Entrevista a Xaviel Vilareyo autor de "Los ámbitos de la Nación Asturiana"

Falemos col escritor asturianu Xaviel Vilareyo y Villamil (Mieres del Camín, 1967) sobre'l so últimu llibru "Los ámbitos de la Nación Asturiana", que vien d'asoleyalu cola editorial Espublizastur dientro de la so coleición "Ensayu". Anque Xaviel Vilareyo tien asoleyaos abondos artículos, collaboraciones periodístiques y ensayos en delles revistes, con “Los ámbitos de La Nación Asturiana” espubliza'l so primer llibru d’ensayu.
Xaviel Vilareyo, llicenciáu en Derechu, profesor d'Institutu y escritor, foi gallardonáu con dellos premios lliterarios tien publicaes delles obres: Cróniques del recuerdu (Ed. del Norte,1997), Más que probable (Ed. Vitrubio,1998), Os novos poemas (Xeira,1999), El camín d'inquietú (Ed. del Norte, 2001) y La causa más probable, (Trabe, 2007). Amás tamién publicó en delles revistes como “Lliteratura” y “Lletres Asturianes”, ente otres munches.


-Si nun nos equivocamos, pesie a tener espublizaos dellos llibros, entovía nun publicares dengún ensayu llargu. Cuéntamos un poco cómo foi el procesu d’ellaboración d’esti ensayu.

L’ensayu surdió yá que personalmente siempre me llamó l’atención el xeitu nel que s’usen los axetivos asturianu y asturiana. Les élites politiques eviten esti axetivu yá que pa ellos ye una especie de tabú y prefieren usar otros axetivos como “rexonal”, “llariegu” o “autóctonu”. Ye increíble que presumiendo de saber tanto, haya tantu investigador, científicu y espertu que pretenda pasar por historia, cultura, llingua, gastronomía... asturianes, dalgo que si lo mires bien en realidá nun ye más qu’estudios referíos sólo al ámbitu territorial de la provincia d’Uviéu. Yo a eso lo llamo provincialismu que ye dalgo peor que’l provincianismu. El provincianismu polo menos ye socioloxía pero’l provincialismu ye daqué nefasto porque ye ignorante y nun sabe qué ye lo qu’esiste.
N’Asturies faltónos una figura como la de Caro Baroja en Vasconia qu’analizara tol procesu históricu del pueblu y la cultura asturianes na so globalidá. Siempre hubo visiones parciales y restrinxíes d’Asturies y lo asturiano, de temes concretos, pero faltónos una visión xeneral de too ello. Y esa visión xeneral nun ye otra cosa que’l País Asturianu.

-El llibru ta espublizáu ensin denguna subvención ¿Ye difícil publicar un llibru como ésti y d’esta temática n’Asturies? ¿Cómo ves el panorama editorial n’asturianu?

Bueno, ye como entruga-y al enforcáu qué opina de la soga. Pues opino qu’hai afortunadamente abonda xente qu’escribe bien n’asturianu pero pal poder dominante somos yá munchos y la llingua nun ye nin oficial, el gobiernu piensa que somos yá demasiaos los qu’escribimos n’asturianu y yá nun sabe qué facer con toos nós. Primero quier desmoralizanos colo de dar más dineru en premios pal castellanu que pal asturianu. Segundo quier que dexemos d’escribir n’asturianu a base d’enfrentar a un grupu d’escoyíos o afines al poder col restu. Tercero, quier controlar lo que s’edite a base d’unos criterios políticos ya ideolóxicos nel repartu de los presupuestos y suvenciones. Cuarto, quier evitar protestes del colectivu a base d’engaños. Trevín dixo a un grupu d’escritores orgánicos que de nun haber oficialidá habría dineru asgaya pa toos, intentando compra-yos la so voluntá y esa ye otra mentira más del PSOE, el dineru qu’hai pal asturianu ye y sedrá más bien escoso porque quieren seguir dixebrando too. En resume, cualesquier babayada posmoderna que nun comprometa va publicase si yes afín o amigu del partíu gobernante, si non, tien que ser mui bueno o interesante pa que dalguién te lo publique. Otra solución ye que cada escritor entame la so propia editorial particular que ye más o menos lo que ta pasando agora porque les editoriales convirtiéronse en simples intermediaries y clientes del poder. Menos mal que surdió Espublizastur.

-¿Qué acoyida ta teniendo’l llibru? ¿qué te comenta la xente que yá lu lleó?

Mui bona acoyida. Sorpréndense de que nun seya un llibru con intención ideolóxica, nel sentíu de partidista. La cultura nun ye de dereches nin d’izquierdes y la etnoloxía tampoco tien ideoloxía nin sigles. La cultura asturiana ye de tolos asturianos de toles tendencies y lo mesmo podemos dicir del territoriu, de la música o la gastronomía, de les formes culturales en xeneral. Conservar les tradiciones nun significa ser conservador na moral o na política. Como querer el progresu económicu de los pueblos tampoco significa ser un progresista. Toos queremos lo bueno y rechazamos lo malo. La esistencia de les naciones y los pueblos ye dalgo bueno y positivo porque ye consustancial a la esencia del ser humanu, somos seres sociales y colectivos con formes culturales comunes y especifiques. Y eso ye lo guapo del ser humanu, que formamos pueblos y colectividaes, países y naciones, llámémoslo como lo llamemos. Falar de nacionalidaes o de comunidaes autónomes o de rexones paezme daqué horrible porque ta mui politizao. El conceptu etnolóxicu de nación ye nesti sentíu el más neutru y el que más respetu tien por parte de les ciencies sociales. Formar parte d’una nación cultural nun significa tener que votar a una organización política nacionalista, falamos de conceptos culturales y non de grupos políticos. Yo creo que la xente que lleó’l llibru entendió mui bien lo que quiero desplicar nél.

-¿Por qué ves necesariu l’alderique alredor de los ámbitos de la nación asturiana?.

N’Asturies tenemos que reivindicar la historia asturiana inda más que la llingua asturiana. Asturies esistió como realidá física muncho antes de que surdiera la llingua asturiana romance. Nel casu asturianu nun ye la llingua la que conforma la nación sinón la historia. L’idioma asturianu ye un elementu importante pero non l’únicu configurador. La llingua, como’l folcore o la cultura cambien y evolucionen pero la idea de nación asturiana remanez nel tiempu como la casa común de toos. La nación asturiana nun ye nengún inventu artificial. Oxetivamente la nación asturiana esiste y ta ehí esistiendo con una tradición más que bimilenaria. Otra custión ye si esa realidá material nos presta o non, si nos sentimos arguyosos d’esa especificidá o si nos avergoñamos d’ello, pero ésto ye más propio de la socioloxía y nun ye tema del mio llibru yá que de lo que falo son de realidaes históriques. Too cambia menos la idea de nación. Ye la nación la qu’adopta nueves realidaes culturales como propies o nacionales. Igual que s’inventen neoloxismos tamién surden fechos culturales que la nación en conxuntu adopta como propios. Ensin una idea clara de nación asturiana la cultura propia ye imposible de caltener y conservar, y muncho menos la llingua. El territoriu ye un elementu básicu pa la identidá nacional.

-El llibru afítase sobre’l conceptu d’ethnos y los ámbitos del ethnos o nación asturiana nel tiempu. ¿pues desplicamos per enriba que ye l’ethnos asturianu y dende qué planos lu analices?

Intento analizar l’ethnos asturianu nel sentíu propiu de pueblu o grupu nacional, el conxuntu d’individuos de la mesma cultura y l’ámbitu territorial d’esta nación. La etnoloxía asturiana sedría asina la ciencia qu’estudia según criterios sintéticos tola cultura nacional asturiana no que ye propio y definitorio d’ella mesma. Falo d’etnoloxía y non d’etnografía yá que n’Asturies más que d’etnografía tenemos que falar d’etnoloxía puesto que los asturianos somos una nación o pueblu y non una raza o una tribu esperdigada. Lo museos n’Asturies tienen que nomase etnolóxicos y non etnográficos. La etnoloxía non sólo describe sinón qu’interpreta. La etnografía equival a la dialectoloxía, al datu concretu específicu, analíticu, mentantu que la etnoloxía equival a la llingüística, a la visión xeneral y sintética. N’Asturies fáltanos eso, sobra análisis y falta síntesis. Sobren etnógrafos y falten etnólogos. Naide se preocupó en facer un mapa de los teitos de paya, de los horros, de la gaita, de la llingua, de la mitoloxía, de los bolos... de tantes coses. Eso sí, monografíes d’un conceyu, d’un valleyu, o d’un llugareyu hailes hasta l’aburrición.
Tamién falo de la etnoxénesis asturiana, de cómo se formó la nación asturiana a lo llargo la historia y cómo ye ésta la que la conforma y cómo se va afitando l’ambitu territorial d’esta nación.

-Esti ye’l primer llibru qu’entra dafechu na problemática territorial d’Asturies, de les llendes de la nación asturiana. ¿Cómo te tomes les posibles crítiques que puen venir, tanto dende’l “Principado” como dende fuera, al nun coincidir les llendes que propones coles alministratives?

Pero les crítiques nun pueden dir contra min sinón contra la propia historia o contra la propia etnoloxía que describo. Tamos falando d’opiniones y yo nel mio llibru nun doi la mio opinión de lo que describo sinón que lo qu’ufierto son datos, quiciabes demasiaos datos pa un solu llibru. Por exemplu, lo que nun mento nel llibru ye la posibilidá que se baraxó na preautonomía de facer coles provincies d’Uviéu y Santander una sola Comunidá Autónoma conservando les dos diputaciones. Tampoco falo de la idea de xuntar Asturies con Lleón, o de qu’Asturies participe na nueva lliga de fútbol de les naciones celtes. Yo nun falo nel llibru d’esto, d’opiniones. Podemos criticar les idees de caún pero criticar los datos históricos y los elementos etnolóxicos ye ridículo. Agora bien, si un horru o una gaita dicimos que son asturianos tenemos que saber mui bien a qué nos tamos refiriendo, son asturianos porque tán en y son d’Asturies, por eso tenemos que tener una idea mínimamente clara de lo que ye físicamente Asturies.
El Pincipáu d’Asturies en realidá diba del ríu Eo al ríu Miera nos sos oríxenes baxomedievales, ye de les dos Asturies. Ye difícil d’entender pero la dixebra alministrativa de les dos Asturies nun dixebró la nación o ethnos. Ye más, hai años dieron la noticia de que’l gobiernu de Cantabria solicitaba que’l príncipe hespañol fuera tamién príncipe de Cantabria, nel so afán por cantabrizalo too, y tienen la so razón porque los príncipes lo yeren de Les Asturies, d’Uviéu y de Santiyana. Negalo sedría reconocer l’absurdu de que Peñamellera y Ribadedeva nun pertenecen al Principáu porque son Asturies de Santiyana. El Principáu yera too y ehí tán los mapes históricos.

-En “Los ámbitos de la Nación Asturiana” entres tamién nos Derechos Históricos d’Asturies. ¿ Ye un tema escaecíu dientro de les vindicaciones nacionales asturianes?.

Los Derechos Históricos Asturianos nun són nenguna novedá, ehí tán les Ordenances históriques por exemplu, el derechu civil asturianu. Hai abonda doctrina constitucional yá que la Constitución hespañola reconozlos y ampáralos, nun ye nenguna ideoloxía nacionalista, son derechu reconocíu y llegal. La novedá que planteo ye la idea de la territorialidá asturiana como derechu históricu, pero esa idea hai que rebatila con argumentos históricos y xurídicos non con descalificaciones de nengún tipu. La territorialidá asturiana ye mui clara na historia pero sufrió unos recortes impuestos. Cataluña tamién perdió territoriu, el Rosellón, pero sólo físicamente porque anímicamente siempre lo tienen presente. A min gustaríame que tolos asturianos, nacionalistes o non nacionalistes, de dereches o d’izquierdes, toos tengan siempre presente’l territoriu históricu d’Asturies nel so corazón.

-La conclusión del trabayu son los ámbitos actuales del ethnos asturianu ¿Cuálos son los ámbitos de la Nación Asturiana?

Si los ámbitos históricos de la nación asturiana son claros los actuales nun lo son tanto, polo menos pa muncha xente. Ye ehí onde l’ensayu aporta la idea de que l’ámbitu actual del ethnos asturianu algama dende’l ríu Eo al valle del ríu Nansa. Ye’l cursu enteru del ríu Eo y non sólo la so ría la que fai la llende política yá dende’l sieglu XI, pero curiosamente tamién ye ésta una llende cultural y los asturianos tenemos que tenelo mui presente. Otra llende márcala la vertiente o divisoria d’agües al norte y al sur del cordal asturianu. La fonte del Ebro siempre foi onde terminó Asturies, pero según el conceptu oxetivu de nación nos otros valles más orientales d’Asturies de Santiyana y Tresmiera l’asturianidá foi perdiéndose pol influxu castiellanu, pero nun dexa de ser otra idea porque s’investigáremos a fondu en sentíu sintéticu y non analíticu a lo meyor atopamos munchos más elementos culturales y llingüísticos de los que pensamos nun principiu y que son comunes y compartíos col restu d’asturianos.

-Tampoco vamos desvelar tol llibru asina que lo meyor ye que la xente lu merque. ¿Por qué deberíemos mercar “Los ámbitos de la Nación Asturiana”?

Porque a los asturianos se nos intentó tapecer y manipular la nuesa historia pa que nun la reivindiquemos, pa que nun reivindiquemos nada. Porque hai qu’entender que non sólo se minorizó a la llingua o a la cultura asturianes sinón mui fundamentalmente minorizóse’l propiu territoriu d’Asturies. Porque la historia nos da les claves pa interpretar qué ye lo que-y pasa güei a Asturies, un país desilusionáu con una clase dirixente desilusionada, que nun siente’l país nin la so cultura. Por ello, tenemos que confíar menos nos políticos y más en nosotros mesmos, nel poder rexenerador y cultural que puede facer el pueblu asturianu en conxuntu. Y esta idea pa min ye una idea ilusionante. Non sólo hai que facer país, frase tan repetida como vacía, hai que pensar país y sobre too sentir país. Si nun pensamos nin sentimos el país, la nación o la tierra asturiana, nun podremos facer nada sobre ella.

-Pues despedímonos animando a la xente a mercar el llibru. ¿Quies dicir daqué pa finar?

Que anque a veces digamos lo contrario, nel fondu toos sentimos muncha allegría de ser asturianos de verdá, de pertenecer a esta patria asturiana nuesa, con una historia tan dura de resistencia, emigración y probitú y lo pequeno que somos, creo que fai que sintamos toos como ciudadanos d’Asturies dalgo mui especial y afalagador.

INFOASTURIES

Garabanduya fai un trabayu sobre los gaiteros de La Llébana

Garabanduya fai un trabayu sobre los gaiteros de La Llébana

El grupu d'investigación folclórica Garabanduya fizo un trabayu d'investigación sobre los gaiteros históricos de La Llébana. Esta rexón, como Rionansa o Polaciones son tierres de fonda tradición gaitera y tamboritera. Nel so folclor tamién s'atopen les tonades tradicionales con panderu y un sin fin de bailles y cantares típicos. Garabanduya formen tamién una Banduca de gaitas, palabra que significa xarangana o folixa, y nació en Torlavega, a fines del añu 2007, aunque los sos miembros proceden de llugares como Renedo de Piélagos, Santoña, Colindres, Limpias, Ampuero y Torlavega. La so páxina güeb ye http://www.garabanduya.wordpress.com/

Michelin edita un mapa de les dos Asturies

Michelin edita una nueva guía de carreteres de les dos Asturies, un nuevu mapa qu'axunta en parte a los territorios históricos asturianos. El mapa y la guía pueden mercase nes tiendes al usu y ufierta amás una guía de recursos turísticos, restoranes y monumentos.

Homenaxe a los gaiteros asturianos de La Llébana

Homenaxe a los gaiteros llebaniegos d'Asturies de Santiyana

La Llébana ye una tierra rica en tradiciones, ente elles destaca sobremanera la tradición de los gaiteros de la música tradicional de gaita y tambor. Dende los gaiteros más antiguos del sieglu XIX de los que se tien noticia como'l míticu gaiteru Tonino Gándara, el gaiteru Casamaría, Domingo Félix, Ángel Gonzalez de Roza, Florencio Prado, Macario de Valdepráu, Francisco Torre, ente otros hasta los más modernos del sieglu XX como Santiago Conde, Pedro de Valdáliga, Carpio de Peñarrubia, Carpio de La Hermida, Marcelino de Camaleñu, José González de Rionansa, Romualdo de Cillórigu, Suárez de Cabanzón, Francisco García "El Ciegu", Toñín Gándara, Vicente de Caloca, Manuel el Chalaneru, Santiago de San Andrés, Roger Guerra, Toñín y Ramón Sierra, Paco de San Pedro, Cantora, Vicente de Caloca. La Llébana tamién ye una tierra de tonadas. Nos últimos años vienen destacando sobremanera los cantantes de tonada Sergio Argüero de Torlavega y el so hermanu, Aurelio Ruiz y Julián Revuelta, el Malvís de Tanos.

Lines Vejo y el so camín de cantares asturianos

Lines Vejo y el so camín de cantares asturianos

Lines Vejo ye una de las meyores representantes de la cultural músico-oral de La Llébana, nacida en tiempos de la República esta llebaniega ye una de las grandes custodias del tesoru poético-musical d'esta parte de las Asturias orientalis, las tonás llebaniegas. Caloca ye una población del valle de Llébana na que cuando Angelines vio la lluz enos años trenta tenía una población de doscientos cincuenta habitantes, hoi apenas supera el mediu centenar. La vida nesti llau del Cantábricu nunca foi fácil y d'ello dan buena cuenta un sin fin de cantares que relataban los avatares, las alegrías y las penas, que de too hai, d'esta rexón llebaniega que tuvo cultivada hasta non f.az muchos llustros pol ritual de la vida y el ciclu agrícola. Lines ye unu de los últimos ecos d'aquellos cantos que van marcando la cambera o camín nel devenir d'esa vida. Domingos al tambor y la pandereta provocaron l'interés d'Ángeles por esti tipu d'instrumentos quien desarrolló a temprana edá unas excelentes habilidaes colas percusionis. Las llargas nuechis del iviernu fueron propiciatorias pa que las f.ilas, llugar d'arrex.undiu pa trabayar la llana, se llenaran d'historias, romances y coplas, de la que nuestra protagonista siempre anduvo atenta y sin perder detalle y de too llevantó acta tan cabal que, nel su cantu, en sus toques y en su f.abla tenemos la imaxen viva de la cultura llebaniega cuando s'alcontraba nel su meridianu.
El repertoriu de la nuestra intérprete vese chiscáu por cantos qu'integran el ritual festivu, escomencipiando dende la Pascua, al mes de Mayu, sin olvidar el baille y el ceremonial de las bodas. El baile de Caloca ye f.artu seyencu ya que se distinguen nél dos maneras, si ye "a lo pesáu” se transcribe en compás de tres por cuatru y si ye "a lo llix.eru” será medíu en seis por ochu y d'estas peculiaridades siempre anduvo Lines atenta. El presente trabayu aborda una serie de piezas que si n'algo se caracterizan ye por una intensa riqueza lírica, una magnifica voz y una vida llena de saber popular. Dientro d'esti exquisitu repertoriu cabe destacar un ricu corpus de romances como'l de “El paje y la infanta” uníu a “La Boda estorbada”, que tien de protagonista a Leonfredo conocíu en otras latitudes como Gerineldo. Dientro d'esi mesmu tipu de lliteratura destaca una guapa versión de “La doncella guerrera” que plantea cierta similitú musical con algunos aires de x.ota. El romance bíblicu de “Amnón y Tamar ” vien aquí a colación col nombri del “El seductor de su hermana” y que nesta versión llebaniega plantea claras semeyanzas formulaicas col romance de “La muerte del príncipe don Juan”, otros dos testos romancísticos d'interés son el “Romance de la Virgen y el Rey” y otru procedente del romanceru vulgar. En cuantu a los cantares destaca una f.ermosa “molinera” y otros dedicáu a Mayu. Pero si hai algunu que sobresalga n'especial ye “Nuechi tranquila y serena” grabación que data de 1986, unas de las tonadas más guapas del repertoriu asturianu. Otra x.oya qu'encierra esti rex.istru son unos “Cantares de boda pa entregar la gallina” y “La norabuena de los novios ” dambos guardan un altu valor simbólicu. Nun termina'l discu ahí, sinón qu'arrex.untia dos narracionis y un par de piezas cantables más. Un discu rellumantemente bien presentáu que demuestra, una vez más, lo bien que se puen f.acer las cosas, nesti casu, el gran méritu ta f.echu por José Manuel Fraile Gil y la empresa que lu tien editáu, "Cantabria Tradicional", esperemos qu'esti esf.uerzu se vea compensáu con edicionis asemeyás a ésta.”

La Banda Gaites Vicaruela amuesa'l folclor asturianu

La banda de gaites Vicaruela
amuesa'l folclor d'Asturies de Santiyana

La gaita, esi singular instrumentu del folclor de l'Asturias santiyanesa, algama'l su vigorosu presente col X Alcuentru Internacional de Llanes que s'enmarca dientru de los actos de la festividá de San Roque pelegrín, patrón de la villa. Dientru d'esti arrex.undiu f.echu con virtuosos del instrumentu s'ax.untaron bandas de los diferentes países con rellumos celtas como Escocia, Bretaña, Galicia o Asturias. La gran novedá d'esta edición foi la presencia por primer vez d'una f.ormación d'Asturias de Santiyana cola representación de la Banda de Gaitas Vicaruela. Amás servirá como celebración del primer aniversariu de la creación d'esta agrupación, con sede en Renedu de Piélagos, un grupu f.echu n'agostu de 2007 pa recuperar y dif.undir la cultura gaiteril de l'Asturias de Santiyana. Esta banda tá f.ormada por varios músicos de gran trayectoria folclórica en diferentes grupos y agrupacionis, y cuenta cola presencia de Sergio Robledo, ganador de varios concursos de gaita. La dirección musical cuerre a cargu de Javier Súarez, maestru en diferentes escuelas de folclor de la región, con una dilatada esperiencia nesti instrumentu autóctonu. La Banda Vicaruela utiliza temas del repertoriu asturianu de Santiyana pa gaita y otras piezas del estensu repertoriu santiyanés en x.eneral. Pa estas canciones s'utilizan gaitas del constructor Felipe Robledo, tamién integrante de la Banda de Gaitas Vicaruela y los sus miembros se atavian con f.atos montañeses. La concentración de gaiteros f.ízose polas diferentes cayis de Llanes que serán amenizadas poas variadas bandas hasta que más tardi, s'arrex.unten todas llueu nun gran pasacayis pol centru de la villa asturiana, p'algamar a concentrase ena playa del Sablón. Nesti llugar del veranu d'esta turística localidá culminará el X Alcuentru con un despliegue musical dignu de disfrutar pa cualisquier amante de tan máx.icu instrumentu asturianu.

Humberto Gonzali presentó LOS ÁMBITOS DE LA NACIÓN ASTURIANA, llibru de Xaviel Vilareyo

Presentóse n'Uviéu

"Los ámbitos de la Nación Asturiana"

Esti xueves tuvo llugar n'Uviéu la presentación d'un nuevu llibru d'ensayu de Xaviel Vilareyo que tien por títulu Los ámbitos de la Nación Asturiana. Esti llibru marcará l'entamu d'una nueva visión d'Asturies, la reivindicación del so territoriu históricu. La presentación tuvo a cargu del escritor y políticu Humberto Gonzali, que resaltó la validez ya importancia del trabayu pa la recuperación de la historia nacional asturiana. L'actu terminó con un conciertu de gaita de Pelayu Cuaya y tuvo presidíu poles banderes de les dos Asturies, la d'Uviéu y la de Santiyana.

Esta nueva aportación de Xaviel Vilareyo ye documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu. Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu. El fechu de que l'ámbitu espacial del país asturianu nun coincida coles llendes alministratives actuales nun significa que se tengan qu'asimilar éstes como l'únicu marcu posible de referencia. La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos. Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana. El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país. A los asturianos se nos pretendió ocultar y tapecer la nuesa historia pa evitar que recuperáremos el nuesu lexítimu llugar nella. Los Derechos Históricos d’Asturies son irrenunciables porque sinón taríemos renunciando al nuesu propiu ser como pueblu. Esti llibru vien a recordánoslo con aciertu yá qu’olvidar la historia de los pueblos, nel casu d’Asturies pue ser sinónimu d’un suicidiu colectivu imperdonable. Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones.

Preséntase n'Uviéu LOS ÁMBITOS DE LA NACIÓN ASTURIANA

Preséntase n'Uviéu

"Los ámbitos de la Nación Asturiana"

El próximu xueves 5 de feberu tendrá llugar n'Uviéu la presentación d'un nuevu llibru d'ensayu de Xaviel Vilareyo que tien por títulu Los ámbitos de la Nación Asturiana. La presentación tendrá llugar na Biblioteca del Campu San Francisco a les 6 de la tarde y marcará l'entamu d'una nueva visión d'Asturies, la reivindicación del so territoriu históricu. La presentación correrá a cargu del escritor y políticu Humberto Gonzali.

La lliteratura asturiana d’ensayu da un reblagu importante con esta nueva aportación de Xaviel Vilareyo, nun documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu. Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu. El fechu de que l'ámbitu espacial del país asturianu nun coincida coles llendes alministratives actuales nun significa que se tengan qu'asimilar éstes como l'únicu marcu posible de referencia. La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos. Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana. El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país. A los asturianos se nos pretendió ocultar y tapecer la nuesa historia pa evitar que recuperáremos el nuesu lexítimu llugar nella. Los Derechos Históricos d’Asturies son irrenunciables porque sinón taríemos renunciando al nuesu propiu ser como pueblu. Esti llibru vien a recordánoslo con aciertu yá qu’olvidar la historia de los pueblos, nel casu d’Asturies pue ser sinónimu d’un suicidiu colectivu imperdonable. Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones.