El florecimientu de Máximo Oliveros y L'amor mata ganen nel 3r Festival CinegailesAST 2008

La película filipina El florecimientu de Máximo Oliveros, del director Auraeus Solito y el curtiumetraxe alemán L'amor mata del realizador Tor Iben fueron les obres ganadores del 3r Festival Internacional de Cine Gai y Lésbicu d'Asturies que tuvo llugar na ciudá de Xixón (Asturies) del 7 al 9 d'agostu. La película ganadora, El florecimientu de Máximo Oliveros (Ang pagdadalaga ni Maximo Oliveros, 2005) ganó tamién otros premios en festivales internacionales de cine y cuenta cómo un nenu de doce años que vive cola so familia de delincuentes nuna probe casa de Manila namoríscase d'un guapu policía. El curtiu ganador, L'amor mata, (Love kills, 2007) del realizador alemán Tor Iben, narra les relaciones frustaes d'un mozu que paez que nun sabe atopar el so camín na vida. Nathan López (Manila, 1991) sigue pañando éxitos con una prometedora carrera como actor. El Premiu d'Honor d'esta edición del certame foi pal realizador gai norteamericanu Bill Condon (Nueva York, 1955) , autor d'una riestra de películes d'éxitu como Hermana, hermana; Muerte nel agua; Dioses y monstruos; L'home que nun morrería; Kinsey y la recién producción musical titulada Dreamgirls. En 1999 ganó'l Premiu Óscar de l'Academia norteamericana al meyor guión adaptáu pola so película "Dioses y monstruos". Amás de director consagráu, Bill Condon ye un gran guionista. Tuvo nomináu al Óscar tamién pol guión adaptáu de la película Chicago nel añu 2003.

PALMARÉS DEL 4u FESTIVAL DE CINE ASTURIANU

Dama de Porto Pim y La reconversión de las gaviotas triunfen nel 4u Festival de Cine Asturianu

La película de José Antonio Salgot, Dama de Porto Pim recibió cuatro premios del 4u Festival de Cine Asturianu que tuvo llugar esti miércoles 2 de xunetu nel Auditoriu del Atenéu de Madrid onde s’entregaron los premios del xuráu del Festival. A la Gala d’entrega de premios acudió tamién l’actriz Lola Herrera que recibió’l Premiu a la Meyor Actriz por un papel nel curtiu A golpe de tacón de la realizadora Amanda Castro. El Premiu al Meyor actor foi pa Antonio Resines por Dama de Porto Pim. Esta película recibió tamién los premios al meyor guión, a la meyor dirección (José Antonio Salgot) y a la Meyor Película. El Premiu al Meyor Curtiu n’Asturianu foi pa Espresionista, de Pablo de María, una hestoria inspirada nos cuadros de Van Gogh y el Meyor Curtiu en Castellanu foi pa La reconversión de las gaviotas, un curtiu d’Alberto Rodriguez de la Fuente sobre la emigración de los mozos asturianos que tienen que marchar fuera pa buscar trabayu. El Premiu al Meyor Documental foi pa Asturian-US del realizador Luis Argeo, sobre los descendientes de la emigración asturiana a los Estaos Uníos. A la Gala asistieron personalidaes del mundu del cine como’l realizador asturianu Raimundo García, la directora Rocío García Campelo que foi presidenta del xuráu oficial, l’actor Carmelo Gómez, l’actriz Mary Paz Pondal y el premiu d’honor d’esta edición del certame, el realizador Gonzalo Suárez (Oviedo, 1934) que recibió un homenaxe a la so obra cinematográfica comenzada nel añu 1966 col curtiumetraxe Ditirambo vela por nosotros qu’escomenzó el nomáu Nuevu Cine.

El 4u FESTIVAL DE CINE ASTURIANU faise en Madrid

El 4u FESTIVAL DE CINE ASTURIANU
tendrá llugar en Madrid

El 4u Festival de Cine Asturianu fairá la so Gala de Pieslle el próximu miércoles 2 de xunetu del 2008 en Madrid. L’auditoriu del centenariu Atenéu de Madrid (Prado 21) va ser otra vez más el marcu incomparable nel que se va celebrar la entrega de premios del del Festival y la proyección de los ocho curtiumetraxes finalistes. El Festival de Cine Asturianu concede premios pa ocho categoríes: Meyor Curtiu n’Asturianu y en Castellanu, Meyor Actor y Actriz, Meyor Guión y Director, Meyor Documental y Meyor Película amás d’un Premiu d’Honor. Los curtiometraxes nominaos a los premios son los siguientes: El cantar del agua (Óscar Fernández), Espresionista (Pablo de María), A golpe de tacón (Amanda Castro), Ausencia (Pelayo Muñiz), El arte de vivir (Jesús Álvarez), Escollera (Santiago Torres Muro), Humanos con patatas (Kiko y Javier Prada), La reconversión de las gaviotas (Alberto Rodríguez) y Un juego de niños (Raimundo García).

Los nominaos al Premiu al Meyor Documental son: AsturianUS (Luis Argeo), Misiones pedagógicas (Gonzalo Tapia) y Mar de valientes (Óscar Fernández). Les nominaes a la Meyor Película son: Cubalibre, dirixida por Raimundo García y Dama de Porto Pim, dirixida por José Antonio Salgot. Los acttores y actrices nominaos a los premios son: José Luis López Vázquez, Caco Senante, Antonio Resines, Lola Herrera, Kira Miró y Emma Suárez. Los miembros del xuráu oficial daránse a la conocencia na mesma Gala de Pieslle, onde se fairá tamién un homenaxe a los guionistes y escritores asturianos. La Gala va tar presentada pola escritora Rosario de la Cueva y el Premiu d’Honor del 4u Festival de Cine Asturianu fairáse públicu próximamente.

El Festival de Cine Asturianu cumple cuatro ediciones

El Festival de Cine Asturianu nació'l 27 d'abril del añu 2005 nel auditoriu del Atenéu de Madrid cola idea de celebrar el primer Centenariu del Cine Asturianu. Axuntáronse naquella ocasión figures tan destacaes como Gil Parrondo (Premiu d’Honor del Festival), Paz Pondal, Xuan Gona, Pedro María Sánchez, Paul Naschy (Meyor Actor), Julio César Acera o Asución Balaguer (Meyor Actriz), ente otres personalidaes más pa celebrar el nacimientu d'esti nuevu Festival de Cine. Los triunfadores d'esti primer festival fueron Teresa Marcos y Sergio G. Sánchez colos trabayos Llencería d'ocasión y 7337. El premiu al meyor guión foi pa José Maniega por Imaxe accidental. El Premiu al Meyor Director foi pa Sergio G. Sánchez. Les bases del Festival de Cine Asturianu almiten trabayos en dos estayes principales: Obres en llingua asturiana y en cualesquier otra llingua. Al Concursu pueden presentase llargumetraxes, curtiumetraxes, o documentales en cualesquier formatu y duración, siempre que tean realizaos en llingua asturiana, tamién pueden presentase obres de realizadores asturianos o rodaes básicamente n’Asturies o nos territorios del dominiu llingüísticu del asturianu en cualesquier llingua. El Festival de Cine Asturianu celebra añalmente unes gales d'entrega de premios, conocíos como los Fruteros de Cristal, n'homenaxe a la primer película asturiana, El robu de fruta, dirixida por Javier Sánchez Manteola en 1905 y tien como fines la difusión y promoción del cine asturianu y de los sos artistes. Pal cuartu Festival de Cine Asturianu tán nominaes a los premios obres de los realizadores siguientes: Raimundo García, José Antonio Salgot, Óscar Fernández, Pablo de María, Amanda Castro, Pelayo Muñiz, Jesús Álvarez, Santiago Torres, Kiko y Javier Prada, Alberto Rodríguez, Gonzalo Tapia y Luis Argeo. La Gala de Pieslle y la entrega de premios del 4u Festival de Cine Asturianu tendrán llugar en Madrid nel Auditoriu del Atenéu la tarde del 2 de xunetu del 2008.

festivalcineastur@wanadoo.es

NOTICIES ASTURIES - MAYU 2008

Asturies celebró’l bicentenariu del 25 de mayu de 1808,
día de la bandera asturiana.



Uviéu celebró’l pasáu día 25 de mayu, un emocionáu actu n’homenaxe del 25 de mayu de 1808, día de la patria asturiana. Delles autoridaes, políticos y persones públiques ficieron un homenaxe nel claustru góticu y na Sala Capitular de la catedral d’Uviéu, sede histórica de la Xunta Xeneral d’Asturies, onde amás remebróse al exércitu asturianu creáu pola Xunta asturiana con presencia de soldaos uniformaos con traxes militares de la época. El Conceyu Universitariu pol Asturianu entamó un actu na tarde del domingu nel que se fizo una visita hestórica y cultural pelos espacios onde asocedieron los fechos de la Revolución de mayu y del llevantamientu contra’l nuevu réxime establecíu por Napoleón, nuevu rei d’Hespaña dende’l 5 de mayu de 1808, fecha de les abdicaciones de Bayona. Napoleón fizo por ser el rexenerador y salvador qu’acabaría col Antigu Réxime. Tres les abdicaciones de Bayona, Napoleón decidió convocar en Bayona una Xunta de notables pa ratificar la decisión d’elevar al Tronu d’Hespaña al so hermanu Xosé Bonaparte y pa la ellaboración d’un textu constitucional. La convocatoria de la Xunta de Bayona publicóse na Gaceta de Madrid de 24 de mayo de 1808, un día enantes de la proclamación de Soberanía de la Xunta Xeneral d’Asturies.

L’homenaxe del Conceyu Universitariu nesti añu del bicentenariu a aquella Xunta Xeneral nel 25 de mayu siguió na puerta de la catedral d’Uviéu con banderes asturianes y diose llectura a un comunicáu nel que se reclamó que la Universidá d’Uviéu “vuelva a convertise nuna institución que mire p’Asturies y respete y asuma la llingua y cultura asturianes”. Darréu pudieron sentise dellos temes rellacionaos col 25 de mayu, na gaita de Xaime Menéndez, pa darréu rematar l’actu cola entrega d’una ofrenda floral. Izquierda Asturiana pel so llau concedió na so segunda edición, el Premiu 25 de mayu, al abogáu Xurde Blanco “pola so defensa de los drechos de los falantes d’asturianu y constituyir un referente cívicu y personal". El gallardón creóse pa premiar a persones, asociaciones o entidaes asturianes que destaquen pola so defensa de les llibertaes, la defensa de los drechos d’Asturies o la auto-organización ciudadana. La pasada edición la entidá premiada foi Coordinadora Ecoloxista d'Asturies. Andecha Astur celebró’l 25 de mayu en Noreña con una fiesta reivindicativa.

Ruxe’l ríu, de Dulcamara, Premiu CPN
a la Meyor Canción n’Asturianu del 2007



La canción Ruxe’l ríu, del grupu Dulcamara, recibió’l Premiu CPN a la Meyor Canción n’Asturianu del añu 2007, mediante una votación entamada y fecha per Internet. El tema pertenez al so primer discu entituláu Sali L.luna. Sali L.luna ye’l primer trabayu discográficu del grupu asturianu Dulcamara. Dulcamara son seis cantantes y pandereteres de diferentes grupos. Axuntáronse pa remozar y actualizar esi cachu del patrimoniu musical del país asturianu, la tradición femenina de les panderetes y pandeiros. La propuesta d’elles ye innovadora y arriesgada, un eclécticu grupu que destaca por trabayar, fundamentalmente no vocal, dalgo que queda más que demostrao nel tema premiáu: Ruxe’l ríu. Xunta elles ta un axietáu grupu de músicos qu’endolquen les voces con soníos pop, rock, funky y folk. Dándo-y al folk asturianu un nuevu sen y dirección axeitada na so evolución dica la modernidá y creatividá más prestoses. Dulcamara ye un intentu fondu por anovar, remozar, refacer y pañar una visión nueva del estilu pandereta y voces. Ye un percorríu per toles rexones de tradición «panderetera» del país asturianu, dende Cangas, Degaña o Valdés, hasta Siero y L.lena nel centru y Llanes. Folk, jazz, rock y tradición xúntense nesti tema onde se reivindica’l papel de la muyer na tresmisión, y agora na revisión, de la cultura asturiana. La esperiencia ye asemeyada a otres manifestaciones musicales del nuesu ámbitu natural: les naciones celtes del Atlánticu. Nesti tema vese innovación y variedá, tamién nel aspectu llingüísticu que ye mui curiáu y siempre reivindicativu de la llingua asturiana y de la so normalización social, con una presentación siempre n’asturianu de los sos espectáculos musicales en directu.
Queixúmenes de la braña (Brenga Astur), La semeya (Avientu), La xana (Corquiéu), L'emigrante (La col.lá Propinde), Andolina (Tejedor), Ná me prestaría más (Pedro Pereira), Añada amorosa (Anabel Santiago) y Marea negra (Carlos Rubiera) son les canciones ganadores dende 1999 hasta agora, resultáu de votaciones per Internet, añu nel qu’entamaron los Premios CPN. El Conseyu pola Normalización quier asina con esti premiu pioneru afalar a tolos músicos asturianos a qu'empleguen la llingua asturiana nes sos composiciones y da-y por ello mayor difusión y presencia social nos medios de comunicación al nuesu perguapu idioma.

Peracaba en Madrid el 7u Cursu de Llingua Asturiana


El 7u Cursu de Llingua Asturiana en Madrid tuvo llugar del 28 de febreru al 29 de mayu del 2008, tolos xueves pela tarde n’horariu de 7 a 9 . El cursu, entamáu por Xaviel Vilareyo, profesor tituláu pola Academia de la Llingua Asturiana, foi d’un total de 35 hores llectives. Nel cursu matriculáronse un total de 32 persones de les que 15 d’elles recibieron al final un certificáu d’asitencia al mesmu. La edá de los matriculaos alcuéntrase alrodiu de los 25 y 35 años y en xeneral son asturianos de nacencia que trabayen en Madrid y que lleven pocos años viviendo nesta ciudá. La mayoria teníen raigañu na rexón central d’Asturies y proveníen d’un ámbitu urbanu. Toos amosaben un altu deséu de conocencia o afondamientu de la llingua asturiana, un interés por saber escribir y falar n’asturianu, tanto por motivos llingüísticos como pol caltenimientu de la propia identidá. El cursu consistió en trabayar los aspectos teóricos y prácticos de la llingua asturiana. Presentación de los elementos llingüísticos del asturianu, mofoloxía y sistaxis de la llingua: caracteres xenerales del asturianu, dominiu llingüísticu, les contracciones, les apostrofaciones, el xéneru, el neutru de materia, el númberu, preposiciones: usos de per y por, alverbios: usos de non y nun, sistema verbal asturianu, los pronomes personales tónicos y átonos, pronomes d’oxetu directu ya indirectu, allugamientu de los pronomes personales na frase. Trabayóse tamién la conocencia del vocabulariu asturianu mediante exercicios de deprendimientu, faciendo frases y trabayando la derivación, sufixación y prefixación. Nel aspectu prácticu trabayóse la espresión esctrita y oral de la llingua, facer frases axeitaes coles palabres daes, deprender los saludos y presentaciones, llectura y comprensión de testos, güeyar trabayos audiovisuales en dvd pa facer comentariu oral de los mesmos, dictaos ya igua de los mesmos en comuña. Apurrióse a los alumnos prensa n’asturianu asina como información de recursos per Internet y llibros de llectura.

XUNTA D'ESCRITORES ASTURIANOS - UVIÉU 2008

Entama n’Uviéu la Xunta d’Escritores Asturianos 2008

Los próximos díes 2, 3 y 4 de xineru del 2008 entamaráse n’Uviéu una nueva Xunta d’Escritores Asturianos que col lema “Lliteratura asturiana y compromisu” debatirá sobre ésti o otros temes alrodiu la llingua y lliteratura asturiana. Estos alcuentros lliterarios tendrán llugar nel marcu de la Biblioteca del Campu San Francisco nel Paséu del Bombé d’Uviéu, nel mesmu sitiu onde se cellebraron hai unos dos años col fin d’entamar una bienal de lliteratura asturiana abierta a tol públicu en xeneral yá que l’asistencia a toles sesiones ye gratuíta dafechu. Conferencies, ponencies y coloquios, amás de presentaciones de llibros y cuadros marquen la pauta d’esta nueva edición de la Xunta d’Escritores Asturianos. El miércoles 2 de xineru entamarán los alcuentros a les 5 la tarde cola presentación del llibru “El conceptu xeneracional. Actes de la Xunta d’Escritores Asturianos 2005” na que se recueyen les conferencies y comunicaciones de los participantes de l’anterior Xunta, llibru editáu por Trabe. Tamién presentarán conferencies Carlos Rubiera, Xaviel Vilareyo, Bertu Ordiales y Helena Trexo que falarán del compromisu de los escritores, del cine asturianu y de toponimia d’orixe botánicu. Tamién esi mesmu día presentarán llibros Pablo Rodriguez Medina , Silvia Cosío y Bertu Álvarez Peña amás de la presentación de cuadros de Violeta Sánchez. El xueves 3 de xineru tán programaes les conferencies de Xosé Lluis Campal y Xurde Morán, amás de presentaciones de llibros de Xuan Carlos Crespos y d’Esther García López. También habrá un recital poéticu cola presencia de diez autores la tercer xeneración del Surdimientu. El vienres 4 de xineru, tamién a les 5 la tarde entamarán les comunicaciones de Marta Lozano, Naciu Galán, Maite García, y la escritora aragonesa Trinidad Ruiz, que falarán sobre la historia de la bandera asturiana, los monólogos, los aconceyamientos d’escritores asturianos y sobre la edición n’Hespaña. La Xunta d’Escritores Asturianos pesllará esta edición cola presencia del poeta aragonés Ángel Guinda que vendrá a Uviéu especialmente pa presentar una conferencia sobre’l so mundu poéticu que precederá a la presentación n’Asturies d´ún de los sos últimos llibros tituláu “Tola lluz del mundu” que recueye los sos poemes nes seis llingues del Estáu hespañol, editáu pola editorial aragonesa Olifante.

XUNTA D’ESCRITORES ASTURIANOS
UVIÉU - 2, 3, 4 xineru 2008

MIÉRCOLES 2 DE XINERU:

- 16,30h - Presentación de les xornaes de la Xunta d’Escritores Asturianos – Uviéu 2008. Inauguración de la esposición de pintura de Violeta Sánchez Trexu.
- 17h - Presentación del llibru El conceptu xeneracional, Actes de la Xunta d’Escritores Asturianos 2005 (Ediciones Trabe). Ensayos d’Ánxel Álvarez Llano, Pablo R. Medina, David Rivas, Humberto Gonzali, Chechu García, Ánxel Rodriguez, Helena Trexu, ente otros, y amuesa poética.
- 17,30h - El compromisu del escritor asturianu más p´allá de lo estético. Carlos Rubiera.
- 18h - Presentación del llibru Perreríes de Pablo R. Medina (Suburbia Ed.) cola intervención de Silvia Cosío.
- 18,30h – Cine asturianu: una hestoria de cien años. Xaviel Vilareyo.
- 19h – Toponimia d´orixe botánicu n´Asturies. Bertu Ordiales.
- 19,30 – Compromisu de xente ensin papeles. Helena Trexu.
- 20h – Presentación del llibru Mitos de Xixón, de Bertu Alvarez Peña (Ed. VTP) a cargu de Milio R. Cueto.

XUEVES 3 DE XINERU:

- 17,30 – Presentación n’Uviéu del llibru Lías, apendiz de contador d´hestories, de Xuan Carlos Crespos.
- 18h – Preocupaciones humanistes na poesía de Carlos García Velasco (1973-1975), Xosé Lluis Campal.
- 18,30h – Diez años caleyando Asturies. Xurde Morán.
- 19h – Llingua y hestoria del Fueru de Zamora. Xaviel Vilareyo.
- 19,30 – Presentación de los llibros d´Esther García López Historias de vida ya señas de muerte (Madú Ediciones) y Faraguyas cola intervención de Cristian Velasco.
- 20h – Recital poéticu Surdimientu-3 : Xurde Fernández, Llucía Fernández Marqués, Chechu García, Elvira Laruelo, Marisa López Diz, Pablo Rodriguez Alonso, Pablo Rodríguez Medina, Xuan Santori, Susana Sela, Xaviel Vilareyo.

VIENRES 4 DE XINERU:

- 17h – Historia y signu de la bandera d’Asturies. Marta Lozano.
- 17,30 – Monólogu modernu: el compromisu d´un xéneru. Naciu Galán.
- 18 – Apuntes sobre los aconceyamientos d´escritores asturianos. Maite García.
- 18,30 – Una institución pa les lletres asturianes. Humberto Gonzali.
- 19h – Olifante: una oferta de felicidad. Trinidad Ruiz Marcellán, directora de la Editorial Olifante, del Festival del Moncayo y de la Casa del Poeta de Trasmoz.
- 19,30h – Arquitexturas. Ángel Guinda.
- 20h – Presentación del llibru Tola lluz del mundu, d´Ángel Guinda (Editorial Olifante), primer poemariu sextillingüe del estáu hespañol, cola intervención de Trinidad Ruiz.

LLUGAR: BIBLIOTECA DEL CAMPU SAN FRANCISCO – PASÉU DEL BOMBÉ – UVIÉU (entrada llibre)

xuntadescritores@wanadoo.es

NOTICIES ASTURIES - SETIEMBRE 2007

Carlos Rubiera, Premiu a la Meyor Canción n'Asturianu del 2006 pol tema “Marea negra”.

Carlos Rubiera ( Xixón 1956 ) ye un músicu y escritor asturianu ye una de les persones más actives y reivindicatives del movimientu políticu y cultural asturianista. Carlos Rubiera Tuya nació’l 2 de febreru de de 1956 en Cabueñes (Xixón) anque al pocu tiempu la familia treslladose a Garvelles, na parroquia xixonesa de Caldones, onde sigue residiendo anguaño. Tres d’estudiar Maxisteriu na Universidá d'Uviéu y Música nos conservatorios d'Uviéu y Xixón, dedicóse profesionalmente a la enseñanza. Anguaño ye profesor de Música y Asturianu nel colexu El Bosquín de L'Entregu. Carlos Rubiera destaca pol so llabor na difusión de la llingua asturiana, non solo como cantante y escritor, sinón tamién como responsable de les clases de bable na Universidá Popular, o presentador de programes nel centru territorial de Televisión Española y na emisora Radio Mar de Xixón. Yá dende mediaos de los años setenta apaez vinculáu a les actividaes de Conceyu Bable de Xixón y collabora na sección en Alitar Asturies del diariu El Comercio. Dellos años más tarde foi ún de los primeros miembros de númberu de l’Academia de la Llingua Asturiana. A los dieciocho años compuso’l so primer cantar "Al mio primu". Per esti tiempu, diose a conocer como cantautor, y foi una de les personalidaes más relevantes del llamáu nuevu canciu astur. Dellos de los sos cantares, como "La capitana" algamaron gran popularidá y pasen a veces por tradicionales. En 2004 creó un sellu discográficu, La Capitana, col qu’editó un llibru-discu nel que se resume la so carrera musical hasta esi momentu. El so llabor nel tarrén de la música, amás de los nueve discos publicaos hasta agora, complétase con un estudiu sobre la tradición musical infantil publicáu nel númberu 26 de Lletres Asturianes ("Apurrimientu al folklor musical d’Asturies: añaes y cantares pa neños") , l’ adaptación al asturianu, inédita del momentu, de lieds de Brahms , Schumann o Mendelssohn ente otros.
El Conceyu pola Normalización entama dende l’añu 1999 el Premiu a la Meyor Canción n’Asturianu, consistente nun Triskel Dixital y una Mención Especial. Esti Premiu, pioneru na música asturiana, surdió’l mesmu añu que se marxinaba a la llingua asturiana nunos premios estatales de la música. Con ello el CPN quier afitar una de les sos xeres que ye la defensa de la llingua asturiana, el so prestixu y reconocencia social. Nesti llabor ye perimportante reconocer a los cantantes qu’empleguen la llingua asturiana nos sos trabayos.
La canción premiada nesti añu mediante votación per Internet, titulada Marea Negra, reflexa dafechu la poesía y musicalidá de Carlos Rubiera, l’ espíritu críticu, reivindicativu y combativu que surde de tol so llabor artísticu y nesti casu musical. Compositor y lletrista, Carlos Rubiera ye un exemplu de supervivencia y de resistencia como cantautor, compositor y lletrista, almirable. La so independencia artística materializóse nel deséu de llevar la so propia productora, exemplu tou ello d’artísta comprometíu, independiente y nos tiempos actuales, ensin dulda ello ye un síntoma d’orixinalidá, maestría y bon facer. Por too ello el Conceyu pola Normalización siéntese arguyosu de da-y esti merecidísimu Premiu.

Proyectos pa facer n’Asturies centros de producción cinematográfica

El conceyal de Cultura, José Suárez Arias-Cachero, destacó ayeri que Uviéu ye buen plató pa rodar películes, y recordó que, amás de «Oviedo Express», destacaos directores como Woody Allen y José Luis Garci tamién rodaron recientemente na ciudá. «L’oxetivu ye siguir nesa llínea. La cultura ye tamién una industria», añadió’l conceyal, que recordó que’l Conceyu tien el proyectu d’impulsar una industria cultural y cinematográfica na ampliación del polígonu d’Olloniegu, que s’entregará en 2009 ya «incluye un edificiu que combinará la formación con estudios cinematográficos». Suárez Arias-Cachero refirióse tamién al proyectu que’l productor Xuan Gona, Premiu d’Honor del Festival de Cine Asturianu 2007, prepara pal polígonu industrial d’Argame, nel vecín conceyu de Morcín. «Préstanos que Gona faiga una inversión cerca d’Uviéu, puede crease un "cluster" cultural na rexón central metropolitana, xunto al nuestru proyectu pa Olloniegu», Xuan Gona precisó que´l so estudio tendrá aules y dos platós pa producciones cinematográfiques y televisives, y tará iguáu en 2009.





L’Arribada incluirá les lliteratures de les Naciones Celtes nes próximes cites

El congresu d’escritores n’asturianu, Arribada- vagamar lliteraria, va internacionalizase nes próximes eidiciones ampliando’l so ámbitu al de les lliteratures de les naciones celtes del Arcu Atlánticu. Asina amás de la lliteratura asturiana tendrán cabida nos alcuentros la promoción de les lliteratures irlandesa, escocesa, galesa, bretona, córnica o gallega, axuntando asina pela lliteratura a los países que comparten una mesma costa atlántica y una mesma mar. Más de 150 autores asistieron en Xixón al alcuentru lliterariu, onde se debatió sobre’l futuru del asturianu. Los responsables d’Arribada, ampliarán l’ámbitu d’acción el próximu añu a estes lliteratures hermanes del Arcu Atlánticu. Asína falaron el coordinador de la secretaría técnica del congresu, Humberto Gonzáli, y el presidente de l’asociación Arribada, Inaciu Galán. Los organizadores ficieron un balance «perpositivu» de la edición, que se peslló con un certame de monólogu modernu asturianu, depués de recibir a más de 150 autores a lo llargo de los últimos siete díes en diferentes alcuentros literarios, conferencies, conciertos y charres. La última tertulia, sobre identidá y lliteratura, tuvo como intervinientes a Lluis Xabel Álvarez, Sixto Cortina, Ignacio G. López-Dóriga, Pablo Rodríguez Alonso y Faustino Zapico. L’asociación Arribada dio por algamáu el so oxetivu d’abrir un foru pa facilitar l’alcuentrude la ciudadanía cola lliteratura y la cultura asturiana en xeneral. A l’alta participación del públicu nos actos sumaron una segunda felicitación: la participación
de tolos grupos políticos na xornada inaugural.Pa futuros alcuentros lliterarios confíen n’axuntar nuevamente a tolos estamentos sociales, «pa que la cultura asturiana nun seya solamente un fechu vinculáu a los escritores, sinon a tola sociedá». Preba d’esta amplificación de la llingua autóctona ye l’acuerdu robláu con Pedro Gálvez, pa que la so obra se traduza al asturianu.
Arribada definió’l congresu como un proyectu «novedosu, abiertu y democráticu» col que desea continuar en próximos años, averándose a otros horizontes lliterarios pan-atlánticos. Como retos futuros marcóse la consecución d’una mayor presencia del asturianu nos medios de comunicación públicos, nel cine y na televisión.

HIMNOS DE LES NACIONES CELTES:

http://www.youtube.com/profile_video_blog?user=RTVD&page=1

Resultáu de les votaciones pa escoyer les 7 maraviyes d’Asturies


Yá se conoz el resultáu de les votaciones pa escoyer les siete maraviyes d’Asturies, les siete obres feches pol ser humanu n’Asturies y que mereceríen el reconocimientu de maraviyes de la humanidá. La votación entamóse nesti branu pasáu per aciu de l’axencia de noticies cpn, recoyéndose les votaciones per internet. El resultáu de los internautes que mandaron propuestes dende munchos países ye’l siguiente y los monumentos artístisticos o culturales que vienen darréu, los ganadores de la encuesta pública, amuésense per orde alfabéticu y non pel númberu de votaciones recibíes:
1- Castru de Villacondide (Cuaña)
2- Catedral d’Uviéu
3- Cuadonga
4- Cuevona de Tito Bustillo
5- Dólmenes del Monte Areo
6- La llingua asturiana
7- Palaciu real del Naranco

Flores nel parque y Electroxoc
ganen nel 2u Festival CinegailesAST

El curtiumetraxe "Flores en el parque" y la película "Electroshock" resultaron ser les obres ganadores d'esta segunda edición del Festival Internacional de Cine Gai y Lésbicu d'Asturies - CinegailesAST 2007 que tuvo llugar en Xixón del 9 al 11 d'agostu onde se proyectaron los trabayos finalistes. Los premios concediéronse mediante votaciones del públicu asistente a caúna de les proyecciones que tuvieron llugar nel Auditoriu del Centru de Cultura Antigu Institutu Asturianu. El curtiu "Flores en el parque (o los primeros besos)" ye una realización de la directora y guionista arxentina Mariel Maciá (Salta, 1980) producida por enikpro.com nel añu 2006, onde se nos cuenta la primer relación de Lola y Ana nun parque: Lola apurre flores y Ana sólo duldes, la indecisión d'una ye una actitú provocativa pa la otra hasta que puedan dase los primeros besos. El públicu apreció esta gran obra de guion y actores mui cercana a la vida real de munches persones que s'enfrenten a una relación personal per primer vez otorgándo-y máximes puntuaciones. La película ganadora nesta edición ye "Electroshock" dirixida por Juan Carlos Claver y con guion del propiu Claver y d'Agustín Madariaga. Electroshock cunta con un gran repartu de grandes actrices, ye un drama conmovedor sobre'l sufrimientu de dos muyeres lesbianes que sufireron en propia persona les consecuencies d'una sociedá intolerante. Basada en fechos reales ocurríos na Hespaña del tardofranquismu cuando a Elvira la echen del trabayu por ser lesbiana y a Pilar ingrésenla nun manicomiu por ser lesbiana onde-y practiquen la tortura del electroxoc que-y dexará secueles irreversibles pa tola vida. Cuando paez que Pilar se recupera y vuelve con Elvira llueu de la lllegada de la democracia a Hespaña, el pesu del sufrimientu pasáu ye mui fuerte pa poder superalu. La película conmovió ya impresionó al públicu de tal manera que recibió máximes puntuaciones. Al empar, el trabayu de Julieta Serrano nesta película, nel papel de la madre, valió-y el Premiu a la Meyor Actriz del Festival, un merecíu reconocimientu a una gran actriz barcelonesa. El Premiu al Meyor Actor foi pa Tess Harper pol so papel na película norteamericana Loggerheads-Necios de Tim Kirkman. El premiu al Meyor Documental foi pa la produccion peruano-canadiense del añu 2005 titulada "Maricones" de Marcos Arriaga que narra la difícil situacion de la vida diaria de tantos homes y muyeres del colectivu GLT en países como El Perú onde al machismu, violencia y homofobia imperante hai qu'amestar la probura y la marxinación social y económica na que se desarrollen les sos vides. Na Gala de Pieslle del festival CinegailesAST rindióse un merecíu homenaxe a la carrera artística del director inglés Stephen Frears, Premiu d'Honor d'esta edición del Festival CinegailesAST 2007.



CinegailesAST
festivalcineastur@wanadoo.es

http://www.quediario.com/blogs/2517/

............................................................................................

CinegailesAST presenta la primer película europea
subtitulada al asturianu

El 2u Festival Internacional de Cine Gai y Lésbicu d'Asturies - CinegailesAST, que se cellebra en Xixón del 9 al 11 d'agostu del 2007, presentó na so xornada inaugural como novedá la primer película europea subtitulada n'asturianu. El mediumetraxe noruegu tituláu O'blig hos meg - Habita conmigo, de la directora Anette Ostro, rodáu nel añu 2002, yá participó na pasada edición del CinegailesAST y esta vez vuelve presentase al públicu col estrenu de subtítulos en llingua asturiana. Sara vive y trabaya con sos padres nun hotel ultracristianu de la costa noruega. Quieren qu'ella se case con David, un predicador cristianu. La película cuenta la hestoria d'Eva, una pintora que llega a una casa d'un pueblu de la rocosa y guapa costa noruega pa pintar el retablu principal de la ilesia del hotel. Eva va camudar la vida de Sara dafechu revelándo-y el misteriu sagráu del puru amor. El títulu alude a un conocíu salmu cristianu. La película volverá proyectase güei vienres 10 d'agostu a les 21 hores na sede principal del Festival, el salón d'actos del Centru de Cultura Antigu Institutu de Xixón. Los subtítulos son una realización de Mely Fernández y Xavi Vilareyo, axenciacpn@wanadoo.es


..................................................................................................

El 2u Festival CinegailesAST escomienza en Xixón


El próximu xueves 9 d'agostu entama en Xixón el 2u Festival Internacional de Cine Gai y Lésbicu d'Asturies - CinegailesAST 2007. El Festival fizo público les sos nominaciones a los premios d’esti añu. El festival tendrá llugar los díes 9, 10 y 11 d’agostu nel auditoriu del Centru de Cultura Antigu Institutu Asturianu y concederá los premios per votación popular del públicu. La película con más nominaciones ye Loggerheads-Necios del director norteamericanu Tim Kirkman (Meyor Película, Actores y Actriz) persiguida de cerca pola película tamién norteamericana Una palabra de cuatro lletres de Casper Andreas y pola producción hespañola titulada Electroxoc, de Juan Carlos Claver. Siguen en nominaciones la película bosnia Marcha pal oeste, de Ahmed Imamovic y l’arxentina Puto-Maricu, de Pablo Oliveiro. Tamién destaquen en nominaciones los curtiumetraxes Flores nel parque y Náugragos, xunto col restu de finalistes: Ester, Amar, Pausa, El procesu d’aceptación, Rixu pol fútbol y Enguedeyaos. Na estaya de documentales opten al premiu los trabayos Rosario Miranda, La puerta verde, El sexu los ánxeles y el documental peruano-canadiense tituláu Maricones. Los nominaos al Meyor Actor son Jesse Archer y Cory Grant por Una palabra de cuatro lletres y Tess Harper y Michael Kelly por Loggerheads-Necios. Les nominaes a Meyor Actriz son: Carmen Elías y Julieta Serrano por Electroxoc; Miriyana Karanovic por Marcha pal oeste; María Garralón por Náufragos y Bonnie Hunt por Loggerheads-Necios. Los países participantes nesta edición del CinegailesAST 2007 son L’Arxentina, Bosnia-Hercegóvina, Canadá, Estaos Uníos, Francia, Hespaña Israel, Noruega, El Perú nun cuntando esta vegada con producción asturiana. El Premiu d’Honor del Festival va concedése-y al director inglés Stephen Frears (Leicester, 1941) por ser un pioneru del cine gai nos difíciles años 80 algamando gran éxitu comercial a nivel mundial con títulos como La mio guapa llavandería (1985), Abre les oreyes (1987), y cola serie Yo tengo mieu de Virginia Woolf (1978). De recién algamó gran éxitu col homenaxe que-y dedicó a la princesa Diana, enfotada na llucha contra’l sida, a los diez años de la so muerte a través de la so axeitada película La reina.


.................................................................................................

Pieslla'l 11r Festival de naciones celtes d'Avilés

Esti domingu 29 de xunetu echó'l pieslle'l décimoprimer Festival Intercélticu d'Avilés 2007, el Festival de naciones celtes más importante d'Asturies. Del 20 al 29 de xunetu la ciudá entera d'Avilés vivió tou un eventu enllenu de cultura y folclore de les naciones celtes que va camín de camudase en tou un símbolu cultural non sólo pa la rexón avilesina sinon pa toa Asturies. Por ello l'Intercélticu d'Avilés quier reconocese como'l Festival Intercélticu más importante d'Asturies en comparanza con otros que se fain per tola xeografía astur.Esti añu les naciones participantes fueron: Bretaña, Escocia, Gales, Galicia, Irlanda y Asturies. Dende amueses de fotografía etnográfica como la entitulada "Asturies na emigración", pasando per mercaos tradicionales, concursu d'escanciáu, tonada, xuegos tradicionales, traineres, artesanía asturiana, deportes asturianos, cuentacuentos, talleres de baille, xornaes d'estudiu, pero sobretoo pasucais prestosos y tou un ampliu repertoriu de música celta na cai y bailles tradicionales de les naciones celtes. Les bandes de gaites participantes nesti añu fueron: Stuart Cassels, Ledicia, Curran-Fegan, Esbardu, Gaites de Corvera, Gaites d'Avilés, La reina'l Truébanu, Llacín, Llangréu, Dawnswyr Mon, Bagad Landi y The Pitlochry and Blair Atholl. Ente los grupos asturianos participaron Duu Astur, Xera, La bandina'l Tombo, ´Tuenda, Danzantes de Trabáu, L'escarpín, Los Ciquitrinos, y La Bandina. El sábadu 28 peslló la nueche intercéltica el grupu de folk escocés Capercaillie. L'homenaxe a les banderes nacionales de los países celtes y l'himnu d'Asturies marcó'l pieslle d'esta nueva edición del Intercélticu avilesín que tuvo por escenarios principales el nuevu polideportivu d'El Quirinal, la Plaza de Carlos Lobo, la de Camposagráu y la Plaza Mayor del Conceyu.


........................................................................................................

Entamen les excavaciones na ciudá ástur de Lancia


El pasáu dos de xunetu reentamaron les excavaciones nos nicios de la vieya capital de los ástures, la ciudá de Lancia, allugada nel conceyu de Villasabariegu, cerca del ríu Ástura. La Diputación de Lleón llevará alantre los trabayos dirixíos polos arqueólogos Emilio Campomanes, Jesús Liz y Jesús Celis y excavaráse en tola zona norte de Lancia, inda ensin descubrir. Nesta zona norte espérase atopar nuevos edificios que dean más lluz a les yá abondes ayalgues como xoyes celtes y vasixes de barru atopaes en Lancia y que s'alcuentren en dellos museos. Tamién contratóse a una empresa de fotos aeries pa facer semeyes dende'l cielu de toles excavaciones pa refacer el planu urbanu de la vieya ciudá de Lancia, que torna salir del so letargu hibernal y del olvidu institucional nel que s'atopaba esti importante centru arqueolóxicu ya históricu. La ciudá de Lancia foi capital de la nación de los ástures antes de la conquista romana del añu 25 enantes de c. , cuando la tomaron les tropes del xeneral Publio Carisiu. Nomada polos hestoriadores llatinos como "máxima urbs" de los ástures y cuntaba con grandes muries algamando la ciudá los dos kilómetros de diámetru este-oeste. Los ástures prefirieron quemar la so ciudá enantes de conquistala los romanos pero nun se destruyó dafechu. Continuó habitada dende'l sieglu I hasta'l V cuando s'abandonó. Nos nicios de Lancia inda son atopables un macellum o mercáu porticáu y delles termes. Tamién atopáronse xoyes y cerámiques d'un perclaru arte célticu pero son pocos yá que'l llugar nun recibió protección cultural o arqueolóxica hasta hai unos pocos años.