Uviéu, memoria encesa d'una provincia

Acaba salir al mercáu suvencionáu un nuevu exemplar, y yá van 26, de la revista d'historia, arte y tradiciones populares nomada "Asturies". La provincia d'Uviéu yá esistía dende la época de los castros yá incluso dende la época de los dinosaurios. Yá dende entós ye onde se ve claramente que Negueira o Tresvisu nun pertenecíen a esta provincia. Esta ye, polo menos, la tesis fundamental, la idea central, que preside toos y caún de los númberos d'esta costosa revista, idea de la que, insistente y machaconamente, nos quieren torpemente convencer cola edición d'esta publicación que sal col subtítulu de "memoria encesa d'un país". Nel país de los ciegos el tuertu ye'l rei y nun hai más ciegu que'l que nun quier ver. Esto ye polo menos lo que nos diz la sabia sabedoria popular castiellana. Nel país (más bien na provincia) de los mil etnógrafos, mil bables, mil bailles, mil quesos, mil gaites, mil tonás, mil horros y mil madreñes (toes diferentes ente sí como nun podía ser menos), nun hai un solu etnólogu que tenga la vista bien enfocada pa ver qu'Asturies ye plural porque son dos rexones o países d'una mesma nación. Nos númberos d'esta ínclita publicación, conocida como la revista de la sección masculina, paez que nun hai naide que nos rellate les vicisitúes d'esta nación femenina y plural, d'esta Asturia d'Uviéu y d'esta Asturia de Santiyana, d'estes Asturies, d'esta Asturies que dende tiempos del buen rei Fruela II vien siendo una nación única nel sentíu más clásicu d'esta pallabra. Naide, nunca, o enxamás, son pallabres que paez que casen mui bien con esta provincia d'Uviéu, tan galana y pizpireta ella, y mentirosa como les ñaples de Pinocho; pero posmoderna y vacía de sigo mesma tamién. Sedrá ello porque quizabes el que paga manda y por ello naide quixo o pudo amosar a les clares a esta tierra, a esta Asturies d'esencia sincera y d'historia entera, a esta Asturies del suañu dormíu, esconsoñándose malpenes de los narcóticos provincialistes de la tradición de la censura, de La Quintana, del Centru d'Estudios Asturianos, del IDEA, de la Sección Femenina y del Grupu Etnográficu Belenos. Algún día, Asturies, desvelaráse al mundu col rellumu de la so memoria, la memoria encesa d'una pequena nación.

Xaviel Vilareyo

Vecín empadronáu n'Uviéu.