El Constitucional lexitima por unanimidá la candidatura d'Iniciativa Internacionalista

El Tribunal Constitucional hespañol decidió por unanimidá estimar el Recursu d'Amparu interpuestu por Iniciativa Internacionalista-Solidaridá ente los Pueblos (II-SP) contra l'anulación, por parte del Tribunal Supremu hespañol, de la candidatura presentada pa les elecciones al Parlamentu Européu del próximu día 7 de xunu. . La Sala Segunda del tribunal, reconoció los argumentos espuestos polos representantes d'II-SP nel so recursu, ente ellos la condena espresa del usu de la violencia pa fines políticos. Considera asina qu'esta llista electoral, que lleva por tiesta visible al intelectual y dramaturgu madrileñu Alfonso Sastre, y a Doris Benegas, hermana del políticu socialista Chiki Benegas, nel númberu dos de la mentada llista, puede presentase a les elecciones europees. Nel so recursu d'amparu ante'l TC, presentáu'l pasáu llunes, II-SP manifestaba "de manera clara y sin ambigüedaes que nunca utilizó medios que nun seyan políticos, siendo l'usu de la violencia completamente ayenu a la so forma d'acción y cultura política", y espresaba "un claru rechazu y condena del usu de la violencia pa pañar oxetivos políticos nel marcu d'un estáu democráticu".