1100 años de territorialidá asturiana
Xaviel Vilareyo
Nesti mes d’avientu de 2010 cúmplense los XI sieglos de la muerte d’un de los reis más importantes d’Asturies: Alfonsu III el Grande. Meses enantes de la so muerte en Zamora los sos trés fíos escorónenlu probablemente por discrepancies polítiques col yá vieyu rei pues el príncipe García sufriera prisión por rebelase y el príncipe Hordoñu governaba Galicia como conde del reinu. Deséu del rei fuera meter a los sos fíos na xera de la governanza yá durante’l so propiu reináu y paecía que llegaba’l momentu d’un relevu. Nun se sabe por qué pero puede que les discrepancies fueren fondes, de tipu políticu: Alfonsu quería seguir la guerra de conquista más pal sur del Dueru y los fíos, cansaos de tanta guerra, preferiríen consolidar lo yá algamao, que yera abondo pues el Reinu d’Asturies algamaba dende’l Dueru portucalense hasta Álaba y Bizcaya. Organizar internamente tolos condaos del reinu y los nuevos territorios yera en verdá más necesario qu’entamar nueves campañes peligroses de conquista contra los moros. La solución que se dio entós nun foi tan estraña yá qu’esistía’l precedente del reinu de Carlomagnu: dividióse’l territoriu del reinu ente los trés fíos mayores, García, Hordoñu y Fruela. En realidá foi un pactu ente hermanos pa desplazar del poder al padre que presionáu polos fechos y pola reina Ximena retiróse pal monasteriu de Boides. Si ún de los hermanos morría, el territoriu pasaría pal que sobreviviera, como asina foi. García, que yá tenía funciones militares nel valle del Dueru, quedóse col territoriu mesetariu al sur de los montes asturianos. Hordoñu, que yá yera conde governador en Galicia, convirtióse en rei de Galicia. Y Fruela, que vivía nel palaciu d´Uviéu ayudando a so padre en tou, quedóse a títulu de rei d´Asturia cola parte más antigua y primixenia del reinu, aquella que comprendía l´obispáu d´Uviéu y que va dende la llende del cursu enteru del ríu Eo (la Ribera d´Ovetus) hasta la frontera de Guipuzcua, palabra ésta que significa en bascuence precisamente eso, llende.
Froíla II proclámase na catedral d´Uviéu xunto cola so muyer Nunilo como nuevu rei d´Asturia en mayu de 910 mediante´l ritu ancestral del unximientu pola Ilesia. Los sos actos como soberanu d´Asturia tán orniaos con gran ceremonia y protocolu. Prueba d´ello ye la solemne donación a la Ilesia d´Uviéu de la magnífica Caxa les Ágates, un símbolu del so poder y del so reináu, llabrada en plata y oru y que tien grabada na base la Cruz de la Victoria como símbolu del reinu de Pelayu y de so padre qu´él mesmu heredaba. La Caxa les Ágates lleva nel centru un broche o xoya d´orería céltica más antigu, probable herencia de so padre. Símbolu tou ello de la so alianza col territoriu heredáu, cola so dinastía y cola Ilesia, probando con ello l´empiezu de futures decisiones de siguir donando bienes a la Ilesia d´Uviéu.
El territoriu qu´hereda Fruela II a títulu de rei d´Asturia nel añu 910 ye l´escomienzu del territoriu que conocemos anguañu como “Asturies” y que ta marcáu nel oeste pol cursu fluvial del ríu Eo, llende tamién del obispáu ovetense, frente al territoriu d´Hordoñu, esto ye, la Galicia; y nel sur, la llende con García ta marcada poles vertientes d´agues de los ríos que desemboquen pal norte. Hacia l´este la frontera del reinu de Fruela II yera Guipúzcua y los imprecisos territorios del nuevu reinu de Pamplona. La futura espansión y poderíu d´esti reinu pamplonés hacia territorios d´Asturia fai que Pamplona gane territorios política y militarmente nos sieglos posteriores llegando la llende de Pamplona y Asturies a tar delimitada nel ríu Miera durante munchos años, antes del surdimientu y espansión d´otru nuevu estáu que se superpondrá a dambes entidaes territoriales que ye la Castiella condal. Asturia cola espansión pamplonesa quedaba reducida al territoriu del Obispáu d´Uviéu, dende´l ríu Eo al ríu Miera. Nel sieglu XI esti territoriu enterríos, Asturia, yá se conoz con un nome plural: les Asturies. Ello ye asina porque l´oriente d´Asturia venía conociéndose como Asturia de Santiyana por pertenecer a esti importante monasteriu. La espansión de Castiella y la so anexión de les Asturies de Santiyana ficieron el restu pero ésto yá entama ser otra historia, la historia del amenorgamientu territorial d´Asturies.
Entradas
