Preséntase n'Uviéu LOS ÁMBITOS DE LA NACIÓN ASTURIANA

Preséntase n'Uviéu

"Los ámbitos de la Nación Asturiana"

El próximu xueves 5 de feberu tendrá llugar n'Uviéu la presentación d'un nuevu llibru d'ensayu de Xaviel Vilareyo que tien por títulu Los ámbitos de la Nación Asturiana. La presentación tendrá llugar na Biblioteca del Campu San Francisco a les 6 de la tarde y marcará l'entamu d'una nueva visión d'Asturies, la reivindicación del so territoriu históricu. La presentación correrá a cargu del escritor y políticu Humberto Gonzali.

La lliteratura asturiana d’ensayu da un reblagu importante con esta nueva aportación de Xaviel Vilareyo, nun documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu. Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu. El fechu de que l'ámbitu espacial del país asturianu nun coincida coles llendes alministratives actuales nun significa que se tengan qu'asimilar éstes como l'únicu marcu posible de referencia. La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos. Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana. El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país. A los asturianos se nos pretendió ocultar y tapecer la nuesa historia pa evitar que recuperáremos el nuesu lexítimu llugar nella. Los Derechos Históricos d’Asturies son irrenunciables porque sinón taríemos renunciando al nuesu propiu ser como pueblu. Esti llibru vien a recordánoslo con aciertu yá qu’olvidar la historia de los pueblos, nel casu d’Asturies pue ser sinónimu d’un suicidiu colectivu imperdonable. Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones.

PRESENTÓSE UNA CONFERENCIA SOBRE CLIENTELISMU N'ASTURIES

Presentóse una conferencia sobre'l clientelismu n'Asturies

Esti xueves 29 de xineru tuvo llugar en Xixón, nel llar de la Sociedá Cultural Xixonesa una interesante conferencia que llevó por títulu "El clientelismu político-llaboral n'Asturies" que tuvo a cargu de Xabiel Álvarez Villa, Presidente del Conceyu por Otra Función Pública, una plataforma que quier denunciar los abusos ya illegalidaes que se cometen na Alministración pública asturiana encuantes a la contratación pública, el clientelismu y la patrimonialización o apropiación de l'Alministración pública por parte de los partíos gobernantes. Xabiel Álvarez denunció nesti sentíu la esitencia d'unos 31 entes públicos asturianos que furrulen como una Alministración pública paralela, popularmente conocíos como "los chiringuitos", unos 14 entes públicos y fundaciones (Comarques Mineres, Institutu de desarrollu, Fundaciones, RTPA...) y 17 empreses diverses (SEDES, VIPASA, VALNALÓN, PARQUE PREHISTORIA, SOCIEDÁ REXONAL DE TURISMU, XESTIÓN D'INFRAESTRUCTURES CULTURALES, SOGEPSA...) que realicen funciones qu'enantes dependíen directamente de les Conseyeríes pero que dende un tiempu son sociedaes mercantiles de titularidá y capital públicos pero que furrulen según el Derechu priváu encuantes a la contratación de personal y servicios y ello pa saltase los criterios d'igualdá, méritu y publicidá que garantiza'l Derechu públicu y la contratación pública. Nun se sabe en realidá cuántos trabayadores tienen estes empreses yá qu'incluso son secretos y nin la Xunta Xeneral pue sabelos yá que dicen que son empreses privaes. SOGEPSA, una sociedá pública mayoritariamente beneficiaria de los procesos públicos d'expropiación, paez tener unos 43 trabayadores. A güeyu toes estes sociedaes empleguen a unes mil persones n'Asturies pero nun se sabe cuálos són los sos criterios y procedimientos de contratación. Toa esta rede de fundaciones, entes y empreses xeneren asina toa una rede clientelar que se crea al marxe de los principios de méritu, igualdá y capacidá nel accesu a los peustos de trabayu yá que los sos procedimientos de contratación nun són públicos. ASPASAD, una sociedá pública que trabaya con discapacitaos, reconoz que'l so procedimientu de contratación de personal redúzse al fechu de que la xente mande currículums y ellos simplemente esbillen. SERPA, una sociedá entamada como d'obres y servicios municipales qu'agora dedícase a facer tou tipu d'obres y servicios en xeneral publica ufiertes d'emplegu públicu, asina lo fizo en 2007 convocando places pa llicenciaos que se contrataben según una "comisión d'evaluación" y una "entrevista" personal polo que nun había garantíes d'igualdá, méritu y capacidá nel accesu a puestos de trabayu públicos y tampoco se respetaben los principios de publicidá nin trasparencia ya que los ciudadanos nun s'enteraben d'estes convocatories d'emplegu. VIPASA, qu'enantes dependía directamente de la Conseyería de Vivienda, agora ye una empresa privada autónoma y tuvo problemes d'acosu llaboral pero nun sabíen desplicar a la Xunta Xeneral cómo contrataben al personal yá que lo facíen "poniendo un anunciu nel periódicu".

Nes oposiciones públiques denuncien artitrariedá total debío a la irregularidá na constitución de los tribunales de selección yá qu'estos nun se faen por sortéu sinón por nomamientu directu a deu de los sos miembros lo que permite al gobiernu formar mayoríes partidistes y non ecuánimes. Na alministración asturiana más del 26% de los puestos de trabayu, según el Conceyu por Otra Función Pública, son funcionarios de llibre desiganción, esto ye nomaos a deu pol gobiernu. El restu los puestos cúbrense en teoría por concursu de méritos pero na práctica tamién tán puestos y nomaos a deu. Los concursos nun se convoquen nin se publiquen y abúsase de les comisiones de servicios. Denuncien concursos fechos a medida que llueu los tribunales independientes anulen por tar viciaos de raigañu nel so procedimientu. Denuncien places que se dan d'antemano a xente previamente contratao a los que se-yos fai una oposición "a medida" na que se-yos esixe esperiencia o por exemplu saber "alemán". El casu sangrante afecta al cuerpu d'Interventores yá qu'en teoría deberíen ser xente independiente pa poder fiscalizar les cuentes públiques pero na práctica son puestos políticos nomaos a deu y que por recibir esi favor devuelven el favor al gobiernu non fiscalizando nin controlando como deberíen. Too esto na Alministración autónoma pero nos Conceyos pasa lo mesmo. Muérganos de control de gobiernu como la Procuraduría Xeneral o la Sindicatura de Cuentes nun són independientes yá qu'esos cargos tán politizaos dafechu y nun són imparciales precisamente pa nun controlar los desmanes del gobiernu. Xabiel Álvarez denunció que tolos trabayadores de la Procuraduría Xeneral tán nomaos a deu y na Sindicatura de Cuentes tolos puestos clave són tamién de llibre designación colo que nun pue haber control nin fiscalización de les cuentes axeitada yá que deben el so puestu al que los nomó, esto ye al gobiernu que fai de patrón y polo tanto son cargos vasallos o clientes del poder políticu. Cada vez hai más puestos de llibre designación na Alministración como los nomaos coordinadores que nun suelen tener funciones propies y suplanten a otros funcionarios. Denúnciase tamién que a les nueves promociones de funcionarios a los pocos meses nómenlos a deu con altos cargos d'alta responsabilidá como lletraos del Serviciu Xurídicu del Principáu ensin seguir una carrera de méritos ou honores que conlleva tiempu, asina de los 16 lletraos actuales sólo dos tán nomaos por concursu de méritos y el restu tán nomaos a deu. El procedimientu descritu ye más que clientelar, en palabres de Xabiel Álvarez, ye un procesu d'enfeudamientu o vasallaxe políticu, de vinculación al señor que da y reparte puestos, hasta'l puntu de ridículu que tien que cuando un cargu cesa cesa tamién con él una especie de corte feudal de contrataos a deu y que si marcha pa otru puestu esa corte marcha tres él a esi departamentu, empresa, ente o fundación. Tou esti proceder denuncien que nun ye democrático nin presentable nun país que quiera ser modernu, sinón que ye más propiu de países autocráticos o dictadures. El Conceyu POFP quier denunciar toes estes illegalidaes que se cometen na Alministración pública asturiana y que se ponga remediu a estos males puesto que ye una asociación que ta al serviciu del interés xeneral y non d'intereses particulares. Nesti sentíu apelen a que la prensa asturiana denuncie toa esta situación pero nun confíen nella yá que dicen que la prensa n'Asturies tamién sirve a estos intereses políticos. Otru aspectu nel que se manifiesta'l clientelismu ye nes suvenciones de Cultura que s'utilicen como un mecanismu más de la función clientelar comprando fidelidaes yá que la discrecionalidá a la hora de concedeles ye absoluta puesto que nun hai varemos de nenguna clas y les supuestes "comisiones" de valoración tán nomaes a deu pol propiu poder políticu ensin nengún criteriu ecuánime lo que podría suponer una desviación de poder y asina eses decisiones polítiques pueden llevase ante los tribunales puesto que son actos viciaos de raigañu yá que nellos falta la motivación de por qué se conceden o non les suvenciones. Nesti sentíu denunncien que'l movimientu asturianista ta en parte compráu y vendíu debío a esta mano espurrida hacia la Conseyería que reparte óbolos. El casu de la RTPA ye un casu a parte ya que ta dafecho privatizada nuna rede de subcontrates, salvo los informativos, y nel procesu de contratacíón nin siquiera tienen en cuenta la conocencia de la llingua asturiana yá qu'en realidá pocu méritu y capacidá tien d'informar periodísticamente quien nun conoza nin sepa la llingua d'Asturies. En realidá furrulen como intermediarios ente l'Alministración y los empresarios yá que subcontrátenlo too pero non cola Llei de Contratos del Estáu sinón cola llei del caprichu. El públicu entrugó qué papel xugaben nesti murniu panorama les ONG que pauten cola Alministración unos servicios a deu a cambiu d'un presupuestu, llamándolo contratos de collaboración qu'en realidá salen mui baratos a l'Alminsitración por facer funciones públiques (menores, drogues, mayores...) y sin emabrgo estes ONG lo que faen ye contratos basoria y emplegu precariu cuando en realidá son unes empreses de servicios más. denuncien que'l gobiernu asturianu quier facer una Llei basoria de la función pública que permita too esto y que ye peor de lo qu'hai agora. El Conceyu por Otra Función Pública fizo anuncia de la so páxina web http://www.otrafuncionpublica.blogspot.com/ pa evitar la patrimonialización de la función pública, yá que la función pública ye de toos y non sólo del partíu gobernante, pa evitar el clientelismu y amiguismu y pa llograr qu'el Derechu públicu na contratación nun quede arrequexáu poles práctiques privaes de contratación a base de montar empreses privaes (chiringuitos) pa prestar servicios qu'en realidá son públicos y nos afecten a tolos ciudadanos de toles ideoloxíes.

EL 5u FESTIVAL DE CINE ASTURIANU YÁ TIEN NOMINAOS A LOS PREMIOS

Lilián de Celis, Premiu d’Honor
del 5u Festival de Cine Asturianu




El 5u Festival de Cine Asturianu yá tien nominaciones pa los premios de la edición d’esti añu 2009. El Festival tendrá llugar n’Uviéu del 6 al 8 d’abril del 2009, cuando se presentarán los directores y obres nominaes a la prensa. El 7 d’abril nel marcu del Teatru Filarmónica proyectaránse los curtiumetraxes y documentales finalistes y el miércoles 8 d’abril sedrá la Gala de Pieslle cola entrega de Premios. Esti añu el Premiu d’Honor ye pa l’actriz y cantante asturiana Lilián de Celis que recibirá un emotivu homenaxe na Gala de Pieslle. El Festival de Cine Asturianu presentará esti añu como novedá dos estrenos teatrales de dos obres breves n’asturianu a cargu de la compañía Teatru de Bueñu, amás de la yá habitual presencia de les coreografíes del Ballet Baidán d’Uviéu que tamién tarán un añu más presentes na Gala d’entrega de premios. Los nominaos al Premiu al Meyor Curtiumetraxe en Castellanu son: Juega conmigo (José Bors, 2004), Ella (Jesús Álvarez, 1999), Propiedad Privada (Ángeles Muñiz, 2006), Salvemos el teatru (Xavi Vilareyo, 2009), Polillas (Pedro Touceda, 2007), Lebensraum (Daniel Valledor, 2007), Normas de la casa (Eva Gallego, 2008), Ingredientes (Rebeca Iglesias, 2007). Los nominaos al Meyor Documental son: Ensin xéneru de duldes (Worldtv-Europe, 2008) y Voces en imágenes (Verité, 2008). Les nominaes a la Meyor Película esti añu son: Oviedo express, La torre de Suso y El orfanato. Los miembros del xuráu daránse a la conocencia enantes de la Gala de Pieslle del Festival que cuntará cola presencia de la mítica actriz asturiana Lilián de Celis, Premiu d’Honor d’esta edición del Festival.

Lilián de Celis Collía nació en Fíos, Parres, en 1935 y va rodar como actriz unes 17 películes ente Hespaña y México onde vivió nueve años. Indiscutible reina del cuplé, con una escelente voz de sopranu, a la que munchos consideren la sucesora de la mítica cantante y actriz Raquel Meller, Lilián de Celis trabayó dende 1953 en Radio Madrid nun famosísimu programa de canciones tituláu “Aquellos años del cuplé” onde cola orquesta del maestru Indalecio Cisneros tocando en directu rescató del olvidu abondes canciones que tuvieren yá de moda nos felices años 1920. L’éxitu del programa radiofónicu y de les presentaciones teatrales foi tan grande qu’entamó toa una serie de películes musicales basaes nestes canciones y temes antiguos del cuplé como la famosa película L’últimu cuplé (1957), que nun principiu diba llevar la voz de Lilián de Celis na so banda sonora pero la so negativa a prestar la so voz pa otra actriz fizo cambiar los planes de la película viéndose asina obligada Sara Montiel a cantar los temes d’esta película. El debú de Lilián de Celis nel cine musical paecía asina obligáu y merecíu, faciéndose llueu al añu siguiente como protagonista destacada nuna película pensada especialmente pa ella y dirixida por Mateo Cano y José Luis Merino que llevaría por títulu unu paecíu al famosu programa de Lilián na radio: Aquellos tiempos del cuplé (1958). La película foi mui bien acoyida pol públicu por facer valer nella les versiones musicales de Lilián de Celis, más fieles al estilu orixinal de la “Belle Epoque”, que los arreglos modernizaos fechos pa les películes de Sara Montiel, lo que xeneró llargos debates populares ente los partidarios d’una y d’otra actriz. Llueu rodaría en 1960 Alma aragonesa, Los claveles y en 1961 rodó otres dos películes: Las estrellas, y Júrame. En 1962 entama una xira per Sudamérica instalándose en México durante nueve años onde tamién rodaría delles películes más (Los apuros de dos gallos). Volvió a la so tierra en 1972 rodando en 1975 la película Yo fui el Rey.


El Festival de Cine Asturianu nació'l 27 d'abril del añu 2005 nel auditoriu del Atenéu de Madrid cola idea de celebrar el primer Centenariu del Cine Asturianu. Axuntáronse naquella ocasión figures tan destacaes como Gil Parrondo, Paz Pondal, Xuan Gona, Pedro María Sánchez, Paul Naschy, Julio César Acera o Asución Balaguer, ente otres personalidaes más pa celebrar el nacimientu d'esti Festival de Cine.

Les bases del Festival de Cine Asturianu almiten trabayos en dos estayes principales: obres en llingua asturiana y en cualesquier otra llingua. Al Concursu pueden presentase llargumetraxes, curtiumetraxes, o documentales en cualesquier formatu y duración, siempre que tean realizaos en llingua asturiana, tamién pueden presentase obres de realizadores asturianos o rodaes básicamente n’Asturies o nos territorios del dominiu llingüísticu del asturianu en cualesquier llingua. El Festival de Cine Asturianu celébrase añalmente y piésllase con una gala d'entrega de premios, conocíos como los Fruteros de Cristal, n'homenaxe a la primer película asturiana, El robu de fruta, dirixida por Javier Sánchez Manteola en 1905 y tien como fines la difusión y promoción del cine asturianu y de los sos artistes. Sergio G. Sánchez, Teresa Marcos, Santos Hevia, Carmen Rico, Carlos Rico, Alberto Rodríguez de la Fuente, Pablo de María, Xuan Lluis Ruiz, Luis Argeo, Eva Lesmes o Toni Salgot son dalgunos de los ganadores d’ediciones pasaes del Festival de Cine Asturianu.

N’ediciones anteriores del Festival, el Premiu d’Honor concedióse-y a Gil Parrondo, Mary Paz Pondal, Xuan Gona y Gonzalo Suárez.

ASTURIANOS, BASCOS Y CATALANES, LOS QUE MENOS S'IDENTIFIQUEN CON HESPAÑA

Bascos, catalanes y asturianos, los que menoss’identifiquen con Hespaña

Los ciudadanos bascos, catalanes y asturianos son los que menos s’identifiquen con Hespaña o los que menos hespañoles se sienten de tol estáu y los que más s’identifiquen cola so propia comunidá. Esta ye la conclusión fecha según un estudiu de la Fundación Bertelsmann onde los asturianos tán ente los menos identificaos con Hespaña, per detrás de catalanes y vascos. Empataos colos asturianos en porcentaxe de rechazu a Hespaña tán los canarios, debío a la fuerte inmigración y a la llonxanía peninsular. Tres los asturianos y canarios los que menos s'identifiquen son los gallegos. El porcentaxe d'identificación col estáu hespañol de los asturianos, según esti estudiu, ye d'un 74,8%,igual que'l de los canarios. Los bascos son los menos identificaos cola idea d’Hespaña con un 62,6%. Síguenlos los catalanes con un 72,8%. Detrás de bascos y catalanes, asturianos y canarios (74,8). A los gallegos, nel quintu llugar de la clasificación, con 77,3 siguenlos navarros y cántabros. Pela so parte los estremeños, con un 94,8% son los más identificaos col Estáu hespanol, xunta colos madrilanos (92,9%) y los castellanos-lleoneses con un 92,5% nel porcentaxe d’identificación.

LA OPOSICIÓN A LA OFICIALIDÁ DE LA LLINGUA YE PA EVITAR EL FECHU NACIONAL ASTURIANU

Evitar el fechu nacional asturianu



Llama l’atención güeyar la oposición frontal, decidida, determinadísima, de los dos grandes partíos hespañoles pa proclamar l’asturianu llingua oficial d’Astúries. A un idioma que s’utiliza, poco o abondo, per tol territoriu del país y que cunta con decenes de millares de falantes, ñégase-y la cenciella categoría de llingua cooficial col hespanñol. Nesti casu, el nacionalismu hispanu actúa cola so lòxica de siempre: facer frente a un peligru periféricu. Un peligru que, en Madrid, consideren que tienen controláu anguaño, pero que nunca nun se sabe cómo pue evolucionar si se baxa la guàrdia de les esencies patries. Magar que son más de 250 les organizaciones qu’esixeron la oficialidá del asturianu -o precisamente por esto-, nin socialistes nin populares nun quieren saber un res, de da-y dignidá oficial al idioma propiu del país pal cual dicen governar. Y eso qu’agora, cola reforma del Estatutu asturianu, la ocasión yera afayadiza. La verdadera razón d’enxertar palos nes ruedes d’una llingua que tan pocu mal-y pue facer al hespañol -si los argumentos de la supuesta marxinación del castellanu en Cataluña, Baleares, Euscadi o Galicia són ridículos, nel casu d’Astúries asoleyen la categoria d’esperpènticos y ye querer evitar que n’Asturies se desenrolle con brenga un movimentu nacional que ponga inda más en cuestión el modelu centralista hespañol. Col amiestu de que, pa los nacionalistes hespañoles, taríase falando del so Kósovu, del so bierzu nacional, con Pelayu y la Reconquista na tiesta del frente.

El florecimientu de Máximo Oliveros y L'amor mata ganen nel 3r Festival CinegailesAST 2008

La película filipina El florecimientu de Máximo Oliveros, del director Auraeus Solito y el curtiumetraxe alemán L'amor mata del realizador Tor Iben fueron les obres ganadores del 3r Festival Internacional de Cine Gai y Lésbicu d'Asturies que tuvo llugar na ciudá de Xixón (Asturies) del 7 al 9 d'agostu. La película ganadora, El florecimientu de Máximo Oliveros (Ang pagdadalaga ni Maximo Oliveros, 2005) ganó tamién otros premios en festivales internacionales de cine y cuenta cómo un nenu de doce años que vive cola so familia de delincuentes nuna probe casa de Manila namoríscase d'un guapu policía. El curtiu ganador, L'amor mata, (Love kills, 2007) del realizador alemán Tor Iben, narra les relaciones frustaes d'un mozu que paez que nun sabe atopar el so camín na vida. Nathan López (Manila, 1991) sigue pañando éxitos con una prometedora carrera como actor. El Premiu d'Honor d'esta edición del certame foi pal realizador gai norteamericanu Bill Condon (Nueva York, 1955) , autor d'una riestra de películes d'éxitu como Hermana, hermana; Muerte nel agua; Dioses y monstruos; L'home que nun morrería; Kinsey y la recién producción musical titulada Dreamgirls. En 1999 ganó'l Premiu Óscar de l'Academia norteamericana al meyor guión adaptáu pola so película "Dioses y monstruos". Amás de director consagráu, Bill Condon ye un gran guionista. Tuvo nomináu al Óscar tamién pol guión adaptáu de la película Chicago nel añu 2003.

PALMARÉS DEL 4u FESTIVAL DE CINE ASTURIANU

Dama de Porto Pim y La reconversión de las gaviotas triunfen nel 4u Festival de Cine Asturianu

La película de José Antonio Salgot, Dama de Porto Pim recibió cuatro premios del 4u Festival de Cine Asturianu que tuvo llugar esti miércoles 2 de xunetu nel Auditoriu del Atenéu de Madrid onde s’entregaron los premios del xuráu del Festival. A la Gala d’entrega de premios acudió tamién l’actriz Lola Herrera que recibió’l Premiu a la Meyor Actriz por un papel nel curtiu A golpe de tacón de la realizadora Amanda Castro. El Premiu al Meyor actor foi pa Antonio Resines por Dama de Porto Pim. Esta película recibió tamién los premios al meyor guión, a la meyor dirección (José Antonio Salgot) y a la Meyor Película. El Premiu al Meyor Curtiu n’Asturianu foi pa Espresionista, de Pablo de María, una hestoria inspirada nos cuadros de Van Gogh y el Meyor Curtiu en Castellanu foi pa La reconversión de las gaviotas, un curtiu d’Alberto Rodriguez de la Fuente sobre la emigración de los mozos asturianos que tienen que marchar fuera pa buscar trabayu. El Premiu al Meyor Documental foi pa Asturian-US del realizador Luis Argeo, sobre los descendientes de la emigración asturiana a los Estaos Uníos. A la Gala asistieron personalidaes del mundu del cine como’l realizador asturianu Raimundo García, la directora Rocío García Campelo que foi presidenta del xuráu oficial, l’actor Carmelo Gómez, l’actriz Mary Paz Pondal y el premiu d’honor d’esta edición del certame, el realizador Gonzalo Suárez (Oviedo, 1934) que recibió un homenaxe a la so obra cinematográfica comenzada nel añu 1966 col curtiumetraxe Ditirambo vela por nosotros qu’escomenzó el nomáu Nuevu Cine.