de reflexar el mundu de la sidra nes dos Asturies.

La conferencia de Xaviel Vilareyo y Villamil analizará la obra de los escritores d'Asturias de Santiyana qu'emplegaron la variante dialectal del asturianu oriental nes sos obres lliteraries y el sentíu lliterariu y llingüísticu, asina como la intencionalidá de facer visible la llingua asturiana que pretendieron dar a les sos obres lliteraries, emplegando con ello una forma llingüística que dende la segunda mitá del sieglu XX yá incluso a principios de sieglu atopábase nuna regresión y diglosia frente al castiellanu. Asina, la llingua quedaba relegada a lo rural, pero la visión de lo rural que se tenía entós nun ye esactamente la mesma que la que se suel tener agora, yá qu'entós s'identificaba lo rural non colo atrasao sinón más bien colo auténtico, esto ye, cola esencia del pueblu, de lo popular. Otros escritores de Santiyana intentaron facer una lliteratura más alloñada del costumismu pero les corrientes polítiques y culturales de la postguerra hespañola nun favorecieron el desarrollu d'esta lliteratura dialectal, relegándola tamién hacia lo marxinal, marxinación de la que tampoco se llibró'l propiu José María de Pereda, escritor clave d'un rexeneracionismu patrióticu, siendo él promotor del Manifiestu políticu de Les dos Asturies, pero que pol contrario se-y relegó al rangu secundariu d'escritor local, de les clases baxes. L'apuesta de toos estos escritores polo auténtico, y mui especialmente pola ivestigación científica sobre la llingua asturiano-montañesa, entendiendo asina lo auténtico, lo autóctono, cola nueva bandera de la modernidá, de la cultura auténtica, frente a l'aculturación de lo foráneo, frente a la castiellanización. Rescatar del inxustu olvidu a varies xeneraciones d'escritores santiyaneses qu'escribieron n'asturianu oriental ye una de les xeres que se propón esta Xunta d'Escritores Asturianos 2010 con esti nuevu trabayu de Xaviel Vilareyo.

La Xunta d’Escritores Asturianos 2010 falará del nacionalismu asturianu y de les relaciones ente la lliteratura, la identidá y la nación nel casu asturianu. La relación ente nación y lliteratura ye un vieyu tema presente en tola historiografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial. Esta nueva edición del 2010 tendrá llugar n'Uviéu los díes 11, 12 y 13 de xineru. Les actividaes tán destinaes tanto a escritores como al públicu en xeneral yá que l’asistencia ye gratuíta y consisten nun ciclu de conferencies, debates, alderiques, presentaciones de llibros, amás tolos asistentes recibirán como regalu reproducciones de mapes históricos d’Asturies. Nesta edición el lema de les xornaes falará de cómo los aspectos identitarios afecten al fechu d'escribir nuna llingua minorizada y non oficial como l'asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. La Xunta d’Escritores Asturianos tendrá llugar n’Uviéu nel palaciu de Villa Madalena, situáu nel antigu Paséu de la Siella del Rei. Na Xunta presentaráse'l Llibru d'Actes del anterior aconceyamientu que lleva por títulu "Lliteratura asturiana y compromisu", a cargu d’Esther Prieto. El programa cuntará amás con conferencies y presentaciones de Javier Cubero, Xaviel Vilareyo, Daniel Cueli, Pablo Martínez, Helena Trexu, Xuan Carlos Crespos, Dorita García, Inaciu Galán, Laura Marcos, Benxa Pérez, César García, Llucía Fernández y Marcos Abel Fernández. Esta edición del 2010 quier recordar tamién los centenarios de Fruela II y del arquitectu asturianu Miguel de la Guardia.




LLUNES 11 XINERU:


- 17h. Presentación del llibru Lliteratura asturiana y compromisu, actes de la Xunta d’Escritores Asturianos 2008. Presenta: Esther Prieto.- 17,30h. Llingües, clases y nacionalismos. Javier Cubero.- 18,30h. L’idioma asturianu na Asturias de Santiyana. Xaviel Vilareyo.- 19,30h. Presentación de los númberos 4 y 5 de la revista N’AST. Daniel Cueli.- 20,30h. Centenariu de Miguel de la Guardia (Hontaneda 1859 – Uviéu 1910), arquitectu de Villa Madalena.




MARTES 12 XINERU:


- 17h. De cómo una llingua s’enfrenta a la muerte. Pablo Martínez Testa.- 17,30h. Nación y llingua. Helena Trexu.- 18h. Presentación del llibru Abismos, adicciones y papeles azules, de Xuan Carlos Crespos.- 18,30h. Crónica del rei Fruela II d’Asturies (910-925) Xaviel Vilareyo.- 19h. El procesu creativu. Dorita García. Presentación de la so obra narrativa.- 19,30h. Presentación del númb. 6 de la revista Formientu.Inaciu Galán, Laura Marcos, Benxa Pérez y César García.- 20h. Recital de nueva poesía asturiana.




MIÉRCOLES 13 XINERU:


- 17h. Presentación del númberu 72 de la revista LA SIDRA. Llucía Fernández Marqués.- 17,30. La lliteratura dialectal de los escritores de Santiyana. Xaviel Vilareyo.- 18,30. El periodismu nuna llingua minorizada. Inaciu Galán.- 19,30. Antoloxía poética de la Xeneración del Compromisu (1967-1982)- 20h. Presentación del llibru Historia del Cine Asturianu, de Xaviel Vilareyo.Presenta: Marcos Abel Fernández.




ENTRADA LLIBRE: Tolos asistentes recibirán como regalu mapes históricos d’Asturies.